Maariqoosi 10
10
Mechee Gawukkeechon Yesuusi Dojjoo
(Maatiyoosi 19:1-12; Luqaasi 16:18)
1Yesuusi aroochee tiyii Yihudee showooch shaggiꞌi, wotta aroochee Yoordaanoosi aachee beqach hammiye. Wochinnoon meeti asheenaꞌo bi waan kiceemmona aafichoommon boonoshich dojjii beehe.
2 Fariseenaꞌo daggoochee ikkikkeenaꞌo Yesuusin muriciyoyich bi waan giddeꞌi, “Muusichi Sheeroo asho bi mecheen bi gawukkemmoyich daaggite?” iꞌi echeheete.
3Yesuusi wochiꞌi ishichiye: “Muusi hini mooyon ama iꞌi ittoshich gettite?” iye.
4Boonoshiyoo “ ‘Bi gawukkeyoon miixeebeeti koorichoon koori imiree gawukkibe’#Yibba. 24:1 iꞌi daaggitone” iyeete.
5Yesuusi wochiꞌi ishichiye: “Muusi ittoshi mullee muumoon beeggiꞌi hini sheeroon kooritone. 6Tunebaani Yeeri shiichiꞌi showoonaa shimaayoonon bi halliyooba, ashoon anaamonaa maacheenon tuniiꞌi halliye.#Hal. 1:27; 5:2 7‘Ebich asho bi nihoonaa bi indeenon qayiichi bi mecheena tookki ikkoo tunemmone; 8gutteenaꞌoo ikke meeno tunemminaꞌone.’#Hal. 2:24 Ebich are aaboochee tiijjiꞌi ikkeenaꞌoani gubbich gutteenaꞌo tooneenaꞌone. 9Illa Yeeri xaaqqiton asho bariyaaye” iye.
10Yesuusinaa bi dabbeenaꞌona kexooch wottemmona, bi dabbeenaꞌo ebi mooyon biin echeheete. 11Biyoo “Bi mecheen gawukkiꞌi bareen shaaggiibeeto bulli bi mechee toommooch shunoon maatone. 12Areyoo bi kenoon gawukkaꞌa baroon bi shaagigaata, bi toommooch shunoon maatine” iye.
Gishiishi Bushiisheenaꞌon Yesuusi Diiroo
(Maatiyoosi 19:13-15; Luqaasi 18:15-17)
13Aree hillooch asheenaꞌo “Yesuusi bi kishoon boonoshi toommooch kotiibe” iꞌi gishiishi bushiisheenaꞌon bi waan deebiyeete. Tunetaa Yesuusichi dabbeenaꞌo bushiishoon deebiti asheenaꞌon noggeheete. 14Yesuusi ebin beeggii kaareꞌi bi dabbeenaꞌoyich ishichiye: “Qayote! Yeerichi taatittine eboshiyoomminaꞌochine. Ebich gishiishi bushiisheenaꞌo ta waan wobeete; bajjaahote. 15Iberoon ittoshich gettoye: Yeerichi taatittinoon giisheche bushoochoommon deꞌaano arooch cir giyaachemmone” iye. 16Aroochee, gishiishi bushiisheenaꞌon tiqqee bi kishoon boonoshi toommooch kotiiꞌi diiriye.
Gaannechon Iritiibeeti Mooyo
(Maatiyoosi 19:16-30; Luqaasi 18:18-30)
17Yesuusi aroochee tiyiꞌi bi hammii beetaa, ikke uro bi waan woccii waaꞌi bi baatooch goyinneechii, “Deꞌe Dojjechocho, bulli yemeenee kashoon ta danemmoyich amoon hallibote?” iꞌi echehe.
18Yesuusi wochiꞌi, “Amoyich taan deꞌo ii beetine? Ikke Yeeriyee damba deꞌo koniyoona aalloone. 19Muusichi Sheeroon arii beetine: ‘Ashoon wuxiyaahine; shunoon maayaahine; gaajjaahine; kootoon miixeyaahine; ashi gijjoon tuushiiree maayaahine; ne nihoonaa ne indeenon oogiibe’#Key. 20:12-16; Yibba. 5:16-20” iye.
20Uroo wochiꞌi, “Dojjechocho, Ta bushittinoochee tiijjaꞌa ebiich ta beddemmi wottoon ebi bullin ceechito taane” iye.
21Yesuusiyoo hini are uroon ciinniꞌi biin shunniye. “Illa ikke mooyo neech shappitone; hamiree neech beeto bullin kemiree iriteetinaꞌoyich imbe; neech shimaajji kexooch kiceeree beeyemmone. Aroyee gubb waaree taan dabbibe” iye.
22Tunebaani hini are uro wodde gijjoo biich beeto bi tunetoyich, ebi mooyon waayeꞌi oogichii ayiniibee wotteꞌi hammiye.
23Aree hillooch Yesuusi guuddii wottee ciinniꞌi bi dabbeenaꞌoyich “Gaannechinaꞌoyich Yeerichi taatittineech gimo am shaahe maggoone!” iye.
24Ebina bi dabbeenaꞌo worganeheete. Tunetaa Yesuusi wotta ishichiye: “Ta bushiisheenaꞌote, [boonoshi gaannoon gibenee beetinaꞌoyich] Yeerichi taatittineech gimo am shaahe maggoone! 25Gaaleyich nappee aahoona besho maggoone; tunebaani gaannechi uroyich Yeerichi taatittineech gimo ebiyee beshoon maggoone” iye.
26Bi dabbeenaꞌo oogichii worganeebee, “Ishigaata, wodoon hakkemmo konine?” iꞌi boonoshinaa boonoshina yibbaateheete.
27Wotta Yesuusi boonoshin ciinniꞌi, “Hini mooyon tuniyoyich hakkemmo Yeeriyalli asho hakkaache. Yeeri bulli mooyon tuniyoyich hakkechone” iye.
28Pheexiroosi tiyiꞌi, “Ebiyoche, bullin qajjaꞌa neen dabbito noone” iye.
29Yesuusi wochiꞌi ishichiye: “Iberoon ittoshich gettoye: Taannaa ta mishiraachee qaaroonoyicha iꞌi bi kexon woyee bi anaami maneenaꞌon woyee bi maache maneenaꞌon woyee bi indeen woyee bi nihoon woyee bi bushiishoon woyee bi gochiibeeti showoon qajjito koniyoona beshoon danemmone. 30And hini yemeenooch duꞌeree beebee, kexinaꞌon, anaami maneenaꞌon, maache maneenaꞌon, indeenaꞌon, bushiisheenaꞌon, bi gochiibeeti showoon balle kishoon daakkaa danemmone; wotta woyemmi yemeenoochoo bulli yemeenee kashoon danemmone. 31Tunebaani shiichitinaꞌo getteeti meetinaꞌo gubbemminaꞌone; gubbetinaꞌo getteeti meetinaꞌo shiichemminaꞌone” iye.
Bi Qitemmon Keejjinnoon Yesuusi Geto
(Maatiyoosi 20:17-19; Luqaasi 18:31-34)
32Yesuusinaa biinna tookkii beetinaꞌona Yerusaalem kichiibeeti gommona hammii boonoshi beetaa, Yesuusi boonoshiyee aaf beshee shiichiꞌi hammiye. Bi dabbeenaꞌo worganeheete; biin dabbiibeeti bare asheenaꞌo wotta shattiyeete. Aaraa gutte bi dabbeenaꞌon bi waan kiciꞌi bi toommooch woyemmi mooyon wochinnoon ishichiꞌi gettiye: 33“Ebiyoche, and Yerusaalem hammaabeeto noone. Aroochaa Ashi Bushoon qeeshee ukkireenaꞌonaa Muusichi Sheeree dojjechinaꞌonoyich beshiiree immemminaꞌone. Boonoshiyoo ‘Qitibe’ getiree bi toommooch nallemminaꞌone; Aageteenaꞌoyichoo beshiiree immemminaꞌone. 34Boonoshiyoo biin coonemminaꞌone; bi toommooch cuddemminaꞌone; arengoona xoobbemminaꞌone; aroyee gubb wuxemminaꞌone; tunebaani keejje qemooba qitoochee tiyemmone” iye.
Yaaqobinaa Yowannisinochi Qollo
(Maatiyoosi 20:20-28)
35Ebiyee gubb, Zebidiyoosi bushiisheenaꞌo Yaaqobinaa Yowannisina Yesuus waan giddeꞌi, “Dojjechocho, neen no qollemmo bullin nooch ne tuniyemmoyich qaawiibeeto noone” iyeete.
36Biyoo wochiꞌi, “Ittoshich amo ta tuniyemmoyichiye ittoshi qaawiibeeto?” iꞌi echehe.
37Boonoshiyoo wochiꞌi, “Ne taatehooba, no guttoochee ikkoo ne qanne badd, ikkoo ne yooche badd tuneree no kotemmoyich daaggibe” iyeete.
38Tunebaani Yesuusi ishichiye: “Ittoshi qollee beeton ariyaachote. Ta uchemmi xuuxee xoofoochee uyon, ta afaalleyemmi afaalleyoon afaalleyoo hakkehote?” iꞌi echehe. 39Boonoshi wochiꞌi, “Eeha, hakkemmo noone” iyeete. Yesuusi wotta “Ta uchemmi xoofoochee uchemmo ittoshine; ta afaalleyemmi afaalleyoon afaalleyemmo ittoshine. 40Tunebaani ta qanne baddinaa ta yooche baddinooch ittoshi kotemmoyich immemmo ta toono taane. Ebi are xaaꞌeenaꞌon Yeeri qanniiree bi immemmo, bi kaacciti asheenaꞌoyichiye” iye.
41Aree hillooch eche aashire bi dabbeenaꞌo waayeꞌi Yaaqobinaa Yowannisinon kaareheete. 42Aroochee Yesuusi boonoshi bullin bi waan ceeggiꞌi ishichiye: “Aageteenaꞌo daggooch ‘Taateenaꞌo’ getaa ceekkee beetinaꞌo, asheenaꞌon hajjii beetinaꞌo boonoshi tunoon arii beetote; wotta eboshi bullich toommooch iraasheenaꞌo doono boonoshi tunoon tuushaachote. 43Tunetaa ittoshi daggooch ebiyoommon tunaaye; ittoshi daggoochee koniyoona ‘Oogoo tunebona’ ito, ittoshi wochee bushoo tunebe. 44Ittoshi daggoochee koniyoona ‘Ukkirebona’ ito, shiichiree bullichi guuno tunebe. 45Ashi Busholla wocheyoonaa bi kashoon meetinaꞌochi keroyich deejjoonoyich waahalli, boonoshi biich wocheyemmoyich waataanoone” iye.
Qolleebeeti Aaf Doogoon Yesuusi Wodiyoo
(Maatiyoosi 20:29-34; Luqaasi 18:35-43)
46Ebiyee gubb, Yesuusinaa bi dabbeenaꞌona Yaariki katemooch shaggiyeete. Wotta boonoshi dofee asheenaꞌona tookkii Yaariki katemoochee kechii boonoshi beetaa, Xemeyoosichi bushoo aaf dooge Barixemeyoosi, gijjoon qolleebee gommi gashooch kotee beehe. 47Aroo Naazireetechi Yesuusi aroona beshoon waayeꞌi, “Daawiti Bushoo Yesuuso, taach ariqqebe!” iꞌi cookooch giyiye.
48Meeti asheenaꞌo cikkibe iꞌi noggeheete.
Tunebaani aaf doogo “Daawiti Bushoochoo, taach ariqqebe!” iibee beshoon cookiye.
49Areegaata Yesuusi neexeechii asheenaꞌon “Ebi uroon taach ceegote” iye. Bekkech hini are asheenaꞌo aaf doogoon “Kupphebe! Tibe! Yesuusi neen ‘Wobe’ itone” iꞌi ceeggiyeete. 50Biyoo capphii tiyiꞌi bi qoreddoon duppiichii Yesuus waan hammiye.
51Yesuusiyoo aaf doogoon “Amoon neech ta tuniyemmoyichiye ne qaawaabeeto?” iꞌi echehe.
Aaf doogo wochiꞌi, “Dojjechocho, ta aafoon ne ciichiyemmoyichiye” iye.
52Yesuusiyoo “Hambe; ta toommooch mulloon ne tooꞌiyoo neen wodiitone” iye. Hini are aaf doogo bekkech ciinniꞌi gommona Yesuusin dabbii hammiye.
ទើបបានជ្រើសរើសហើយ៖
Maariqoosi 10: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.