Maariqoosi 1
1
Aacona Afaallechi Yowannisi Gettiti Wocho
(Maatiyoosi 3:1-12; Luqaasi 3:1-18; Yowannisi 1:19-28)
1Yeerichi Bushoo Yesuus Kiristoosichon miixeebeeti mishiraachee qaaro hinine. 2Shiichiꞌi Yeeri wocheti keemechi Isiyaasi ishichiye:
“Yeeri ‘Ebiyoche, ne gommon qaxxemmi ta wocheyechon
neyee shiichiree daachiyemmo taane’ itone.#Milik. 3:1
3‘Doonochi gommon qanniibote;
bi woretoonoo kaachi qaxxebote’
iibee barahoochaa cookiibeeti ashi qaaro”#Isi. 40:3
iꞌi kooritone.
4Ebich Aacona Afaallechi Yowannisi barahoochaa aacona afaalliibee, “Ittoshi axaaxee gommoochee Yeer waan wotteree aacona afaalleebote; Yeeriyoo ittoshi axaaxoon maaremmone” iꞌi dojjiibee waahe. 5Arooba Yihudee showoonaa Yerusaaleminoochee dofee asheenaꞌo bi waan waa beeheete; boonoshi axaaxoon aannii boonoshi miixetaa, Yowannisi boonoshin Yoordaanoosi aacona afaallii beehe. 6Biyoo gaalee eexoochee shippeti qoreddoon taheꞌi gooqqoochee shuuneeti shachoon cuyee beehe; gecheenaa bobbiyee eeyonon maa beehe. 7Wotta arooba “Yittaꞌa bi caammee cuyoon biich ta bedaani tayee besho ta hillooch waa beetone. 8Ta ittoshin aacona afaalliyoye; tunebaani aroo ittoshin Yaafe Ayaanoona afaallemmone” ii gettii beehe.
Yesuusi Aacona Afaalleyoonaa Sheexaanoo Biin Gondoon Shuuniiya Qiiccoona
(Maatiyoosi 3:13–4:11; Luqaasi 3:21-22; 4:1-13)
9Arooba Yesuusi Galiilee showooch beeti Naazireetee waaꞌi, Yowannisina Yoordaanoosi aacoochaa afaalleehe. 10Bekkech Yesuusi aacoochee bi kechimmona, shimaayoo qecheeꞌi Yaafe Ayaano bi ashittinee halloo uggechoommon tuneꞌi Yesuusi toommooch bi kindoon Yowannisi beeggiye. 11Wotta shimaayoochee “Ta shuni bushoo neene; neenna emirito taane” ii beeti qaaro waayeehe.
12Bekkech Yaafe Ayaano Yesuusi barahooch hammemmoyich tuniihe. Yesuusiyoo hammiꞌi, 13cooxinaꞌo beeti barahoochaa Sheexaanoo gondoon biin shuuniiya qiiccee bi beetaa, aabbe qemon kotehe. Maraakeenaꞌoo waaꞌi biin gaachee beeheete.
Haashe Yeshe Awudde Asheenaꞌon Yesuusi Ceego
(Maatiyoosi 4:12-22; Luqaasi 4:14-15; 5:1-11)
14-15Yowannisi yeshaa cucheetoyee gubb, Yesuusi Yeerichi mishiraachee qaaroon gettiibee, “Yemeeno katinnitone; Yeerichi taatittine ittoshi kellooch shaggetine; ebich ittoshi axaaxee gommoochee Yeer waan wotteree, Yeerichi wocho tuneti mishiraachee qaaroon iberiibote” iibee Galiilee showooch waahe.
16Yesuusi Galiilee baharee gashoona besheebee, haashoon yechiibeeti gutte maneenaꞌo Simooninaa Indiriyaasina haashe yeshe dabboon baharooch boonoshi duppii beetaa ciinniye. 17Arooba Yesuusi “Ta hillooch wobote; haashoon ittoshi yeshoommon ashoon yeshiree ta waan ittoshi deebemmoyich tuniyemmo taane” iye. 18Boonoshiyoo bekkech dabboon duppiichii biin dabbiyeete.
19Wotta aroochee giishechoon besheꞌi Zebidiyoosi bushiisheenaꞌo gutte maneenaꞌo Yaaqobinaa Yowannisina giishi markabee toommoochaa, keexeti boonoshi dabboon boonoshi shippii beetaa ciinniye. 20Bekkech “Ta hillooch wobote” iꞌi ceeggiye. Boonoshiyoo boonoshi nihoo Zebidiyoosin gijjoo qocaa shuuneebeeti asheenaꞌona tookkii are markabeech duppiichii biin dabbiyeete.
Yinneenaꞌon Ikke Uroo Toommoochee Yesuusi Yooho
(Luqaasi 4:31-37)
21Yesuusinaa biin dabbii beetinaꞌona Qifirinaahi katemooch shaggiyeete. Aroyee gubb shambetoo shagaa, Yesuusi Ayihudeenaꞌo kiceebeeti kexooch giyiꞌi dojjiye. 22Boonoshich bi dojjito sheeroon immiibeeti taatoochoommonalli, Muusichi Sheeree dojjechinaꞌo dojjii beetoommon toonoone. Ebinoo waayetinaꞌo bi dojjiti doyoona worganeheete. 23Arooba Ayihudeenaꞌo kiceebeeti kexooch yinno bi toommooch beeti uro beehe. 24Biyoo “Naazireetechi Yesuuso, no mooyooch neen amo geddiye? Noon goochiiya waanne? Koni ne gaata ariibeeto taane; Yeerichi yaafoo neene” iꞌi cookiye.
25Yesuusi tiyiꞌi, “Ne noonoon yeshe; uro toommoochee tibe” iꞌi noggehe. 26Yinnoo nagixiiꞌi oogichii cookii bi itoyee gubb uro toommoochee tiyiye.
27Ebin beeggiti asheenaꞌo bulli “Ebi amoone? Doonjittinoona yinneenaꞌon noggehe; boonoshiyoo biich deꞌa iyeete. Hini bi dojjiibeeto andire doyoone” iꞌi boonoshi echeemmi wottoon oogichiꞌi worganeheete. 28Bekkech bi shigo aree guudoona beeti Galiilee showoo bulliich waayeehe.
Meeti Biiyechinaꞌon Yesuusi Wodiyoo
(Maatiyoosi 8:14-17; Luqaasi 4:38-41)
29Yesuusi wotta Ayihudeenaꞌo kiceebeeti kexoochee kechiꞌi Yaaqobi, Yowannisinaa bare asheenaꞌona tookkii gutte maneenaꞌo Simooninaa Indiriyaasinochi kexooch giyiye. 30Simoonichi amaatee achee gaamee biiyoona biiyaꞌa qeyaa bi beemon bekkech Yesuusich gettiyeete. 31Ebich Yesuusi qeyaa bi beetooch hammii ureen kishoona yechii tiijjiꞌi kotiihe; bi achee gaamoo bekkech aqqehe; tiyaa maayoon boonoshich giddiihan.
32Xumee aabi-gimooch biiyechinaꞌonaa yinno boonoshi toommooch beeti asheenaꞌo bullinon Yesuus waan deebiyeete. 33Are katemooch beeti asheenaꞌo bulli waaꞌi Yesuusi beeti kechi kellooch ceenniyeete. 34Baribare giidechi biiyoona biiyeti meeti asheenaꞌon wodiihe; wotta meeti yinneenaꞌon asheenaꞌo toommoochee yookkiye. Yinneenaꞌoo biin arii beetinaꞌo boonoshi tunetoyich, amoonolla boonoshi yibbaatemmoyich daaggaanoone.
Barahoochaa Yesuusi Corootoo
(Luqaasi 4:42-44)
35Maaddoona, showoo batt haraan beetaa, Yesuusi tiyii ikke qere xaaꞌooch hammiꞌi aroochaa corootiye. 36Aree hillooch Simooninaa biinna tookkii beetinaꞌona tiyiꞌi biin qaawiibee bi beetooch shaggiyeete. 37Yesuusin daneꞌi, “Asheenaꞌo bulli neen qaawii beetinaꞌone” iyeete.
38Yesuusi wochiꞌi, “Ta waato Yeerichi mishiraachee qaaroon bechoyich bi tunetoyich, katinooch beeti bare katemooch hambone” iye. 39Aroyee gubb Ayihudeenaꞌo kiceebeeti kexooch Yeerichi qaaroon gettiibee, yinnoon ashi toommoochee yookkiibee Galiilee showoo bulliich beddiye.
Qeddee Shaddee Biiyechi Uroon Yesuusi Wodiyoo
(Maatiyoosi 8:1-4; Luqaasi 5:12-16)
40Ebichi hillooch qeddee shaddee biiyechi uro Yesuus waan waa guteneꞌi, “Ne daaggigaata, taan wodiyoon hakkihine” iꞌi qollehe.
41Yesuusi ariqqeꞌi bi kishoon yaggii yechiichii, “Daaggiyoye, wodibe” iye. 42Bi ishichimmona, uro bekkech qeddee shaddee biiyoochee wodiye.
43-44Are woditi uroon Yesuusi “Ebin konichona kachaahine; ne qelloon ariibe! And hamiree ne aahittinoon qeeshoyich bekkiibe; ne wodoon asheenaꞌo bulli xiishemmoyich, Muusi bi sheerooch deejjibote iꞌi bi kooriti deejjoon Yeerich deejjibe” ii kupphii gettiꞌi daachiihe. 45Tunetaa hini are uro hammiꞌi xalla yibbaatoonaa woroonooch giyiye. Ebichi naboona Yesuusi xalla bekkeꞌi katemee daggooch gimo biich iritoo tunehe; tunebaani katemoyee maach barahooch beehe; arooch bi beetaa, bulli xaaꞌoochee asheenaꞌo bi waan waa beeheete.
ទើបបានជ្រើសរើសហើយ៖
Maariqoosi 1: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.