Eksodɔs 37
37
Ahyɛmudaka No Ne Nyɛɛ
(Eksodɔs 25.10-22)
1Na Bezalel dze akeesia dua yɛɛ adaka no: ne tsentsen yɛ bɛyɛ basafa kor nye fa, ne tɛtɛr bɛyɛ anamɔn ebien nye fa, no krɔn bɛyɛ anamɔn ebien nye fa: 2na ɔdze sika mapa duraa no mu nye n’ekyir, na ɔyɛɛ sika hankra twaa ho hyiae. 3Na oguu no ho sika nkaba anan, dze sisii n’anan anan no ho; nkaba ebien wɔ n’afa kor, na nkaba ebien wɔ n’afa kor so. 4Na ɔdze akeesia dua senseen mpoma, na oduraduraa ho sika. 5Na ɔdze mpoma no hyehyɛɛ nkaba no mu wɔ adaka no ne nkyɛn mu, ma wɔdze aasoa adaka no. 6Na ɔdze sika mapa yɛɛ mbɔbɔrhu egua: ne tsentsen yɛ bɛyɛ basafa kor nye fa, na ne tɛtɛr bɛyɛ anamɔn ebien nye fa. 7Na ɔyɛɛ sika kerubim ebien; ɔbor edwuma na wɔdze yɛe, wɔ mbɔbɔrhu egua ne tsir ebien no; 8kerubim kor wɔ ne tsir kor, na kerubim kor wɔ ne tsir kor so: mbɔbɔrhu egua no ne sin kor no ara mu na ɔmaa kerubim no firii wɔ ne tsir ebien no do. 9Na kerubim no tserɛtserɛɛw hɔn ntsaban mu wɔ sor, dze hɔn ntsaban no kataa mbɔbɔrhu egua no do, hɔn enyim dzi abɔenyim; mbɔbɔrhu egua no do na kerubfo no hɔn enyim bedzii.
Pon a Wɔdze EWURADZE Paanoo Si Do No Ne Nyɛɛ
(Eksodɔs 25.23-33)
10Na ɔdze akeesia dua yɛɛ ɔpon no: ne tsentsen yɛ basafa kor, na ne tɛtɛr anamɔn kor na fa, na no krɔn bɛyɛ anamɔn ebien nye fa: 11na ɔdze sika mapa duraa ho, na ɔyɛɛ ho sika hankra hyiae. 12Na ɔyɛɛ ho ntotoano a ɔbɛyɛ nsatseama hyiae, na ɔyɛɛ no ntotoano no ho sika hankra hyiae. 13Na oguu no ho sika nkaba anan, na ɔdze nkaba no sisii kutuw anan a ɔwowɔ n’anan anan no ho no do. 14Ntoatoano no nkyɛn papaapa na nkaba no dzii, beebi mbrɛ wɔdze mpoma no bɛhyehyɛ dze asoa ɔpon no. 15Na ɔdze akeesia dua sinsiaan mpoma no, na oduraduraa ho sika, ma wɔdze aasoa ɔpon no. 16Na ɔdze sika mapa yɛɛ ɔpon no no do ndzɛmba no, nkwansɛn, nye ne ntser, nye no nkorbaa, nye no nkɔɔpow a wɔdze bohue.
17Na ɔdze sika mapa yɛɛ kandzeadua no: ɔbor edwuma na ɔdze yɛɛ kandzeadua no, n’anan, nye no dua; no ho mpokuwa, nye nkukuduuduw, nye ne nhyiren, fi sin kor no ara mu: 18na abaw esia fifi ne nkyɛn mu; na kandzeadua no abaw ebiasa fi n’afa kor, na ebiasa fi n’afa kor so. 19Mpokuwa ebiasa a wɔayɛ no dɛ almɔnd nhyiren wɔ abaw kor ho, kukuduuduw nye nhyiren; na mpokuwa ebiasa a wɔayɛ no dɛ almɔnd nhyiren wɔ abaw kor no so ho, kukuduuduw nye nhyiren: dɛmara na ɔtse wɔ abaw esia a efifir kandzeadua no ho no ho. 20Na kandzeadua no ho wɔ mpokuwa anan a wɔayɛ no dɛ almɔnd nhyiren, no nkukuduuduw, nye ne nhyiren: 21na kukuduuduw hyɛ abaw ebien a otuatua ho no mu biara ase, wɔ abaw esia a efifir mu no ase. 22No nkukuduuduw nye n’abaw no fi sin kor mu ara: ne nyinara sika mapa na wɔdze yɛɛ no ɔbor edwuma kor. 23Na ɔdze sika mapa yɛɛ no ho nkandzea no esuon, nye no ho adabaa no, nye no ho nsompokuwa no. 24Sika mapa kyɛpɛn kor na ɔdze yɛe, nye no ho ndzɛmba no nyinara.
Eduhuamhyew Afɔrmbukyia Ne Nyɛɛ
25Na ɔdze akeesia dua yɛɛ eduhuamhyew afɔrmbukyia: ne tsentsen yɛ bɛyɛ anamɔn kor nye fa, na ne tɛtɛr bɛyɛ anamɔn kor nye fa, etwaanan a; na no krɔn yɛ basafa kor; ne mmbɛn so fi sin kor no ara mu. 26Na ɔdze sika mapa duraa ho fi n’etsifi, nye ne nkyɛn nkyɛn hyiae, nye ne mmbɛn no: na ɔyɛɛ ho sika hankra dze hyiae. 27Na ɔyɛɛ no ho sika nkaba ebien wɔ ne hankra no ase, wɔ ne mparba ebien no do, wɔ ne nkyɛnmu ebien no do, beebi mbrɛ wɔdze mpoma no bɛhyehyɛ dze asoa. 28Na ɔdze akeesia dua senseen mpoma no, na oduraduraa ho sika. 29Na ɔyɛɛ ɔserango krɔnkrɔn no, nye nduhuanhuam hyewee gyenengyenen no, dɛ mbrɛ oduhuamforafo n’edwuma tse.
ទើបបានជ្រើសរើសហើយ៖
Eksodɔs 37: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.