Ndwuma 26
26
Paul Yi N’ano Wɔ Agrippa Enyim
1Na Agrippa see Paul dɛ, Wɔama wo kwan dɛ ka w’asɛm. Nna Paul tseen ne nsa yii n’ano dɛ: 2Muhu no dɛ me tsir ayɛ yie, Ɔhen Agrippa, dɛ miribeyi m’ano wɔ w’enyim ndɛ, wɔ nsɛm nyina a Jewfo dze roto mo do no ho; 3na ne tsitsir nye dɛ ɔwo dze awea amambra nye ekyingyesɛm a ɔwɔ Jewfo mu nyina ho: dɛm ntsi meserɛ wo dɛ to wo bo tsie me. 4M’asetsena fitsi mo mbofraber mu a ɔhyɛɛ ase wɔ mankasa me man mu, nye Jerusalɛm no, Jewfo nyina nyim: 5na wonyim me fi ahyɛse, na sɛ wɔpɛ dɛ wodzi ho dase a, wonyim dɛ moforaa fɛkuw a wotua hɛn som no ho no mu, na mobɔɔ me bra dɛ Farisiinyi. 6Na afei migyina ha na worubu me atsɛn wɔ anohoba a Nyankopɔn dze maa egyanom no ho enyidado ntsi yi: 7ɔno na hɛn mbusuakuw duebien no som enyiberdo adzesaa nye adzekyee, dze hɔn enyi to do dɛ wobenya. Na enyidado yi ho ntsi, ɔhen, nna Jewfo rotoatoa m’ano yi o. 8Ɔyɛ dɛn na hom bu iyi asɛm a wɔnngye nndzi, dɛ Nyankopɔn nyan ewufo? 9Na ampaara mankasa so modween moho dɛ ɔsɛ me dɛ mebɛyɛ ndzɛmba pii metsia Jesus Nazarɛtnyi no ne dzin. 10Na iyi so na meyɛe wɔ Jerusalɛm: minyaa asɔfompanyin no hɔ tum no, medze ahotseweefo no pii guu efiadze, na sɛ woruku hɔn a, m’ano wɔ mu bi. 11Na motɔɔ dɛ metsea hɔn wɔ nhyiamudan nyina mu, na mehyɛɛ hɔn dɛ wɔnka ebususɛm; na mobɔɔ hɔn do dam koraa no metaa hɔn do kɔr ananaben nkurow do.
Paul Kyerɛ Mbrɛ Ɔyɛe Sakyeree
(Ndwuma 9.1-19; 22.6-16)
12Ɔno mu na menam rokɔ Damaskɔs na medze asɔfompanyin hɔn tum nye ho kwan no, 13wigyinae, ɔhen, muhun kwan no do kan bi a ofi sor a ɔkyɛn ewia ne hyerɛn, dɛ oebotwa emi nye hɔn a wɔnye me nam no ho ehyia. 14Na hɛn nyina hwehwee daadze no, metsee ndze bi a ɔrekasa kyerɛ me wɔ Hebriw kasa mu dɛ, Saul, Saul, ɔyɛ dɛn na etaa mo do yi? Ɔyɛ dzen ma wo dɛ ebɔwɔ dadzepoma ano ntsia. 15Na mesee dɛ, Woana nye wo, Ewuradze? Na Ewuradze see dɛ, Emi nye Jesus a etaa no do no. 16Na soɛr gyina w’anan do: na iyi ntsi na meyi moho akyerɛ wo, dɛ mibeyi wo ato hɔ dɛ ndzɛmba a ehu yi nye dza miribeyi moho akyerɛ wo wɔ mu no ho somfo nye dasefo; 17na mibeyi wo wɔ ɔman no nye amanaman a morosoma wo wɔ hɔn hɔ no nsamu, 18dɛ kobue hɔn enyi na kɛdan hɔn fi sum mu bra kan mu, ma woeefi Satan tum mu aba Nyankopɔn hɔ, na woeenya bɔnfakyɛ nye egyapadze wɔ hɔn a wɔnam gyedzi a ɔwɔ mo mu do enya ahotsewee no mu.
Paul Kyerɛ no Dwuma a Oedzi
19Dɛm ntsi, Ɔhen Agrippa, mannyɛ enyido adzehu a ofi sor no ho asoɔdzen: 20#Ndwu 9.20, 28, 29 na midzii kan kyerɛɛ hɔn a wɔwɔ Damaskɔs, nye hɔn a wɔwɔ Jerusalɛm so, nye Judea asaase do nyina, nye amanaman no, dɛ wonnu hɔnho na wɔnsan mbra Nyankopɔn hɔ, na wɔnyɛ ndwuma a ɔfata nnuho. 21Iyi ntsi na Jewfo no bɛkyeer me wɔ asɔrfi mu, hwehwɛɛ dɛ woku me. 22Na dɛ minyaa Nyankopɔn hɔ mboa ntsi, na migyina hɔ dze ebodu ndɛ, na midzi dase kyerɛ akɛse nye nkakraba nyina, na mennka asɛm biara gyedɛ dza nkɔnhyɛfo nye Moses nyina kaa dɛ ɔbɛba mu no nkotsee; 23#1 Kor 15.20; Isa 42.6; 49.6 mbrɛ otwar dɛ Kraest bohu amandze, na oedzi kan nam ewufosoɛr mu aka kan ho asɛm akyerɛ ɔman no nye amanamamfo.
24Na oyii n’ano dɛm no, Festus dze ndze kɛse tseaa mu dɛ, Paul, egyim: nwomasua dodow robɔ wo dam. 25Na Paul see dɛ, Mommbɔɔ dam bi, onyimnyamfo Festus, na meka nokwar nye enyidahɔ nsɛm. 26Na ɔhen a medze ndam kasa kyerɛ no yi nyim nsɛm yi mu: na megye dzi dɛ iyinom mu biara nnsuma no; na wɔannyɛ yi wɔ kukua mu. 27Ɔhen Agrippa, egye nkɔnhyɛfo no dzi anaa? Minyim dɛ egye dzi. 28Na Agrippa see Paul dɛ, Ana edwen dɛ ber kakraabi yi ibotum ama maayɛ Kristiannyi? 29Na Paul see dɛ, Mepɛ wɔ Nyankopɔn mu dɛ, aka kakraabi o, aka pii o, nkyɛ nnyɛ wo nko, na hɔn a woritsie me ndɛ nyina aayɛ dɛ mara, gyedɛ nkyehoma yi nko.
30Na ɔhen no, nye ambrado no, nye Bernise, nye hɔn a wɔnye hɔn tse hɔ no soɛree; 31na wɔkɔr nkyɛn beebi no, wɔkae wɔ hɔn mu dɛ, Nyimpa yi nnyɛɛ biribi a ɔsɛ owu anaadɛ nkyehoma. 32Na Agrippa see Festus dɛ, Sɛ nyimpa yi ammfa n’asɛm annkɛdan Kaesar a, nkyɛ woegyaa no.
ទើបបានជ្រើសរើសហើយ៖
Ndwuma 26: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
