Maariqoosi 13
13
Yaafee Kechi Happeyoon Yesuusi Geto
(Maatiyoosi 24:1-2; Luqaasi 21:5-6)
1Yesuusi yaafee kexoochee bi kechii beetaa, bi dabbeenaꞌo daggoochee ikkoo “Dojjechocho, hinin beeggenne? Hini xaqqeenaꞌonaa xaqqee kexinaꞌona am shaahoon ogoogeheete!” iye.
2Yesuusi wochiꞌi, “Hini ogooge xaqqee kexinaꞌon beeggaa beetine? Etto kishoona happeyaanoon xaqqo xaqqee toommooch keddeeree ebina beetaachemmoone” iye.
Yemeenee Ciiree Malletoo
(Maatiyoosi 24:3-14; Luqaasi 21:7-19)
3Ebiyee gubb, Yesuusi Yeerichi yaafee kechi ciinooch beeti Zayitee Michi guudooch kotee bi beetaa, Pheexiroosi, Yaaqobi, Yowannisi, Indiriyaasi eboshi baach Yesuus waan giddeꞌi, 4“Hini mooyo bi tunemmo aatane? Hini mooyo bulli ceenn bedon bekkiyemmi malletoo amoone? Eke nooch gete” iꞌi echeheete.
5Yesuusi wochiꞌi ishichiye: “Koniyoona ittoshin muriciyaachemmoyich ittoshi qelloon quyebote. 6Meetinaꞌo ‘Ta aroo taane’ getibee ta shigoona waaree meeti asheenaꞌon muriciyemminaꞌone. 7Ginee koyoonaa ginee woroonon ittoshi waayehooba keqqiyaahote. Ebi tuno echeyaachemmone; tunebaani yemeenee ciiro bekkech tuneyaachemmone. 8Arooba ikke aagetoo bare aagetoona, ikke showee taatoo bare showee taatoona koyemmone; baribare xaaꞌoochoo showee qewo tunemmone; shaacoo giyemmone. Eboshi bekkiibeeto batt maaxee xuuxee gimoniye.
9“Illa ittoshi qelloon quyebote; nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ta miixoo ittoshi tunemmoyich ta naboyich iraasheenaꞌonaa taateenaꞌonochi aafooch neexemmo ittoshine. 10Shiichiree mishiraachee qaaro aageteenaꞌo bullich getteyoo qaawiihe. 11Wotta asheenaꞌo ittoshin beshii imiyooba, ‘Ama gettehone?’ getiree shiichi iriteyaahote. Tunebaani areegaata Yeeri ittoshich immimmi mooyon getote. Gettemmo Yaafe Ayaanoani ittoshi toonoone.
12“Arooba manoo bi manoon, nihoo bi bushoon wuxemmi asheenaꞌoyich beshiiree immemmone; wotta bushiisheenaꞌo boonoshi niheenaꞌonaa boonoshi indeenaꞌonochi toommooch tiyiree wuxiyemminaꞌone. 13Asheenaꞌo bulli ta naboyich ittoshin shixxemminaꞌone; tunetaa ciirooch beddaahaa manjiꞌi kupphemmo wodemmone” iye.
Aalloon Deebemmi Eeꞌo
(Maatiyoosi 24:15-28; Luqaasi 21:20-24)
14“Tunebaani [keemechi Daaneeli gettiti] aalloon deebemmi eeꞌo bi neex bedaani xaaꞌooch neexetaa, beeggemmo ittoshine.#Daan. 9:27; 11:31; 12:11 (Ebiyooba shemmecho shalligibe.) Arooba Yihudee showooch beetinaꞌo geppoo beetooch maxxebeete. 15Kechi toommooch beeto ‘Kindiree kexooch beeti ta qiicoon deebona’ getiree giyaaye. 16Wotta goyee toommooch beeto bi qoreddoon deeboyich gubb wottaaye. 17Arooba yeqqefechinaꞌonaa bushoon xaachii beetinaꞌonoyich woowo! 18Ebi bulli yooyooba bi tuneyaachemmoyich corootibote. 19Arooba Yeeri showoonaa shimaayoonon hallitoochee tiijjiꞌi hanaach beddaahaa bekkeyaani, gubbichoo wotta bekkeyaachemmi xuuxo tunemmone.#Daan. 12:1 20Doono ebi are aabeenaꞌon bi qamichaan gaata, koniyoona wodaacheshone; tunebaani bi kaacciti asheenaꞌoyicha iꞌi ebi are aabeenaꞌon qamichitone. 21Arooba koniyoona ittoshich ‘Hini beege! Kiristoosi hiniich beetone’ woyee ‘Okk ebiich beetone’ bi getigaata, iberiyaahote. 22‘Taane Kiristoosi’, wotta ‘Taane keemecho’ getibee muriciyemminaꞌo tiyemminaꞌone. Boonoshiyoo ‘Nooch bi hakkeegaata Yeeri kaaccitinaꞌon muriciibone’ getibee malletoonaa gaakkechi shuunoonon shuunemminaꞌone. 23Illa bullin shiichaꞌa ittoshich getteto taane; ittoshi qelloon quyebote” iye.
Ashi Bushoochi Womo
(Maatiyoosi 24:29-31; Luqaasi 21:25-28)
24Wotta Yesuusi daakkiꞌi ishichiye: “Ebiyooba ebi are xuuxoyee gubb,
‘Aabe manderemmine;
ageneyoo aaxxeyaachemmine;
25xojjeneenaꞌo shimaayoochee hollemminaꞌone;
shimaajji giideenaꞌo shuuremminaꞌone.’#Isi. 13:10; Hiz. 32:7; Yoꞌeel. 2:10,31; 3:15
26“Arooba Ashi Bushoo ta wodde giidoonaa oogee yiiroona qubee daggoona ta waataa beeggemminaꞌone.#Daan. 7:13 27Tawoo maraakeenaꞌon wochemmo taane; boonoshiyoo hamiree awudde kelloona showee tuggoochee, shimaayee tuggoocheenoo Yeeri kaaccitinaꞌon kicemminaꞌone” iye.
Balaasee Mixo Bekkiibeeti Mooyo
(Maatiyoosi 24:32-35; Luqaasi 21:29-33)
28“Wotta balaasee mixoochee malletoon beegote. Balaasee mixo quummiꞌi atee bi waajjegaata, arooba qaawoo womon ariibeeto ittoshine. 29Ebiyoommon wotta hini mooyinaꞌo tunoon ittoshi beegiyooba, Ashi Bushoochi womo katinniꞌi kellooch shaggito bi tunoon ariibote. 30Iberoon ittoshich gettoye: Hini mooyinaꞌo bulli tuneyaanoon hini shiijjeroo besheyaachemmone. 31Showoonaa shimaayoona beshemmone; tunebaani ta qaaro besheyaachemmone” iye.
Are Aaboonaa Are Saatoonon Koniyoona Ariyee Qayo
(Maatiyoosi 24:36-44)
32“Tunetaa are aaboonaa are saatoonon Nihoo Yeeriyee damba ariibeeto aalloone. Shimaajji maraakeenaꞌo tunebeeta, Yeerichi Bushoo tuneba ariibeeto aalloone. 33Are aabo aata bi tunemmo gaata ariyaano ittoshine. Ebich qaalliree quyebote! [Corootibote!] 34Ebiyoo bi kexoochee kechiꞌi wohi gommon hammiibeeti uroommone. Aroo bi wochee bushiisheenaꞌoyich boonoshi qelli qelloona shuunoon qoodii immiichii wotta kellechon ‘Gaawichiree kelloon quyebe’ ii gettiichii hammiye.
35-36“Are kechi doono illa showoo xumeechaa tuneba xumee gutte qellimooch tuneba qaabbe baakkee kuuhooch tuneba haree gaargaarooch tuneba aata bi woyemmo gaata ariyaano ittoshine. Ebich diqqich tokketooch ittoshi beetaa, bi waataachemmoyich kuppheree quyebote. 37Ittoshich ta gettaa beetoommon bullich gettoye; kuppheree quyebote” iye.
ទើបបានជ្រើសរើសហើយ៖
Maariqoosi 13: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.