Maariqoosi 9
9
1Yesuusi daakkiꞌi bi dabbeenaꞌonaa bare asheenaꞌonoyich ishichiye: “Iberoon ittoshich gettoye: Hiniich neexee beetinaꞌo daggoochee ikkikkeenaꞌo Yeerichi taatittine ooge hakkoona bi waataa boonoshi beegimmi wottoon qitaachemminaꞌo beetinaꞌone” iye.
Keejje Bi Dabbeenaꞌo Aafoochaa Yesuusi Shaddeyoo
(Maatiyoosi 17:1-13; Luqaasi 9:28-36)
2Shiritte qemoyee gubb Yesuusi Pheexiroosin, Yaaqobinaa Yowannisinon yechiꞌi genje guudi toommooch kechiye. Arooch boonoshi baach beetee, boonoshi aafooch shaddeehe. 3Bi taheti tahoo wacwacciye; showee toommooch koniyoona machiꞌi xalliyoo hakkaani naccittinoon naccehe. 4Arooba Eliyaasinaa Muusina xalla bekkeꞌi Yesuusina tookkii boonoshi yibbaatee beetaa, hini are keejje bi dabbeenaꞌo beeggiyeete.
5Pheexiroosi tiyiꞌi Yesuusin “Dojjechocho, hiniich beemo nooch gaawiye. Ebich keejje bashoon, ikkoon neech, ikkoon Muusich, ikkoonoo Eliyaasich, bashibone” iye. 6Tunebaani oogichii boonoshi keqqitoyich, Pheexiroosi ama bi ii beeto gaata ariyaanoone.
7Aree hillooch qubo waaꞌi boonoshin yiirehe. Qubee daggoochaa “Ta shuni bushoo hinine; bi waanee waayebote” immi qaaroon waayeheete.
8Aroochee bekkech guuddii ciinniꞌi, boonoshina tookkii Yesuusi ikkeeto baach beeton beeggiyeete.
9Ebiyee gubb, Yesuusinaa keejje bi dabbeenaꞌona guudi toommoochee boonoshi kindii beetaa, Yesuusi Ashi Bushoo qitoochee tiyimmi wottoon, boonoshi beeggiton konichona boonoshi getaachemmoyich gettiye. 10Bi gettiton waayeꞌi deꞌa iyeete. Tunebaani “ ‘Qitoochee timo’ geto, ama getone?” iꞌi boonoshinaa boonoshina echeeheete.
11Aroochee Yesuusin “Muusichi Sheeree dojjechinaꞌo ‘Shiichi woyemmo Eliyaasine’ ii amoyichiye boonoshi gettiibeeto?”#Milik. 4:5 iꞌi echeheete.
12Biyoo wochiꞌi boonoshich ishichiye: “Iberoone; Eliyaasi shiichiree woyemmone; waaree bulli mooyon tachemmone. Tunetaa Ashi Bushoo wodde xuuxoon beeggemmo, hoxeyemmoo bi tuno bi kooreeto amoyichiye? 13Tunebaani ta ittoshich gettoye: Eliyaasi waatone; biicho bi kooreetoommon asheenaꞌo boonoshi qaawito bullin bi toommooch tuniitinaꞌone” iye.
Yinno Bi Toommooch Beeti Bushoon Yesuusi Wodiyoo
(Maatiyoosi 17:14-21; Luqaasi 9:37-43)
14Ebiyee gubb, Yesuusinaa keejje bi dabbeenaꞌona eche bi dabbeenaꞌo waan wottee waaꞌi, dofee asheenaꞌo boonoshin giichiꞌi, Muusichi Sheeree dojjechinaꞌo boonoshina tookkii gajjitee beetaa beeggiyeete. 15Hini are dofee asheenaꞌo bulli Yesuusin bekkech beeggii oogichii worganeꞌi biin diggiyoyich woceheete.
16Aree hillooch Yesuusi bi dabbeenaꞌon “Muusichi Sheeree dojjechinaꞌona tookkii ama iiniye ittoshi gajjiteebeeto?” iꞌi echehe.
17Are asheenaꞌo daggoochee ikkoo tiyiꞌi ishichii wochiye: “Dojjechocho, noonoon miimiibeeti maachi biiyoona biiyeti ta bushoon ne waan deebeto taane. 18Hini are biiyo bi tiyimmi areddoon bushoon dichiye. Umboon aapphiihe; bi gashoon qaachiihe; bi ashittinoo mixochoommon shuuqqiye. ‘Hini ta bushoo toommoochee miimiibeeti yinnoon yoohote’ iyaꞌa ne dabbeenaꞌoyich ta getaa, yoohon mawiitinaꞌone” iye.
19Yesuusi wochiꞌi boonoshich “Hini, Yeeri toommooch mulloon tooꞌiyaani shiijjereenaꞌote! Aati wottoon ittoshina tookki beeyehote? Amee wottoon ittoshin haaꞌiyehote? Eke ta waan bushoon deebote” iye.
20Bushoon bi waan deebiyeete. Yinno Yesuusin beeggiꞌi bekkech bushoon nagixiihe. Bushoo showooch dihiꞌi umboon aapphiibee gedirehe.
21Aroochee Yesuusi bushoochi nihoon “Hini maachi biiyo bushoon yechito ambiche natt beddiye?” iꞌi echehe.
Bushoochi nihoo wochiꞌi, “Gaggeree bi beetenane. 22Wuxi kuxxa iꞌi meeti areddoon qaaqqoochoo, aacoochoo biin dichitone. Neech bi hakkeegaata, nooch ariqqeree, noon gaachebe” iye.
23Yesuusi wochiꞌi, “ ‘Neech bi hakkeegaata’ inne? Mulloon Yeeri toommooch tooꞌitoyich, bulli mooyo hakkeyemmone” iye.
24Bekkech bushoochi nihoo cookiꞌi, “Ta mulloon Yeeri toommooch tooꞌiibeeto taane; shappe ta mullee tooꞌiyoo ceeno bi tunemmoyich taan gaachebe” iye.
25Aree hillooch Yesuusi meeti asheenaꞌo daappiibee womon beeggiꞌi, yinnoon “Hini ulle miime yinnoocho, ‘Bushoo toommoochee tibe; illa guttinnoon bi toommooch koteyaahine’ ito taane” iꞌi noggehe.
26Yinno bekkech bunneꞌi bushoon oogichii nagixii bi itoyee gubb, tiyiye. Bushoo qititi dubenoon shaahaa beeggiti meeti asheenaꞌo “Bushoochi kasho kechitone” iyeete. 27Tunebaani Yesuusi bushoo kishoona yechii tiijjiye. Bushoo motekkimmii tiyii neexehe.
28Aree hillooch Yesuusi kexooch bi giyitoyee gubb, bi dabbeenaꞌo “No ebi yinnoon yoohon no mawiito amoyichiye?” iꞌi bi ikkeeto bi beetaa echeheete.
29Yesuusi wochiꞌi, “Ebiyoommi yinno [coomii] corootaan gaata, cir keyon hakkaache” iye.
Bi Qitemmon Wochinnoon Yesuusi Geto
(Maatiyoosi 17:22-23; Luqaasi 9:43-45)
30Yesuusinaa bi dabbeenaꞌona aroochee tiyiꞌi Galiilee showoona besheheete. Yesuusi bi beeti xaaꞌoon koniyoona ariyemmoyich qaawaanoone. 31Ebiyoo bi dabbeenaꞌoyich dojjii bi beetoyichiye. Boonoshich “Ashi Bushoo taan ashi kishooch beshiiree immemminaꞌone; wuxemminaꞌone; boonoshi wuxitoyee gubb keejje qemooba qitoochee tiyemmo taane” iye. 32Tunetaa ebi mooyo boonoshich giyaanoone. Boonoshiyoo wochii biin echoon shattiyeete.
Bulliyee Besho Konigaata Yesuusi Geto
(Maatiyoosi 18:1-5; Luqaasi 9:46-48)
33Qifirinaahi katemooch shaggiꞌi kexooch boonoshi giyitoyee gubb, Yesuusi bi dabbeenaꞌon “Waabee gommoochaa ittoshi gajjiteeti mooyo amoone?” iꞌi echehe. 34Tunebaani boonoshi cikkii qajjiyeete. Ebiyoo gommona waabee, “No daggoochee bulliyee besho konine?” iꞌi boonoshi gajjiteetoyichiye.
35Aree hillooch Yesuusi koteꞌi aaraa gutte bi dabbeenaꞌon bi waan ceeggiye. Ceeggiꞌi, “Asho koniyoona, oogoo tunoon bi qaawigaata, bulliyee desh bi qelloon yittiiree bullichi wochee bushoo tunebe” iye.
36Aroochee ikke giisheche bushoon deebii boonoshi daggooch neechiye. Tiqqeꞌi, 37“Koniyoona taacha iꞌi, ebiyoommi gishiishi bushiisheenaꞌo daggoochee ikkoon bi shunigaata, taan shunnii beetone. Wotta koniyoona taan bi shunigaata, taan deejjiti Yeerinoonalli, ta ikkeeton toonoone bi shunniibeeto” iye.
Noon Mooyona Koyaano No Guupheexo Bi Tuno
(Luqaasi 9:49-50)
38Wotta Yowannisi tiyiꞌi Yesuusin “Dojjechocho, ikke uro ne shigoona ashi toommoochee yinnoon bi yookkii beetaa beeggaꞌa, no guupho tuno bi qajjitoyich bajjehone” iye.
39Arooba Yesuusi wochiꞌi ishichiye: “Ta shigoona gaakkechi shuunoon shuuneebee bekkech ta toommooch gonde mooyon yibbaato hakkemmo koniyoona aalloone; ebich bajjaahote. 40Noon mooyona koyaano bulli no guuphone. 41Iberoon ittoshich gettoye; Kiristoosicho ittoshi tunetoyich, taacha iꞌi aqqe aacon ittoshich uchimmo bulli wojjoon mucceyaachemmone” iye.
Axaaxoon Shuuniibeeti Mooyinaꞌo
(Maatiyoosi 18:6-9; Luqaasi 17:1-2)
42“Wotta boonoshi mulloon ta toommooch tooꞌiiti hini gishiisheenaꞌo daggoochee ikkoyich xugo tunemmo koniyoona, ooge yiikke xaqqoon bi qettooch tifaa baharee gejjooch bi duppeto gaata, biich gaawiye. 43-44Ebich ne kishoo axaaxoo ne shuunemmoyich naboo bi tunegaata, kuxiree dufe. Gutte kishoona beebee [ashi meenon maabeeti hipperoo qitaani,] aaxxo tahaani shiweree qaaqqooch ne gimoyee, kisha kuxo tuneꞌi kashee kexooch giyii beemo neech gaawiye. 45-46Ebiyoommon ne baatoo axaaxoo ne shuunemmoyich naboo bi tunegaata, kuxiree dufe. Gutte baatoona beebee, [ashi meenon maabeeti hipperoo qitaani, aaxxo tahaani] shiweree qaaqqooch ne duppeyoyee, baata kuxo tunaachaa kashee kexooch giyii beemo neech gaawiye. 47-48Wotta ne aafo axaaxoo ne shuunemmoyich naboo bi tunegaata, kichiree dufe. Gutte aafoona beebee, ashi meenon maabeeti hipperoo qitaani, aaxxo tahaani shiweree qaaqqooch ne duppeyoyee, ikke aafoona beebee kashee kexooch giyiꞌi beemo neech gaawiye.#Isi. 66:24 49Asho bulli qaaqqoona xallemmone.
50“Kiiho gaawetone; tunebaani kiiho noocon bi qayigaata, are kiihon amoona noociiyehote? Illa ittoshi kiihochoommon nooco tunebote; ittoshinaa ittoshina shuneree beebote” iye.
ទើបបានជ្រើសរើសហើយ៖
Maariqoosi 9: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.