Luqaasi Gimo
Gimo
Luqaasi Kooriti Mishiraachoo bare mishiraacheenaꞌoyee, ebi geto Maatiyoosi, Maariqoosinaa Yowannisina kooriti mishiraacheenaꞌoyee genjoone. Ebi macaafoon kooriti Luqaasi “Mishiraachechinaꞌochi Shuunoo” ii beeti macaafoon wotta kooriti uroone. Luqaasi Giriikee asheenaꞌochi mooyonaa boonoshi gaboonon gaawichiꞌi ariiti uro bi tuno bekkee beetone.
Luqaasi hini macaafooch batti batt bi kooriti naboon nooch gettii beetone; ebiyoo Yesuusi shiijjeti aaboochee tiijjii shimaajj bi kechimmi wottoon hini showee toommooch bi tuniiti mooyonaa bi dojjiti mooyona ceeniree nooch bi beeyemmoyichiye. Bareenaꞌo kooriti mishiraacheenaꞌoyee beshoon ceenoonaa yaaroona Yesuusichi kashee mooyon kooritone.
Luqaasi ebi mooyon bi kooriti naboochee ikkoo Yesuusi asho bullin shunniibeeto bi tunoon bekkiyoyichiye. Wodde wottoon Kiristoosi boonoshina tookkii daneꞌi yibbaateti genneenaꞌon boonoshi shigi shigoona ceeggii kooritone. Wotta bareenaꞌoyee beshoon gaggere bushiishoochi mooyon gaminona kooritone. Beshoon shaahiyoona girechinaꞌochonaa xukketinaꞌochonon kooritone. Yesuusi iberoona beeti asho bi tunoonaa bi waato Yeerichi gommoochee aalleton qaawii daneꞌi wodiyoyich bi tunoonon Luqaasi bekkiitone (19:10).
Hini Luqaasichi Mishiraachooch shimboochee tiijjiꞌi ciirooch beddaahaa beeti aafechi mooyoochee ikkoo emiroone. Maariyami shoddeti shoddoonaa aroyee gubb wotta Yesuusi shiijjehooba maraakeenaꞌo shoddeti shoddoonoochee tiijjiꞌi, Yesuusi shimaajji kechiichaa bi dabbeenaꞌo oogeti emiroona Yerusaalem boonoshi wottemmi wottoon, hini emiroo bekkee beetone. Luqaasi qaawiibeeto, Kiristoosichi mishiraachee qaaroon getoyich, wotta bi womo axaaxee daggooch beeti hini showeexi asheenaꞌoyich gibenoonaa wodoona ikkeeton baach tuneyaanoon emiroonoo immiibeeto bi tunoon bekkiyoyichiye.
Inde Moochi Sheqqo
Shiichoo (1:1-4)
Aacona Afaallechi Yowannisinaa Yesuusinochi shiijjoonaa bushittinee yemeenoona (1:5–2:52)
Aacona Afaallechi Yowannisi shuunooch gimo (3:1-20)
Yesuusi aacona afalleyoonaa Sheexaanoo biin gondoon shuuniiya qiiccoona (3:21–4:12)
Yesuusi dojjiti doyoonaa biiyetinaꞌon bi wodiyoona (4:13–9:50)
Yesuusi wodiyecho bi tunee wochoon bi bechoo (9:51–18:30)
Yesuusichi xuuxoonaa bi yooddeyoona (18:31–23:56)
Yesuusi qitoochee timonaa shimaajj bi hamona (24:1-53)
ទើបបានជ្រើសរើសហើយ៖
Luqaasi Gimo: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.