Maariqoosi 2
2
Bi Ashittino Qititi Uroon Yesuusi Wodiyoo
(Maatiyoosi 9:1-8; Luqaasi 5:17-26)
1Giisheche aaboyee gubb Yesuusi Qifirinaahi katemooch wotteꞌi kexooch bi beemon asheenaꞌo waayeheete. 2Bekkech waa, kexonaa maaxonooch ceenniꞌi kiceeheete; Yeerichi qaaroon Yesuusi boonoshich gettiye. 3Bi gettii beetaa, asheenaꞌo awudde asheenaꞌona shaaꞌeeti, bi ashittino qititi ikke uroon deebiyeete. 4Kiceeti asheenaꞌo meettitoyich Yesuus waan shakkiyoyich gommon mucceheete. Ebich bi beeti kechi aafoon happiꞌi ashittino qititi uroon shaaꞌoona kindiiheete. 5Yesuusiyoo bi toommooch mulloon boonoshi tooꞌiyoon beeggiꞌi, ashittino qititi uroon “Ta bushoocho, ne axaaxoo maareetone” iye.
6Areegaata Muusichi Sheeree dojjechinaꞌo daggoochee ikkikkeenaꞌo arooch koteꞌi beeheete; boonoshiyoo boonoshi mulloona 7“Hini uro amoyich ishichiꞌi gettiye? Ebi Yeerin naagone. Ikke Yeeriyee damba ashi axaaxoon maaroon hakkemmo konine?” iꞌi gabiyeete.
8Boonoshi mulloona ishichii boonoshi gaboon bekkech Yesuusi bi mulloona ariiꞌi, “Ebin amoyich gabiyote? 9Ashittino qititi uroon ‘Ne axaaxoo maareetone’ getonaa ‘Tiyi ne shaaꞌoon shaagiree hambe’ getonoochee kettoo aabine? 10Tunetaa Ashi Bushoo hini showee toommoochaa axaaxoon maaroyich hakkoo biich beemon ittoshi ariyemmoyich” iꞌi, 11bi ashittino qititi uroon “Hini uroocho, and tiyi ne shaaꞌoon shaagiree ne kexooch hambe” iye. 12Ashittino qititi uro bekkech tiyii bi shaaꞌoon shaaggiꞌi asheenaꞌo beeggii beetaa, kexoochee kechiye. Ebich asheenaꞌo bulli worganeebee, “Ebiyoommi mooyon beeggaa ariyaano noone” iꞌi Yeerin oogiiheete.
Lewin Yesuusi Ceego
(Maatiyoosi 9:9-13; Luqaasi 5:27-32)
13Wotta Yesuusi baharee gashooch hammiye. Dofee asheenaꞌo bi waan waataa dojjii beehe. 14Aroochee aroona besheebee, qaraxo kucheebeeti gabberooch koteebeeti Ilfiyoosichi bushoo Lewin ciinniꞌi, “Taan dabbibe” iye. Aroo tiyiꞌi biin dabbiye.
15Aroyee gubb Yesuusi Lewi kexoochaa maayoon maa bi beetaa, meeti gabiyee guudeenaꞌonaa#2:15 Gabiyee guudeenaꞌo, qarexoon maciibeeti asheenaꞌone. axaaxechinaꞌona biinnaa bi dabbeenaꞌona tookkii maa beeheete; eboshi daggoochee biin dabbitinaꞌo meetinaꞌone.
16Arooba Muusichi Sheeree dojjechinaꞌonaa Fariseenaꞌona Yesuusi gabiyee guudeenaꞌonaa axaaxechinaꞌona tookkii maa bi beetaa beeggiꞌi, bi dabbeenaꞌon “Gabiyee guudeenaꞌonaa axaaxechinaꞌona tookkii amoyichiye maa uchii bi beeto?” iꞌi echeheete.
17Yesuusi ishin waayeꞌi, ishichiye: “Biiyechinaꞌoyichalli wodeenaꞌoyich aakumo qaawiyaache; axaaxechinaꞌonalli cadiqeenaꞌon ceegoyich waataano taane” iye.
Coomeechon Yesuusi Echeyoo
(Maatiyoosi 9:14-17; Luqaasi 5:33-39)
18Arooba Yowannisi dabbeenaꞌonaa Fariseenaꞌona coomii beeheete. Asheenaꞌo waaꞌi Yesuusin “Yowannisi dabbeenaꞌonaa Fariseenaꞌochi dabbeenaꞌona coomii beetaa, ne dabbeenaꞌo amoyich coomaacheete?” iꞌi echeheete.
19Yesuusiyoo ishichiꞌi wochiye: “Woꞌee keno boonoshina tookkiꞌi bi beetaa, miyaateenaꞌo coomeheete? Woꞌee keno boonoshina tookkii bi beetaa, coomoon hakkaacheete. 20Tunebaani woꞌee keno boonoshi waanee bi baremmi aabo woyemmone; are aabooba coomemminaꞌone.
21“Ebiyee geene tahooch andire xefoon xefeebeeto aalloone; bi xefegaata, andire xefo geene tahoon kushi yeshiree beshoon keexxemmone. 22Ebiyee wotta geene mollexxooch gaare woyinee uyoon kotiyemmi asho aalloone. Bi kotiigaata, are gaare woyinee uyo kashi gaata, mollexxoon gaakkemmone; uyoo ufemmone; mollexxoo duubemmone. Tunebaani gaare woyinee uyoon andire mollexxoochiye bi kotiibeeto” iye.
Ayihudeenaꞌochi Shambeteechon Yesuusi Echeyoo
(Maatiyoosi 12:1-8; Luqaasi 6:1-5)
23Ikke areddoon, shambetee aabooba Yesuusi moocheti teepphee daggoona beshee bi beetaa, bi dabbeenaꞌo hammiibee teepphee moochoon kuxxii beeheete.#Yibba. 23:25 24Fariseenaꞌo Yesuusin “Eke ebin ciine! Shambetoona Muusichi Sheeroo bajjiton amoyichiye boonoshi shuuneebeeto?” iꞌi echeheete.
25Yesuusiyoo “Daawitinaa biinna tookkii beetinaꞌona shaaceꞌi iriteetaa, Daawiti aabichii bi ito gaata shemmeyaachote? 26Abiyataari qeeshee guudo tuneꞌi bi beetaa, Daawiti Yeerichi kexooch giyiꞌi, qeesheenaꞌoyee damba bare asho maataachemmoyich Muusichi Sheeroo bajjiti yaaree koshon tiijjiꞌi maahe; biinna tookkii beetinaꞌoyichoo wotta aroochee immiye”#1 Saam. 21:1-6 iꞌi gettiye.
27Daakkiꞌi, “Yeeri ‘Shambetoo ashich qaawiihe’ iꞌi shambetoon bariihalli, ‘Asho shambetoyich hajjeebe’ iꞌi ashoon hallaanoone. 28Ebiyee Ashi Bushoo shambetoyichona Doonone” iye.
ទើបបានជ្រើសរើសហើយ៖
Maariqoosi 2: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.