Maariqoosi 12
12
Woyinee Quyechinaꞌochi Shaahiyoo
(Maatiyoosi 21:33-46; Luqaasi 20:9-19)
1Daakkiꞌi Yesuusi shaahiyoona ishichiꞌi getooch giyiye: “Ikke uro woyinee aafoon aafeebeeti meeti woyinoon bechiye; bi guudoon xaqqoona uxerehe; woyinee hiicci oppoon iijjiye; dilaaloon shuunehe. Aroochee shiimemmi quyechinaꞌoyich quyiichii bare showooch hammiye. 2Woyinee aafee gooroo shagaa, ‘Woyinee aafoon qoodeeree ta qoodoon deebe’ iꞌi ikke bi guunon woyinee quyechinaꞌo waan wochehe. 3Boonoshiyoo are bi guunon yechii xoobbiꞌi shokke kishoon wochii daachiiheete. 4Daakkiꞌi bare guunon boonoshi waan bi wochetaa, boonoshiyoo bi qelloon xaqqoona yexxii gaakkiꞌi coonee wochiyeete. 5Wotta baroon wochehe. Boonoshiyoo wuxiyeete. Bi wocheti bare meetinaꞌo daggoochee ikkikkeenaꞌon xoobbiyeete; bareenaꞌonoo wuxiyeete.
6“Ebiyee gubb, woyinee doonoyich ikke bi shuni bushoo ikkeeto echehe. Ciiroochaa ‘Ta bushoon oogiyemminaꞌone’ iꞌi bi bushoon boonoshi waan wochehe.
7“Tunebaani are woyinee quyechinaꞌo boonoshinaa boonoshina ‘Bi woraasho hinine. Ittoshi waataa wuxibone. Hini bi iristo noocho tunemmone’ iyeete. 8Ebina bushoon yechiꞌi wuxiyeete; woyinee uxeree maach bi dubenoon kichii duppiyeete.
9“Arooba woyinee doono aabichehe? Bi hajjee baatoona woyinee quyechinaꞌo waan hamiree boonoshin aalliyemmone. Woyinee goyoonoo bare quyechinaꞌoyich immemmone.
10-11“Illa
‘Gimbenyeenaꞌo hoxee duppiti xaqqo,
aroo kexon deggii neechiibeeti giimbee guummon tunetone.
Ebinoo Doono Yeeri tuniitone;
hini mooyo no beeggich worganikkito tunetone’
ii beeton Yaafe Macaafoochee shemmeyaachote?” iye.
12Ayihudee iraasheenaꞌo ebi shaahiyoona bi gettiibeeto boonoshin bi tunoon ariiꞌi Yesuusin yecha qaawiyeete; tunebaani asheenaꞌon shattiꞌi qajjii hammiyeete.
Qesaarich Qaraxee Qoco
(Maatiyoosi 22:15-22; Luqaasi 20:20-26)
13Ebiyee gubb, Yesuusichi noonoochee muricoon boonoshi danemmoyich, Fariseenaꞌonaa Heroodisinochi asheenaꞌona daggoochee ikkikkeenaꞌon bi waan wocheheete. 14Wocheetinaꞌo waaꞌi Yesuusin “Dojjechocho, ashoon giisho oogoo getaanoon iberoon Yeerichi gommon dojjaabeeto neene. Ebich ibere moochecho, konichona beshii shappii dabiyaano ne tunoon ariibeeto noone. Illa Qesaarich#12:14 Qesaari, Roomi taatoone. qaraxee qocon Muusichi Sheeroo daaggiibeetee, daaggaache? Qaraxoon qoconaa woyee qoccaayona?” iꞌi echeheete.
15Tunetaa Yesuusi boonoshi noonee noocon ariiꞌi, “Amoyich taan muriciiya qaawii beetote? Eke ikke diinaaroon taach deebi bekkiibote” iye. 16Boonoshiyoo deebii biich boonoshi bekkiitaa, “Hini gijjee toommooch beeti malletoonaa kooreeti shigoona konichone?” iꞌi echehe.
Boonoshiyoo “Qesaarichone” iꞌi wochiyeete.
17Yesuusi wochiꞌi, “Ishigaata, Qesaarichon Qesaarich, Yeerichon Yeerich imbote” iye.
Boonoshiyoo bi yibbaateti mooyon worganeheete.
Qitoyee Gubb Shaago Woyee Shaakkeyoo Aallo Bi Tuno
(Maatiyoosi 22:23-33; Luqaasi 20:27-40)
18Wotta “Qititinaꞌo tiyaachemminaꞌone” ii beeti Saduuqeenaꞌo daggoochee ikkikkeenaꞌo Yesuus waan waaꞌi ishichii echeheete: 19“Dojjechocho, Muusi ‘Ikke uro mecheen shaaggiꞌi bushoon shiyaanoon bi qitigaata, bi manoo are ureen shaagiree qititi bi manoyich bushoon keribe’#Yibba. 25:5-6 iꞌi Sheeree Macaafoochaa nooch kooritone. 20Ebiyoommon shabaatte maneenaꞌo beeheete; boonoshi daggoochee qaabboo mecheen shaaggiꞌi bushoon shiyaanoon qitiye. 21Ebina bi hilloo woraashiꞌi wotta shiyaanoon qitiye. Bi keejjinnoo woraashiye; biyoo ebiyoommon qitiye. 22Shabaattee ciireexooch beddaahaa bulli ureen woraashiꞌi bushoon shiyaanoon qitii ciireheete. Bulliyee gubb ure wotta qitiyan. 23Illa hini shabaatteenaꞌo are ureen shaaggitinaꞌone. Ebich qititinaꞌo tiyiyooba ebi ure mechee bi tunemmo aabichiye?” iꞌi echeheete.
24Yesuusi wochiꞌi ishichiye: “Yaafe Macaafo gettii beetonaa Yeerichi giidoonon ittoshi tuushitoyich muricciyote. 25Qititinaꞌo tiyiyooba, boonoshi tunemmo shimaajji maraakeenaꞌoommonalli shaagaacheete; shaakkeyaacheete. 26Qititinaꞌochi timon, Yeeri tushee qaaqqee daggoochaa Muusich amoon bi gettito gaata, Muusi kooriti macaafoochee shemmeyaachote? Ebiyoo ‘Ta Abrahamichi Nuggishoo, Yisaaqichi Nuggishoo, Yaaqobichi Nuggishoo taane’ ii beetone. 27Illa kashechinaꞌochi Nuggishoani qititinaꞌochi Nuggishoo toonoone. Ebich ittoshi oogichii muriccitote” iye.
Bulliyee Beshe Sheeroo
(Maatiyoosi 22:34-40; Luqaasi 10:25-28)
28 Muusichi Sheeree dojjechinaꞌo daggoochee ikkoo giddee, Saduuqeenaꞌo gajjitee beeton waayeꞌi, Yesuusiyoo gaawichii boonoshich bi wochoon beeggiꞌi, Yesuusin “Sheeroo bulliichee beshe sheeroo aabine?” iꞌi echehe.
29Yesuusi wochiꞌi ishichiye: “Bulliyee beshe sheeroo ‘Israꞌeeleenaꞌote, waayebote! Yeeri no Nuggishoo ikke Nuggishoone. 30Newoo ne Nuggishoo Doono Yeerin ceeni ne mulloona, ceeni ne kashoona, ceeni ne shalligoona, ceeni ne giidoonoo shune’ ii beetone.#Yibba. 6:4-5 31Guttinnee sheeroo ‘Neenoommi ne manoon neenna tachiree shune’ ii beetone.#Lew. 19:18 Hini gutteenaꞌoyee beshe bare sheeroo aalloone” iye.
32Hini are sheeree dojjecho Yesuusich ishichiye: “Tatoone, Dojjechocho! ‘Yeeri ikkoone; biyee damba baroo aalloone’ iyaꞌa ne getteto iberoone.#Yibba. 4:35 33Ebich asho ceeni bi mulloona, ceeni bi shalligoona, ceeni bi giidoona Yeerin shunonaa biinoommi bi manoon biinna tachiꞌi shunona micciibeeti deejjoonaa meeti bare deejjeenaꞌo bullinon Yeerich deejjoyee beshoone” iye.#Hos. 6:6
34Yesuusiyoo uro shalligiꞌi wochoon beeggiꞌi, “Ne, Yeerichi taatittinee daggoochee wokketo toono neene” iye. Ebiyee gubb, Yesuusin echoyich aafoon kuppheto koniyoona aalloone.
Muusichi Sheeree Dojjechinaꞌon Yesuusi Echo
(Maatiyoosi 22:41-46; Luqaasi 20:41-44)
35Yesuusi yaafee kexoochaa dojjiibee ishichiꞌi echehe: “Muusichi Sheeree dojjechinaꞌo ‘Kiristoosi Daawitichi bushoone’ iꞌi amoyichiye boonoshi gettiibeeto? 36Daawiti bi qelloona Yaafe Ayaano biich shalligichaa,
‘Doono Yeeriyoo ta Doonon,
“Ne etteenaꞌon ne baatee dechiich ta dichimmi wottoon
ta qannooch kotebe” itone’#Shod. 110:1
iye. 37Illa Daawiti biin ‘Doono’ itone. Ishigaata, aabichiree Daawitichi bushoo tunehe?” iye.
Ebin dofee asheenaꞌo bi waanee emiroona waayeheete.
Muusichi Sheeree Dojjechinaꞌo Waanee Bi Qelloon Quyo
(Maatiyoosi 23:1-36; Luqaasi 20:45-47)
38-39Wotta Yesuusi dojjiibee ishichiye: “Genje tahoon taheꞌi guudon, gabiyee godoochaa ‘Showooch qebona’ ii beeti diggiyoon, Ayihudeenaꞌo kiceebeeti kexoochaa genje gabberoon, gifiree kexoochaanoo oogee xaaꞌoon qaawiibeeti Muusichi Sheeree dojjechinaꞌo waanee ittoshi qelloon quyebote. 40Xuume maacheenaꞌo kexon tiichiibee cadiqo shaahi bekkeya iꞌi corootoon geechii genjii beetinaꞌone. Eboshi toommooch Yeeri beshe shattii giiriiti nalloon kindiyemmone” iye.
Ikke Girechi Xuumee Immeti Gijjoo
(Luqaasi 21:1-4)
41Yesuusi yaafee kechi daggooch gijjoo kiceebeeti qiicee aafooch koteechii, asheenaꞌo qiicee daggooch gijjoon boonoshi duppii beetaa ciinnii beehe. Meeti gaannechinaꞌo woddoon duppiyeete. 42Arooba ikke girechi xuume ure waaꞌa gutte duuden duppahan.
43Aroochee Yesuusi bi dabbeenaꞌon ceeggiꞌi ishichiye: “Iberoon ittoshich gettoye, hini qiicee daggooch gijjoon duppiti meeti asheenaꞌo bulliyee hini girechi xuume ureene beshoon duppeti. 44Bareenaꞌo boonoshich beddiꞌi echeti gijjoocheeniye deebii boonoshi duppito; tunebaani hini ure girechi bi tunetaanoona maaree bi qeyemmon echiyaanoon biich beeti bullinoo duppetine” iye.
ទើបបានជ្រើសរើសហើយ៖
Maariqoosi 12: KBRC
គំនូសចំណាំ
ចែករំលែក
ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.