Ndwuma 27
27
Paul no Rome Nkɔree
1Na wɔkaa dɛ yɛmfa nsuenyi nkɔ Itali no, woyii Paul nye mpokyerɛfo bi maa ɔhamupanyin bi a wɔfrɛ no Julius a ofi Augustus asogyafokuw mu no. 2Na yɛkɔr Adramitium wusihɛn bi a ɔrobɔkɔ Asia afamu mu no, yetui, na Aristarkus, Masidonianyi bi a ofi Tesalonika, ka hɛn ho. 3Na da a odzi do no, yekegyinaa Sidon; na Julius yɛɛ Paul ayamuyie maa no kwan dɛ ɔnkɔ ne amanyimfo nkyɛn ama wɔaahwɛ no. 4Na yetui fii hɔ no, yekoduaa Siprus ase, osiandɛ mframa sii hɛn enyim. 5Na yetwaa Silisia nye Pamfilia po no, yɛbaa Lisia kurow Mira ho. 6Na ɔhamupanyin no hun Alɛksandria wusihɛn bi a ɔrokɔ Itali wɔ hɔ no, ɔdze hɛn guu mu. 7Ndafua pii na yɛnam bɔkɔɔ, na yɛfonae ana yɛrebɛn Sinidus, na mframa amma hɛn ho kwan no, yekoduaa Kreete ase kɛpaa Salmone ho; 8na yɛberɛe berɛe paa ho no, yɛbaa beebi a wɔfrɛ hɔ Ahɛngyinae Fɛɛfɛw no a Lasea kurow bɛn ho no.
9Na yɛsɛɛ mber pii na nsuenyidua yɛɛ hu, na dɛ Mbuadadzi ber#27.9 Mpatada yi ara mu na Mbuadadziber yi wɔ. no etwa mu dada ntsi no, Paul tuu hɔn fo, 10na ɔsee hɔn dɛ, Ewuranom, muhu dɛ akwantu yi amandze nye adzesɛɛ pii bɛba mu, nnyɛ eguadze nye hɛn yi nko na hɛnankasa hɛn nkwa so. 11Na ɔhamupanyin no gyee akyerɛkwan no nye hɛn no wura dzii kyɛɛn dza Paul kae no. 12Na osiandɛ ahɛngyinae no nntsɛw yie dɛ wobedzi awɔwber wɔ hɔ ntsi, hɔn mu pii kaa dɛ wobotu wɔ hɔ kyerɛ wobenya kwan edu Foniks, Kreete ahɛngyinae a odzi kɔ anee pomu nye anee habanmu no, na woekedzi awɔwber.
Ehum Kɛse bi Tuu Po do
13Na pomu mframa bɔɔ faafaa no, wosusuu dɛ hɔn nsa aka dza ɔwɔ hɔn tsirmu no, wotuu sekyɛ duaa anoano kɛbɛɛn Kreete. 14Na annkyɛr na aahow dzendzen bi a wɔfrɛ no Etsifi-Epuei Mframa fii Kreete bɔe; 15na okitsaa hɛn no, ma oenntum ennhyia mframa no, na yegyaa hɛnho ma ɔpaar hɛn. 16Na yɛdze yerɛdɛdɛɛdɛ kɛfaa supruw bi a wɔfrɛ no Kauda ase no, ɔyɛɛ dzen ana yerutum susuo hɛmba no mu; 17na wɔmaa no do no, wɔdze ndzɛmba wowaaw hɛn no kyekyeree; na wosuroo dɛ wɔbɔkɔ akɔhwe Sirtis anhweatɛnkyɛmm mu ntsi, wɔhohɔɔr abradaadua no ma ɔpaar hɔn dɛm. 18Na ehum no bɔɔ dzendzen dze hɛn kyinkyinii no, adze kyee no wotuu hɛn no mu ndzɛmba bi gui; 19na da a otsia ebiasa no wɔdze hɔnankasa hɔn nsa totoow hɛn no ho ndzɛmba gui. 20Na nda pii nna yennhu ewia anaa nworaba biara, na mframa kɛsenara sii hɛn do, afei hɔn enyidado dɛ wɔbɛgye hɛn nkwa nyina yewee. 21Na nda pii twaa mu a edziban nnkaa hɛn ano no, Paul soɛree gyinaa hɔn finimfin see dɛ, Mbarimba, ɔsɛ dɛ nkyɛ hom tsie me, na hom emmfi Kreete emmbenya amandze yi nye adzesɛɛ yi. 22Na afei dze, mutu hom fo dɛ hom mma hom akoma ntɔ hom yamu; na obiara ronnhwer no nkwa wɔ hom mu, gyedɛ hɛn yi nko na ɔbɛsɛɛ. 23Na anadwe yi Nyankopɔn a meyɛ nedze, na mosom no no, no bɔfoe begyinaa me nkyɛn 24see dɛ, Paul, mma nnsuro: otwar dɛ ikegyina Kaesar enyim; na hwɛ, Nyankopɔn dze hɔn a enye hɔn nam nyina akyɛ wo. 25Dɛm ntsi, ewuranom, hom mma hom akoma ntɔ hom yamu: na megye Nyankopɔn dzi dɛ ɔbɛyɛ dɛ mbrɛ ɔaka akyerɛ me. 26Naaso otwar dɛ yekogu supruw bi do.
27Na ne dadu ndaanan anadwe no, yeridzi akɔnaaba wɔ Adria po do no, bɛyɛ esuom na hɛn no mu edwumayɛfo no dween dɛ yɛrebɛn asaase bi; 28na wɔtoow susuhoma no, wohun dɛ ɔyɛ abasamu eduonu; na wɔkɔr enyim kakra na wɔtoow bio no, wohun dɛ ɔyɛ abasamu duenum. 29Na wosuroo dɛ bi a yɛbɔkɔ akɔhwe abotan bi do ntsi, wɔtoo nsekyɛ anan wɔ hɛntu tweɔn adzekyee. 30Na hɛn no mu edwumayɛfo no hwehwɛɛ dɛ woguan fi hɛn no mu, na wogyaa hɛmba no mu too po mu yɛɛ dɛ wɔrokɔto sekyɛ wɔ hɛnkan no, 31Paul see ɔhamupanyin no nye nsordaafo no dɛ, Sɛ iyinom anntsena hɛn yi mu a, hom rinnya nkwa. 32Nna nsordaafo no twaa hɛmba no ne ntampehoma no, ma ɔhwee ase. 33Na adze rebɛkye no, Paul serɛɛ hɔn nyina dɛ wondzidzi, dɛ, Ndɛ dadu ndaanan koraa nna hom atsena edzi mbuada a hom mmfa hwee nnkaa hom ano. 34Dɛm ntsi meserɛ hom dɛ hom ndzidzi, na iyi fa hom nkwa ho: na nhwi kor mpo rimmfi hom mu biara ne tsir do nntɔ. 35Na ɔkaa dɛm no, ɔfaa paanoo, na ɔdaa Nyankopɔn ase wɔ hɔn nyina enyim; na obubui hyɛɛ ase dzidzii. 36Na hɔn nyina hɔn akoma tɔɔ hɔn yamu, na hɔnankasa so faa edziban dzii. 37Na hɛn a yɛwɔ hɛn no mu nyina yɛ akra ahaenu eduosuon esia. 38Na wodzidzii mee no, wɔbɔɔ hɛn no har totoow ewifua no guu po mu.
Wusihɛn no Bobɔ
39Na adze kyee no, nna wonnyim asaase no n’adaa no; naaso wohun ɔdɔndɔn bi a ɔwɔ mpoano hɔ no, wotuu egyina dɛ sɛ wobotum a, wɔbɔtwe hɛn no akɔ hɔ. 40Na wotwaa nsekyɛ no ahoma mu no, wogyaa mu guu po mu, na wɔsaan kutow no n’ahoma so; na wosii hɛnkan abradaa no maa mframa, na wɔdze too mpoano. 41Na wɔbɔtɔɔ beebi a apo ebien hyia no, wɔdze hɛn no pemee; na ne kan ketsimii, na ɔkaa hɔ pintsinn, na no tun dze, asorɛkye no ne dzendzen bubuu no. 42Na nsordaafo no tuu egyina dɛ woboku adaduafo no, amma obi aammbor ennguan. 43Na ɔhamupanyin no, ɔpɛɛ dɛ ɔgye Paul nkwa ntsi, osiiw hɔn dza wosusui no ho kwan; na ɔhyɛɛ dɛ hɔn a wobotum abor mfa hɔnho nkyen po mu ndzi kan nkɔ daadze; 44na nkaa no, binom butubutuuw ntaabow do, binom butubutuuw hɛn no ho ndzɛmba bi do kɔree. Na mbrɛ ɔyɛe ma hɔn nyina nyaa nkwa dur daadze nye no.
ទើបបានជ្រើសរើសហើយ៖
Ndwuma 27: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
