Maariqoosi 4
4
Yaree Shaahiyoo
(Maatiyoosi 13:1-9; Luqaasi 8:4-8)
1Bare aaboon wotta Yesuusi baharee gashoochaa dojjooch giyiye. Arooba dofee asheenaꞌo bi waan boonoshi kiceetoyich, baharee toommooch beeti giishi markabeech kechiꞌi kotehe. Baharee gashooch beeti showooch tuneꞌi waayeebeeti asheenaꞌo bullich 2meeti mooyon shaahiyoona dojjiye. Arichiibee ishichiye: 3“Ellebote, ikke yaree shookkecho shookka kechiye. 4Shookkii bi beetaa, ikkikkoo gommi gashooch holliye; aroon kafeenaꞌo waa maciꞌi maaheete. 5Baroo maacaa xaqqechi showooch holliye; showoo giishetoyich kaatee collehe. 6Tunetaa aabo michimmona shoolliye; cammon awuro bi qajjitoyich shuuqqiye. 7Baroo wotta angichi xuppo beeti showooch holliye; are angichi xuppoo naaxii kechiꞌi maahe; aafeyaanoonoo dobbehe. 8Baroo wotta qeemi showooch holliꞌi collehe; diccii kechiꞌinoo, ikkoo shaashe aafoon, ikkoo shiche aafoon, ikkoo balle aafoon aafehe” iye.
9Ciiroochaa Yesuusi boonoshich “Waayeebeeti waajjecho waayebe” iye.
Bi Dabbeenaꞌo Echeton Yesuusi Wochoo
(Maatiyoosi 13:10-17; Luqaasi 8:9-10)
10Yesuusi asheenaꞌo waanee barimmona aaraa gutte bi dabbeenaꞌonaa bi guudoona beeti bare asheenaꞌona ebi shaahiyeechon biin echeheete.
11-12Yesuusiyoo boonoshich ishichiye: “Yeeri bi taatittinee maacee mooyon ittoshich arichiitone; tunetaa bareenaꞌoyich bulli mooyo shaahiyoona bi getteebeeto,
‘Ciinibee boonoshi beegaachemmoyich,
waayebee boonoshi shalligaachemmoyich,
Yeer waan boonoshi wotteyaachemmoyich,
boonoshi axaaxoo bi maareyaachemmoyichiye’#Isi. 6:9-10” iye.
Yaree Shookkechochi Shaahiyoon Biichiꞌi Yesuusi Geto
(Maatiyoosi 13:18-23; Luqaasi 8:11-15)
13Yesuusi daakkiꞌi ishichiye: “Hini shaahiyoo ittoshi mullooch giyaache? Ishigaata, bare shaahiyoon aabichiree ariyehote? 14Yaree shookkecho Yeerichi qaaroon shookkiye. 15Shookkii bi beetaa, gommi gashooch holliti yaroon shaahii beetinaꞌo Yeerichi qaaroon boonoshi waayemmona, bekkech Sheexaanoo waaꞌi hini are boonoshi waayeti qaaroon boonoshi mulloochee maciꞌi daammiibeeti asheenaꞌone. 16Wotta maacaa xaqqechi showooch holliti yaroon shaahii beetinaꞌo Yeerichi qaaroon waayeꞌi emiriibee bekkech iberiitinaꞌone. 17Tunetaa cammon yeshaaneenaꞌo boonoshi tunetoyich yagaachemminaꞌone; Yeerichi qaaree naboona iritoo woyee duꞌo waahooba bekkech giinnii dihechinaꞌone. 18Ebiyoommon wotta angichi xuppo beeti showooch holliti yaroon shaahii beetinaꞌo Yeerichi qaaroon boonoshi waayetaa, 19hini showeexi beemon gaboo, gijjee shaawona dacheyoonaa baribare mooyon dakoona boonoshi mullooch naaxiꞌi boonoshi waayeti qaaroon maahe. Ebichi naboona aafeyaanoon dobbeꞌi echeheete. 20Ebiyoommon wotta qeemi showooch shookketi yaroon shaahii beetinaꞌo Yeerichi qaaroon waayee iberiitinaꞌone. Boonoshiyoo aafoon aafeheete; ikkoo shaashe aafoon, ikkoo shiche aafoon, ikkoo balle aafoon aafehe” iye.
Gafetoona Guuppeeti Ceechoo
(Luqaasi 8:16-18)
21Wotta Yesuusi boonoshich ishichiye: “Asho ceechoon bi ceechiibeeto, gafetoon bi toommooch guufoyich woyee qeechi dambooch kotiyoyichiye? Bekkooch kotiiya toone? 22Aacheeto bulli xalla keyo, qereeto bulliyoo gaxxeyoo echeyaani mooyone. 23Illa waayeebeeti waajjecho koniyoona waayebe” iye.
24Wotta Yesuusi boonoshich ishichiye: “Elleree waayebote; ashich ittoshi qeellee (shafirii) beetoommon Yeeri wochiree ittoshich qeellemmone; beshoon daakkiree ittoshich immemmone. 25Beetoyich daakkaa ichemmone. Tunetaa amolla aallo waanee biich beeti giishechewolla tiijjeyemmine” iye.
Colleꞌi Dicciibeeti Yaree Shaahiyoo
26Yesuusi daakkiꞌi ishichiye: “Yeerichi taatittine bi goyooch yaroon shookkiti ashoon shaaheene. 27Uro xumetaa tokketehe; haraa tiyiye. Cir ariyaan bi beetaa, bi shookkiti yaroo colleꞌi dicciye. 28Showee colliiꞌa shiichii colloon, gubb shehoon, shehee hillooch moochoon immahan. 29Daꞌaa bi shuuꞌi gaata, qecoyich bi bedditoyich magaadoon yechiꞌi qecciye” iye.
Shanaafee Aafee Shaahiyoo
(Maatiyoosi 13:31-32,34; Luqaasi 13:18-19)
30Aroyee gubb Yesuusi ishichiye: “Yeerichi taatittine am shaaheene getona? Woyee amee shaahiyoona bekkiibona? 31Shanaafee aafeyoommine. Areyoo showee toommooch bi shookkaa beehooba, bare maayi yaroo bulliyee giishecheene. 32Tunebaani shookkaꞌa collaa bi diccehooba daaddeexi maayeenaꞌo bulliyee besheene. Shimaajji kafeenaꞌo waaꞌi bi atooch kotee bi yiirooch kashoon boonoshi hakkimmi wottoon ogooge atoon atahane” iye.
33Yesuusi asheenaꞌo xiishii waayoon boonoshi hakkimmi wottoon eboshiyoommi meeti shaahiyeenaꞌona Yeerichi qaaroon gettii beehe. 34Ikke mooyonona shaahiyaalloon getaanoone. Biinnaa bi dabbeenaꞌona ikkeeto tunehooba, shaahiyeenaꞌo bullin boonoshich biichiꞌi gettii beehe.
Aachi Aayo Shashewimo
(Maatiyoosi 8:23-27; Luqaasi 8:22-25)
35Arooba xum Yesuusi bi dabbeenaꞌoyich “Baharee beqach kimbone” iye. 36Asheenaꞌo waanee bariiꞌi Yesuusin bi koteti markabeena daammiyeete. Bare markabeenaꞌo wotta tookkii beetinaꞌone. 37Hammii boonoshi beetaa, giidechi yubee yongo bi tiyitoyich markabeech aaco ceenn beddimmi wottoon aachi aayo markabeen yexxiye. 38Arooba Yesuusi markabee gubbi ciireexi duꞌooch qoyoon qoyeꞌi tokketeton bi dabbeenaꞌo tiijjiꞌi, “Dojjechocho, baharoona no manjeyo neen ayinikkaache?” iyeete.
39Yesuusi tiyiꞌi yongoon noggehe; baharoonoo “Cikkibe; shuuraaye” iye. Yongoo bekkech neexehe; bulli mooyoo shashewimiye.
40Ebiyee gubb, Yesuusi bi dabbeenaꞌon “Amoyichiye eechiꞌi ittoshi shattiibeeto? Yeerin gibeneyaachote?” iye.
41Arooba bi dabbeenaꞌo oogichii shattiꞌi boonoshinaa boonoshina “Yongoonaa baharoona biich deꞌa ii beeti hini am shaahe ashoone?” iyeete.
ទើបបានជ្រើសរើសហើយ៖
Maariqoosi 4: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.