Maariqoosi 3
3
Kishoo Qometi Uroon Yesuusi Wodiyoo
(Maatiyoosi 12:9-14; Luqaasi 6:6-11)
1Wochiꞌi Yesuusi Ayihudeenaꞌo kiceebeeti kexooch giyiye. Aroochoo bi kishoo qometi uro beehe. 2Arooch beeti asheenaꞌo “Eke shambetooba bi wodiigaata beegone” iꞌi Yesuusin taggoyich quyee beeheete. 3Yesuusiyoo bi kishoo qometi uroon, “Tiyi hini gutte daggooch neexebe” iye.
4Wotta asheenaꞌon “Muusichi Sheeroo shambetooba deꞌe shuunooniyee gonde shuunoon daaggiye? Kashee wodiyooniyee aalliyooniye?” iꞌi echehe; tunebaani boonoshi noonoo wochaanoon cikkii qajjiyeete.
5Yesuusi boonoshi mullo muumetoyich oogichii ayiniꞌi bi guudoona beetinaꞌon kaaree aafoona ciinniye. Uroonoo “Ne kishoon yaggibe” iye. Biyoo yaggiye; bi kishoo wotteꞌi iiwehe. 6Arooba Fariseenaꞌo bekkech Ayihudeenaꞌo kiceebeeti kexoochee kechiꞌi, “Aabichiree biin wuxibona?” iꞌi Heroodisichi asheenaꞌona tookkii echeeheete.
Yesuusin Dofee Asheenaꞌo Dabboo
7-8Ebiyee gubb, Yesuusi tiyiꞌi bi dabbeenaꞌona tookkii baharo beetooch hammiye. Galiilee waati dofee asheenaꞌo biin dabbiyeete; wotta dofee asheenaꞌo bi tuniiti mooyon waayeꞌi, Yihudee, Yerusaalemee, Edomiyaasee, Yoordaanoosi aachee beqachee, Xiroosinaa Sidooninoochee bi waan waaheete. 9-10Yesuusi meeti asheenaꞌon bi wodiitoyich biiyechinaꞌo bulli bi achooch boonoshi kishoon bechiya qaawiꞌi bi toommooch boonoshi xuꞌeetoyich, bi dabbeenaꞌon “Asheenaꞌo meetinaꞌone; ebich taan boonoshi xuꞌaachemmoyich giishi markabeen taach giddiibote” iꞌi gettiye. 11Wotta yinneenaꞌo biin ciinniꞌi bi aafooch guufeechii, “Ne Yeerichi Bushoo neene!” iibee cookiyeete. 12Yesuusiyoo “Koni ta gaata gettaahote; ittoshi qelloon ariibote” iye.
Aaraa Gutte Bi Dabbeenaꞌon Yesuusi Kaaco
(Maatiyoosi 10:1-4; Luqaasi 6:12-16)
13Aroyee gubb Yesuusi geppooch kechiꞌi bi qaawitinaꞌon bi waan ceeggiye; boonoshiyoo bi waan hammiyeete. 14-15Aaraa gutte asheenaꞌon kaacciye. [Boonoshinoo “Mishiraachechinaꞌo” iꞌi shigiihe.] Bi kaaccito, “Taanna tookki beebeete; wotta mishiraachee qaaroon boonoshi bechemmonaa yinnoon ashi toommoochee boonoshi yookkemmonoyich ukkirittinoon imiree wochebona” iꞌiniye. 16[Kaacheti aaraa gutte asheenaꞌo] Pheexiroosi iꞌi bi shigiiti Simooni, 17“Baarinegeesi woyee Xeeyee Bushiishoo” iꞌi bi shigiiti Zebidiyoosi bushiisheenaꞌo Yaaqobinaa Yowannisina, 18Indiriyaasi, Filipphoosi, Baritelemoosi, Maatiyoosi, Toomaasi, Ilfiyoosichi bushoo Yaaqobi, Taadiyoosi, bi aagetoyich qanaateebeeti Simooni, 19wotta Yesuusin beshiiꞌi immiti Asqorootechi Yihudi eboshine.
Yesuusinaa Beelzebulina
(Maatiyoosi 12:22-32; Luqaasi 11:14-23; 12:10)
20Aroyee gubb Yesuusi kexooch giyiye. Biinnaa bi dabbeenaꞌona maayoon boonoshi maayemmi saatoon boonoshi muccemmi wottoon dofee asheenaꞌo ceenniꞌi iritiiheete. 21Yesuusichi xibeenaꞌo ishin waayeꞌi, “Bi mullo shaddeetone” iꞌi biin yeshoyich waaheete.
22Wotta Yerusaalemee waati Muusichi Sheeree dojjechinaꞌo “Yinnee taatoo Beelzebuli#3:22 Beelzebuli, Sheexaanoo woyee daabiloosi ceekkeebeeti shigoone. bi toommooch beetone. Ebiyee yinnee taatoochi giidoonane yinnoon asheenaꞌo toommoochee bi yookkiibeeto” iyeete.
23Ebich Yesuusi boonoshin bi waan ceeggiꞌi shaahiyoona ishichiye: “Sheexaanoo Sheexaanoon aabichiꞌi yoohon hakkehe? 24Ikke taatoochi showee daggooch beeti asheenaꞌo boonoshinaa boonoshina kaareꞌi boonoshi shacegaata, are taatittinee neexoon hakkaachane. 25Wotta ikke kechi asheenaꞌo boonoshinaa boonoshina kaareꞌi boonoshi shacegaata, are kexo neexoon hakkaache. 26Ebiyoommon Sheexaanoo bi taatittinee toommooch ginoon tiijjiꞌi biichinaꞌon bi shaci gaata, bi taatittineechee kindishalli bi gettemmo bi taatittine neexoon hakkaachane. 27Wotta ikke giidechi uroo kexon tiichii giyiꞌi shiichii biin cuyaanoon bi gijjoon daamon hakkemmi asho koniyoona aalloone. Bi cuchitoyee gubb bi gijjoo bullin daammiye. 28Iberoon ittoshich gettoye: Asheenaꞌo shuuneebeeti axaaxoonaa boonoshi naageebeeti naago bullina maareyemmone. 29Tunebaani Yaafe Ayaanoon naaggii beeto bulli, bulli yemeenee axaaxee hiishoo bi toommooch tunehalli, ciroona maaroon daneyaachemmone” iye.
30Yesuusi ishichiꞌi bi gettiti naboo, “Yinno bi toommooch beetone” iꞌi boonoshi gettitoyichiye.
Yesuusichi Indeenaa Bi Maneenaꞌona
(Maatiyoosi 12:46-50; Luqaasi 8:19-21)
31Aroyee gubb Yesuusichi indeenaa bi maneenaꞌona waaꞌi maaxooch neexeechii biin wochiiheete. 32Arooba dofee asheenaꞌo biin giichii guuddiꞌi kotee beeheete. Boonoshi daggoochee ikkikkeenaꞌo “Ne indeenaa ne maneenaꞌona maaxooch neexeechii neenna daneya qaawii beetinaꞌone” iyeete.
33Biyoo wochiꞌi, “Ta indee aabine? Ta maneenaꞌochi aaboshine?” iꞌi echehe.
34Biin giichiꞌi kotee beetinaꞌon ciinnii kochii bekkiibee, “Ta indeenaa ta maneenaꞌona eboshine. 35Taach manoo, maneenaa indeena Yeerichi daaggoon ceechii beetinaꞌo bulline” iye.
ទើបបានជ្រើសរើសហើយ៖
Maariqoosi 3: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.