Ndwuma 25
25
Paul Dze N’asɛm Kɛdan Kaesar
1Na afei Festus baa ɔmansin no mu no, ne ndaansa ekyir no ofii Kaesarea kɔr Jerusalɛm. 2Na asɔfompanyin nye Jewfo etsitsir no kaa asɛm tsiaa Paul kyerɛɛ no, na wɔserɛɛ adom wɔ no hɔ dɛ 3ɔnsoma ma wɔnkɛfa Paul mbra Jerusalɛm; na nkyɛ wɔaatsɛw no kwan mu eku no. 4Na Festus dze, obuaa dɛ wɔdze Paul risie wɔ Kaesarea, na nankasa so ɔnnkɛkyɛr na ɔakɔ hɔ. 5Na ɔsee dɛ, Dɛm ntsi hom mma hom mu hɔn a wɔwɔ tum no nye me nsian nkɔ, na sɛ biribi a ɔnnsɛ wɔ ɔbarimba yi mu a, wɔnye no nkɔbɔ nkuro.
6Na odzii hɔn mu bɛyɛ nda awɔtwe anaa dadu no, osianee kɔr Kaesarea; na adze kyee no, na ɔkɛtsenaa asɛndzigua do no, ɔhyɛɛ dɛ wɔmfa Paul mbra. 7Na ɔbae no, Jewfo a woefi Jerusalɛm aba no botwaa no ho hyiae, na wɔdze nsɛmbɔn pii a ɔyɛ dur toatoaa no a hɔnara woenntum annkyerɛ mu; 8na Paul yii n’ano dɛ, Jewfo mbra o, asɔrfi o, Kaesar o, mennyɛɛ bɔn biara minntsiae. 9Na Festus pɛɛ dɛ onya Jewfo enyimpa ntsi, obisaa Paul dɛ, Epɛ dɛ ekɔ Jerusalɛm ma woeebu wo ndzɛmba yi ho atsɛn wɔ m’enyim anaa? 10Na Paul see dɛ, Migyina Kaesar asɛndzigua enyim, mbrɛ ɔsɛ dɛ wobu me atsɛn: Jewfo dze, mennyɛɛ hɔn bɔn bi, dɛ mbrɛ woara so inyim yie no. 11Na sɛ mayɛ bɔn, anaa sɛ mayɛ biribi a ɔsɛ wu a, mommpow dɛ mubowu; na sɛ ndzɛmba a yinom rotoa m’ano wɔ ho yi nnyɛ nokwar a, obi runntum mmfa me nnhyɛ hɔn nsa. Emi dze, medan Kaesar. 12Nna Festus nye baguafo no tuu egyina no, obuaa dɛ, Sɛ edze akɛdan Kaesar a, ɔnodze, Kaesar hɔ na ebɔkɔ.
Paul wɔ Agrippa nye Bernise Enyim
13Na nda bi ekyir no, Ɔhen Agrippa nye Bernise baa Kaesarea, na wobekyiaa Festus. 14Na wodzii hɔ nda pii no, Festus dze Paul ho asɛm no too ɔhen no enyim dɛ, Ɔbarimba bi wɔ hɔ a Feliks gyaa no mpokyerɛ mu: 15ɔno na mokɔr Jerusalɛm no, asɔfompanyin nye Jewfo mpanyin no kaa no ho asɛm kyerɛɛ me serɛɛ me dɛ mumbu no atsɛn. 16Na mubuaa hɔn dɛ ɔnnyɛ Romefo amambra dɛ wobeyi nyimpa bi ama, gyedɛ nyia wɔrobɔ no ho nkuro no nye no nkurobɔfo no edzi enyim na enyim, na onya kwan yi n’ano wɔ dza wɔdze ato no do ho ansaana. 17Dɛm ntsi wobehyiaa ha no, mannyɛ ekyim, na adze kyee no mekɛtsenaa asɛndzigua do na mehyɛɛ dɛ wɔmfa ɔbarimba no mbra. 18Na no nkurobɔfo no begyinaa hɔ no, wɔannka emumuyɛdze a mususui no mu biara ho asɛm annto no do, 19na hɔnankasa hɔn nyamesom ho ekyingye a wɔnye no gyee no ho, na Jesus bi a oewu a Paul so se dɛ ɔtse ase no ho dze. 20Na dɛ minnyim mbrɛ mebɛyɛ mahwehwɛ iyinom mu ntsi, mibisaa no dɛ ɔpɛ dɛ ɔbɔkɔ Jerusalɛm ma woeekobu no atsɛn wɔ nsɛm yi ho anaa. 21Na Paul dze asɛm no kɛdaan ɔhempɔn no dɛ wɔmfa no nsie ma onkodu n’enyim ntsi, mehyɛɛ dɛ wɔmfa no nsie ma onkodu dɛ mobɔsoma ma wɔdze no akɛma Kaesar. 22Nna Agrippa see Festus dɛ, Nkyɛ mo so mepɛ dɛ mitsie nyimpa no. Na ɔsee dɛ, Ɔkyena ibetsie no.
23Na afei adze kyee no, Agrippa nye Bernise dze ahokeka kɛse bae, na wɔnye asafohen mpanyin no binom, nye kurow no mu mbapɔmba no, kɔr mbrɛ wotsie asɛm hɔ, na Festus hyɛe no, wɔdze Paul bae. 24Na Festus see dɛ, Ɔhen Agrippa, nye mbarimba a hom nye hɛn wɔ ha nyina, hom nhwɛ nyimpa yi a Jewfo nyimpadodow nyina serɛɛ me tsiaa no wɔ Jerusalɛm nye ha, na wɔtseatseaa mu dɛ ɔnnsɛ dɛ ɔtsena ase bio no. 25Naaso muhun dɛ ɔannyɛ biribi a ɔsɛ wu; na nankasa dze asɛm no akɛdan ɔhempɔn no ntsi mahyɛ dɛ mobɔsoma no hɔ. 26Naaso minnyi biribi tsitsir biara a mebɛkyerɛw akɛma mo wura wɔ no ho. Dɛm ntsi na medze no aba hom enyim, nkanka ɔwo, Ɔhen Agrippa, ama wowie mu hwehwɛ a, meenya biribi a mebɛkyerɛw. 27Ɔyɛ me dɛ nyansa biara nnyi mu dɛ medze daduanyi mobɔkɔ, na mennkɛkyerɛ asɛm kor a wɔdze ato no do.
ទើបបានជ្រើសរើសហើយ៖
Ndwuma 25: MFANBRP
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mfantse Bible © Bible Society of Ghana, 2011.
