Maariqoosi 11
11
Oogoona Yesuusi Yerusaalem Gimo
(Maatiyoosi 21:1-11; Luqaasi 19:28-40; Yowannisi 12:12-19)
1Yesuusinaa bi dabbeenaꞌona Yerusaalem katinniꞌi, Zayitee Michi guudooch beeti Beetifaaginaa Bitaaniyinooch shaggiyeete. Aroochee Yesuusi bi dabbeenaꞌo daggoochee gutteenaꞌon ishichiꞌi wochehe: 2“Ittoshiyoo aaf beeti gafooch hambote; hami shagiree, batt koniyoona yebbeyaani kuree bushoo tippeeꞌi beeton danemmo ittoshine; aroon biishiree deebote. 3Asho koniyoona tiyiꞌi ittoshin ‘Amoyichiye ittoshi biichii beeto?’ iꞌi bi echegaata, ‘Doonoyich bi qaaweetoyichiye. “Kaate wochiree deejjemmo taane” itone’ getote” iye.
4Boonoshiyoo hammiꞌi gommi gashooch, kechi kellooch tippeeꞌi beeti kuree bushoon danee biichii boonoshi beetaa, 5arooch neexeebeeti asheenaꞌo daggoochee ikkikkeenaꞌo “Kuree bushoon amoyichiye ittoshi biichii beeto?” iꞌi echeheete. 6Boonoshiyoo wochiꞌi Yesuusi gettiton asheenaꞌoyich gettiyeete; asheenaꞌoo cikkii qajjiyeete. 7Aroochee bi dabbeenaꞌo kuree bushoon Yesuus waan deebiyeete. Deebiꞌi bi toommooch boonoshi tahoon boonoshi gedaa, Yesuusi yebbehe. 8Arooba meeti asheenaꞌo boonoshi tahoon gommooch yaggiyeete. Bareenaꞌo wotta goyee daggeexi michi waamon kuxxii gommooch yaggiyeete. 9Aaf shiichii beetinaꞌonaa gubb dabbii beetinaꞌona yubbeebee,
“Hosaana!#11:9 Hosaana geto, “Noon wodiibe” getone; ebin getona asheenaꞌo Yeerin galletee beetinaꞌone.
Doonochi shigoona waabeeto diireebe!#Shod. 118:25-26
10Woyemmi no nihoo Daawitichi taatittine diireebuye!
Hosaana! Shimaajji shimaayooch beeti Yeeri galleteebe!”
iibee cookeeheete.
11Yesuusi Yerusaalem shaggiꞌi yaafee kexooch giyiye. Bulli mooyon guuddii bi beeggitoyee gubb showoo xumetaa aaraa gutte bi dabbeenaꞌona tookkii kechiꞌi Bitaaniya hammiye.
Balaasee Mixin Yesuusi Ufo
(Maatiyoosi 21:18-19)
12Aroobee dechara Bitaaniyee boonoshi wottee beetaa, Yesuusin shaacoo yechiye. 13Ebich waajjechi balaasee mixin wohoochaa ciinniꞌi, “Diqqich bi aafeto gaata” iꞌi are mixi beetooch hammiye. Giddee bi ciinnimmona, balaasee aafee gooroo tuno bi qajjitoyich waamoani aafo aallehe. 14Ebich balaasee mixin “Guttinnoon ne waanee aafo daneree manjeyaaye” iye. Ishichii bi geton bi dabbeenaꞌo waayeheete.
Giixechinaꞌon Yaafee Kexoochee Yesuusi Kichoo
(Maatiyoosi 21:12-17; Luqaasi 19:45-48; Yowannisi 2:13-22)
15Yesuusinaa bi dabbeenaꞌona Yerusaalem shaggiyeete. Aroochee Yesuusi yaafee kexooch giyiꞌi gabiyoo geddii kemmii kemeebeeti asheenaꞌo bullin gashee kichiye. Gijjoon shaddii beetinaꞌochi madelloon, uggoon kemmiibeeti asheenaꞌochi gabberoonoo yangiye. 16Wotta yaafee kechi godoona koniyoona qiicoon shaagiree bi besheyaachemmoyich bajjiye. 17Aree hillooch ishichiꞌi dojjiye:
“Yeeri ‘Ta kexo “Aageteenaꞌo bullichi
corootee kexo” getteyemmone’#Isi. 56:7
iꞌi bi gettito Yaafe Macaafooch kooreyaanoone? Tunebaani ittoshi bokkeenaꞌochi gofoon#Erim. 7:11 tuniito ittoshine” iye.
18Qeeshee ukkireenaꞌonaa Muusichi Sheeree dojjechinaꞌona ishin waayeꞌi, “Hini uroon aabichiree wuxibona?” iꞌi gommon qaawiyeete. Ebiyoo asheenaꞌo bulli Yesuusi dojjiti doyoona worganetoyich biin shattiꞌiniye.
19Arooba showoo xumetaa, Yesuusinaa bi dabbeenaꞌona are katemoochee kechiyeete.
Shuuqqeti Balaasee Michi Mooyo
(Maatiyoosi 21:20-22)
201 Dechara maaddoona gommona boonoshi beshee beetaa, balaasee mixi waamoochee tiijjaꞌa cammooch beddaahaa shuuqqaꞌa beetin beeggiyeete. 21Pheexiroosi shalligiꞌi Yesuusin “Dojjechocho, beeggetine? Ne uppeti balaasee mixi shuuqqetiyoche!” iye.
22Yesuusiyoo wochiꞌi ishichiye: “Ittoshi mulloon Yeeri toommooch tooꞌiibote. 23Iberoon ittoshich gettoye: Asho koniyoona mulloon guttiyaanoon bi gettimmi mooyon Yeeri tuniyemmoyich iberiiꞌi, hini geppoon ‘Waaxeree baharee gejjooch awureebe’ bi getigaata, tunemmone. 24Ebich corootoona amee mooyonona ittoshi qolleton Yeer waanee ittoshi daneto tunoon iberiibote; ittoshich tunemmone. 25Wotta corootiya ittoshi neexehooba, shimaayooch beeti ittoshi Nihoo ittoshi axaaxoon bi maaremmoyich, ittoshi shuuteti asho bullin maaribote. 26[Tunebaani bareenaꞌochi xuꞌoon ittoshi maaroo qayigaata, shimaayooch beeti ittoshi Nihoo ittoshi axaaxoon maaraachemmone]” iye.
Yesuusi Echeyoo
(Maatiyoosi 21:23-27; Luqaasi 20:1-8)
27Ebiyee gubb, Yesuusinaa bi dabbeenaꞌona Yerusaalem wotteꞌi waaheete. Aree hillooch Yesuusi yaafee kexooch giyii guuddii bi beetaa, qeeshee ukkireenaꞌo, Muusichi Sheeree dojjechinaꞌonaa geeneenaꞌona bi waan giddeꞌi, 28“Hini mooyinaꞌon ne tuniibeeto, amoochee ukkirittinoon danaꞌaaniye? Woyee hini mooyinaꞌon ne tuniyemmoyich konine neen wocheto?” iꞌi echeheete.
29Yesuusi wochiꞌi boonoshich ishichiye: “Ikke mooyon ittoshin echebone; ittoshiyoo wochigaata, ta hini mooyinaꞌon amoochee ukkirittinoon danaꞌa ta tuniyaabeeto gaata ittoshich gettemmo taane. 30Yowannisin ‘Aacona afaallibe’ iꞌi wocheto konine? Yeerinee, ashoone? Eke taach wochibote” iye.
31Arooba boonoshinaa boonoshina “Ama getona?” iꞌi echeeheete. “Yeerine no getigaata, ‘Ishigaata, bi gettiton amoyich iberiyaachote?’ getiree noon echemmone. 32Ashoone no getigaatoche?” iyeete. Ishichi boonoshi getaachemmoyich, Yowannisin asheenaꞌo bulli “Iberoon keemechone” iꞌi boonoshi gabii beetoyich asheenaꞌon shattiyeete.
33Ebich wochiꞌi Yesuusich “No ariyaano noone” iyeete.
Yesuusi wochiꞌi, “Wotta amoochee ukkirittinoon danaꞌa hini mooyinaꞌon ta tuniyaabeeto gaata ittoshich getaache” iye.
ទើបបានជ្រើសរើសហើយ៖
Maariqoosi 11: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.