Maariqoosi 8
8
Awudde Humeenaꞌoyich Yesuusi Maanjoo
(Maatiyoosi 15:32-39)
1Arooba wochinnoon dofee asheenaꞌo kiceeheete. Boonoshi maayemmo aalletoyich Yesuusi bi dabbeenaꞌon ceeggiꞌi, 2“Hini asheenaꞌo taanna tookkii boonoshi koteto hanaach keejje qemone. Boonoshi maayemmo aalletoyich taan oogichii ayinikkitone. 3Ebiyee wotta boonoshi daggoochee ikkikkeenaꞌo wohoocheeniye boonoshi waato. And abete kashoona boonoshin kexooch ta daachiigaata, gommoochaa maraate dihemminaꞌone” iye.
4Bi dabbeenaꞌo tiyiꞌi, “ No beeti showoo gafoo aalli barahoone; ishigaata, hini asheenaꞌoyich beddemmi maayoon amoochee deebiree maanjoon hakkehone?” iyeete.
5Yesuusi “Ambiche kosho ittoshich beete?” iꞌi echehe.
Boonoshi wochiꞌi, “Shabaatte xekee kosho beete” iyeete.
6Aree hillooch Yesuusi asheenaꞌon “Showooch kotebote” iꞌi gettiye. Shabaatte xekee koshon tiijjiꞌi Yeerin galletehe. Tiichiꞌi, “Asheenaꞌoyich qoomebote” iꞌi bi dabbeenaꞌoyich immiye. Bi dabbeenaꞌo asheenaꞌoyich giddii qoomeheete. 7Wotta giisheche gishiishi haashoo boonoshich beehe; Yesuusi are haashoon tiijjiꞌi Yeerin galletehe. Bi dabbeenaꞌonoo “Hini haashoon wotta asheenaꞌoyich qoomebote” iꞌi gettiye. 8Asheenaꞌoo maaꞌi michiyeete. Aroyee gubb bi dabbeenaꞌo shabaatte mokkee ceeni echeti ooyoon tiijjiyeete. 9Arooba maati asheenaꞌo awudde hum bedeenaꞌone. Yesuusi asheenaꞌon diggiiꞌi bi deennitoyee gubb, 10bekkech bi dabbeenaꞌona tookkii giishi markabeech kechii koteꞌi Dalmanutee showooch hammiye.
11Aroochee Fariseenaꞌo Yesuus waan waaꞌi biinna tookkii taggooch giyiyeete. Biin muriciiya iꞌi, “Shimaayoochee malletoon nooch bekkiibe” iyeete. 12Ebich Yesuusi bi maacoona ayiniꞌi tiyii, “Hini shiijjeroo malletoon beegoyich bi qaawiibeeto amoyichiye? Iberoon ittoshich gettoye: Hini shiijjeroyich amee malletolla icheyaachemmone” iye. 13Ebiyee gubb, boonoshi waanee qajjii wotteꞌi giishi markabeena baharoyee beqach kimmiye.
Fariseenaꞌonaa Heroodisinochi Bukee Shittoo
(Maatiyoosi 16:5-12)
14Arooba Yesuusichi dabbeenaꞌo bedditi shohoon yeshaanoon batteheete. Markabee daggooch ikke xekee koshoyee damba baroo amolla aalloone. 15Yesuusi boonoshin, “Fariseenaꞌonaa Heroodisinochi bukee shittoochee ittoshi qelloon quyebote” iye.
16Bi dabbeenaꞌo ishin waayeꞌi boonoshinaa boonoshina “Kosho nooch aalletoyich shaahiye, bi gettiibeeto” ii yibbaateheete.
17Ebich Yesuusi boonoshi gaboon ariiꞌi ishichiye: “Ittoshi ‘Kosho nooch aalletoyichiye’ iꞌi amoyichiye ittoshi yibbaateebeeto? And beddaahaa shalligaachote? Ittoshi mullooch giyaache? Ittoshi mullo xaqqoone? 18Aafecho ittoshi toone? Ciinaachote? Waajjecho ittoshi toone? Waayeyaachote? Ittoshi mullooch tipphimaache? 19Uuche xekee koshon uuche hume ashich tiichaa ta qoodiyooba, echeti ooyoon ambiche mokkee ceenoniye ittoshi tiijjito?” iye.
Boonoshiyoo wochiꞌi, “Aaraa gutte mokkee ceenoniye no tiijjito” iyeete.
20“Wotta shabaatte xekee koshon awudde humeenaꞌoyich tiichaa ta qoodiyooba echeti ooyoon ambiche mokkee ceenoniye ittoshi tiijjito?” iye.
Boonoshiyoo “Shabaatte mokkee ceenoniye no tiijjito” iyeete.
21Arooba Yesuusi “Ishigaata, batt ittoshi mullooch giyaache?” iye.
Aaf Dooge Uroon Yesuusi Wodiyoo
22Ebiyee gubb, Yesuusinaa bi dabbeenaꞌona Beetisayida shaggiyeete; asheenaꞌoo aaf doogoon bi waan deebiꞌi, “Ne kishoon hini aaf doogoo toommooch kotiibe” iꞌi qolleheete. 23Ebich Yesuusi aaf doogoo kishoon yechiꞌi yaabiibee gafoyee maach kichiye. Cudon kushitee (kuujjii) uroo toommooch bi kishoon kotiichii, “Neech bekkeebeeti mooyo beete?” iꞌi echehe.
24Aaf doogo kaameꞌi, “Asheenaꞌochi shaꞌo taach bekkee beetone; tunetaa mixoniye taach boonoshi shaahiibeeto” iye.
25Ebiyee gubb, Yesuusi guttinnoon wotta uroo aafooch bi kishoon kotiihe. Bekkech aaf doogo manjiiꞌi ciinniye. Wodiꞌinoo bulli mooyon xalliiꞌi ciinniye. 26Arooba Yesuusi uroon “Ne kexooch hamballi, gafooch giyaahine” iye.
Yesuusichon Pheexiroosi Gettiti Mooyo
(Maatiyoosi 16:13-20; Luqaasi 9:18-21)
27Wotta Yesuusinaa bi dabbeenaꞌona Filipphoosi Qesaariyi gaꞌooch beeti gafeenaꞌooch hamma tiyiyeete. Hammiibee gommoochaa bi dabbeenaꞌon “Asheenaꞌo taan konine ii beeteete?” iꞌi echehe.
28Bi dabbeenaꞌo wochiꞌi, “ikkikkeenaꞌo ‘Hini Aacona Afaallechi Yowannisine’, echeenaꞌo ‘Eliyaasine’, echeenaꞌoo wotta ‘Wonna Yeerichi qaaroon keemmii beetinaꞌo daggoochee ikkoone’ ii beetinaꞌone” iyeete.
29Wotta Yesuusi “Ittoshiyochi, taan konine ii beetote?” iꞌi echehe.
Pheexiroosi tiyiꞌi, “Ne Kiristoosi#8:29 Giriikee noonoona Kiristoosi, wotta Hibiree noonoona Masihi geto, “Huutteto” getone. neene” iꞌi wochiye.
30Yesuusiyoo bi dabbeenaꞌoyich “Ta koni ta gaata konichona gettaahote” iye.
Bi Qitemmon Shiichii Yesuusi Geto
(Maatiyoosi 16:21-28; Luqaasi 9:22-27)
31Ebiyee gubb, Yesuusi bi dabbeenaꞌoyich ishichiꞌi dojjooch giyiye: “Ashi Bushoo wodde xuuxoon beego biich echeyaani mooyone. Geeneenaꞌonaa qeeshee ukkireenaꞌona, Muusichi Sheeree dojjechinaꞌoo biin shixxemminaꞌone; wuxiishoo gettemminaꞌone. Keejje qemooba qitoochee tiyemmone” iye. 32Ishin xalla kichii boonoshich gettiye. Pheexiroosi Yesuusin ikke badd wochiꞌi, noggee kaarehe.
33Tunebaani Yesuusi eche bi dabbeenaꞌo waan guuddii ciinniibee, Pheexiroosin, “Hini Sheexaanoocho, ta waanee wohe! Ashichonalli Yeerichon gabaachine” iꞌi noggehe.
34-35Ebiyee gubb, Yesuusi dofee asheenaꞌon bi dabbeenaꞌona tookkii ceeggiꞌi ishichiye: “Bi kasheen wodiyoyich qaawiibeeto bulli muccemmone; tunebaani taannaa ta mishiraachee qaaroonoyicha iꞌi bi kasheen mucceebeeto bulli danemmone. Taan dabboon shunniibeeto koniyoona bi tunegaata, bi qelloon nookkebe; bi masqaloon shaagiree taan dabbibe. 36Wotta asho showee toommooch beeto bullin biicho tuniichii bi kasheen bi muccegaata, amoon biich hallehe? 37Asho bi kasheen wochiꞌi danoyich amoon qoco hakkehe? 38Illa Ashi Bushoo ta wotta ta Nihoochi oogee yiiroona yaafe maraakeenaꞌona tookkaa ta waahooba, hini yahechonaa axaaxoona tuneti shiijjeroo daggooch taannaa ta qaaroonoyich yeellemmo bullina yeellemmo taane” iye.
ទើបបានជ្រើសរើសហើយ៖
Maariqoosi 8: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.