Luqaasi 1
1
Hini Mishiraachoon Luqaasi Kooriti Naboo
1-2Iraano Teefilooso, batti batt boonoshi hajjee aafoona hini mooyinaꞌon beeggiꞌi mishiraachee qaaroon gettechinaꞌo nooch boonoshi arichiitoommon, ebiyee aaf no daggooch tuneti mooyon meetinaꞌo yaari yaaroona koorooch giyitinaꞌone. 3-4Ebich ta wotta ne doyiti mooyinaꞌo, gibeneetinaꞌo boonoshi tunoon ne ariyemmoyich, hini mooyinaꞌo bullin xepphoochee tiijjii xiishoona boshaa ta beeggetoyee gubb, yaariꞌi neech kooroo gaaweto shaahiꞌi taach bekkehe.
Aacona Afaallechi Yowannisi Shiijjemmo Shiichiꞌi Getteyoo
5Yihudee taatoo Heroodisi taatee beehooba, Yeerich maddeebeeti Abiyi guuphi daggooch Zakaariyaasi getteebeeti ikke qeeshoo beehe; bi mechee Haroonichi yareene; bi shigoo Elsabeexi getteehe.#1 Kiin. 24:10 6Gutteenaꞌoo Doonochi getoonaa qociyonoochee ikkoonolla shappayaanoon ceechii beetinaꞌone; Yeeri aafoochoo cadiqeenaꞌone. 7Elsabeexi shiyaani xaafee bi tunetoyich, bushaalleenaꞌone; ebiyeenoo geenetinaꞌone.
8Ikke areddoon Zakaariyaasi beeti guuphoyich Yeerich maddee kaallo shagaa, Zakaariyaasi Yeerich maddee bi beetaa, 9qeesheenaꞌochi doyoommon Doonochi yaafee kexooch giyiꞌi ixaanee shookki ixoo biin yechiye. 10Ixaano shookkeebeeti saatooch dofee asheenaꞌo bulli maaxooch neexeꞌi corootii beeheete.
11Arooba Doonochi maraakoo ixaanee deejjee gudoochaa qanne badd neexeꞌi biich bekkehe. 12Zakaariyaasiyoo beeggiꞌi keqqiye; oogeti shato biin yechiye. 13Tunebaani are maraakoo ishichiye: “Zakaariyaaso, shattaahine; Yeeri ne corootiti corootoon waayetone. Ne mechee Elsabeexi anaami bushoon neech shiyemmine; bi shigoonoo Yowannisi getiree shigiyemmo neene. 14Biinna emiroo, emiroona wucwucoo neech tunemmone; oogeti emiroon danemmo neene; bi shiijjo meetinaꞌon oogichi emirikkemmone. 15Biyoo Doonochi aafooch oogemmone; wotta woyinee uyoonaa mashiibeeti bare uyo bullinon uyaachemmone; shiijjeyaanoon bi indee maacooch beebee, Yaafe Ayaanoona ceennemmone.#Had. 6:3 16Israꞌeelee yoodoochee meetinaꞌon boonoshi Doono waan wochemmone. 17Biyoo ‘Doono Yeerich maddeya beddimmi aagetoon qanniibona’ getiree niheenaꞌo mulloon bushiisheenaꞌo waan, Yeerich deꞌa getaaneenaꞌonoo cadiqeenaꞌochi shalligoo waan wochoyich, Eliyaasi toommeexi ayaanoonaa giidoona bi toommooch kindaa, Doono aafooch shiichemmone”#Milik. 4:5-6 iye.
18Zakaariyaasiyoo are maraakoyich “Ebin amoona ariyehote? Ta gaata geeneto taane; ta mecheyoo geenetine” iye.
19Maraakoo wochiꞌi, “Ta Yeeri aafooch neexaabeeti Gabreeli taane; neech ta gettemmoyich, hini mishiraachoonoo neech ta bechemmoyich Yeeri taan ne waan wochetone. 20Tunebaani ne, ebi aabo ceenaa Yeeri ceechemmi, ta getteti qaaroon iberiyaache ne itoyich, hini mooyo ceennimmi aabee wottoon yibbaateyaani miimeto tunemmo neene; yibbaatoonoo hakkaachemmo neene” iye.
21Ebi bulli tunemmi wottoon asheenaꞌo Zakaariyaasin quyee beeheete; “Yaafee kechi maacooch amoyich yagiye?” iꞌi shaammiyeete. 22Aroochee kechiꞌi boonoshich yibbaatemmon mawiihe. Ebich yaafee kexoochaa yaaꞌoon beeggito bi tunoon ariiheete. Biyoo bi kishoona malletee bekkii beehe; miimeton tuneꞌi beehe.
23Yeerich bi maddeebeeti aaboon ciichiꞌi bi kexooch wottehe. 24-25Ebiyee gubb, Zakaariyaasi mechee Elsabeexi yeqqefehan; areyoo “Yeerine ebin taach tuniito; ashi aafooch ta yeellaabeeti yeelloon beeggiꞌi ta achoochee shoottitone” iyaꞌa uuche agenee wottoon maach kechaa ashoona daneyaanoon kexooch kotahan.
Yesuusi Shiijjo Shiichiꞌi Getteyoo
26Ebiyee gubb, Elsabeexi yeqqefeti shirittinnee agenooba Yeeri bi maraakoo Gabreelin Galiilee showooch beeti Naazireeti katemooch, 27Daawiti yaroochee tuneti Yooseefi getteebeeti uro shaagga bi maakkiiti ikke gidiidee waan wochehe; gidiideechi shigoo Maariyami getteehe. 28Are maraakoo bi waan waaꞌi, “Doono Yeeri gaawe aafoona ciinnitine! Diggoo neech tunebe! Doono neenna tookkii beetone. [Ne, maacheenaꞌo daggoochee diireeti neene]” iye.
29Maariyamiyoo are maraakoo gettiton waayaꞌa keqqiyan. “Ebi amee diggiyoone?” iyaꞌa bi mulloona kichii kindiiꞌa gabiyan. 30Maraakoo biich ishichiye: “Maariyame, shattaahine! Yeeri gaawe aafoona neen ciinnitone. 31Yeqqeferee anaami bushoon shiyemmi neene; bi shigoonoo Yesuusi getiree shigiyemmi neene. 32Biyoo oogoo tunemmone; Beshoo Yeerichi Bushoo getteyemmone; bi qaabbechi taatoo Daawitichi taatee qeenonoo Nuggishoo Doono Yeeri biich immemmone. 33Biyoo bulli yemeenoon Yaaqobichi yaroo toommooch taatemmone; bi taatittinoyich ciiro aalloone”#Isi. 9:6-7 iye.
34Maariyamiyoo are maraakoon, “Anaamona danaa ariyaache; ebi aabichiree tunehe?” iyaꞌa echahan.
35Wotta hini are maraakoo wochiꞌi ishichiye: “Yaafe Ayaano ne toommooch woyemmone; Beshoo Yeerichi giidoo ne toommooch yiiremmone; ebich wotta ne shiyemmi bushoo yaafoo getteyemmone; ‘Yeerichi Bushoo’ getteyemmone. 36Ebiyoommon ne xibee Elsabeexiyolla wotta geenoochaa anaami bushoon yeqqefetine; xaafee getteeti and bi yeqqefeto shirittinnee agen bedditone. 37Yeerin mawemmi mooyo amolla aalloone” iye.
38Maariyamiyoo wochaꞌa, “Ne getteto tunebe; tawoo Yeerichi gonnee taane” iyan. Hini are maraakoo bi waanee wotteꞌi hammiye.
Elsabeexin Beegga Maariyami Hamo
39Arooba Maariyami tiyaa Yihudee showeexi geppechi katemooch kaataꞌa hammahan. 40Zakaariyaasi kexooch giyaꞌa Elsabeexin diggiihan. 41Elsabeexiyoo Maariyamichi diggiyee qaaroon bi waayemmona, yeqqefoo bi maacoochaa tuguceeꞌi capphiye. Bekkech Elsabeexi Yaafe Ayaanoona ceennaꞌa, 42-43bi qaaroon oogichaꞌa ishichiyan: “Haane, ta Doonochi indeene, aabichaꞌa ta waan waanne? Maacheenaꞌo bulli daggoochee Yeeri neen diiritone; ne shiyemmi bushoonoo diiritone. 44Ne diggiyee qaaroon bekkech ta waayemmona, yeqqefoo ta maacoochaa emiroona capphitone. 45Doono bi gettiti qaaroon ceechemmo bi tunoon ne iberiitoyich diiriti neene” iyan.
Doono Yeerin Maariyami Galleto
46Arooba Maariyami ishichiyan:
“Ta kashoona Yeerin oogiihoye;
47-49taan wodiyechi Yeeri hoxeeti bi gonnee taan ciinniꞌi
ta ayaanoon oogichiꞌi emirikkitone.
Ooge Giidecho ta toommooch worganikkiti shuunoon tuniitone;
bi shigoo yaafoone.
Ebich hanaachina ikka getiree shiijjeroo bulli taan,
‘Yeeri diiritine’ gettemmone.
50Shiijjeroochee shiijjerooch beddaahaa
Yeerichi ariqqo biin shattii beetinaꞌoyich beeyemmone.
51Bi kishoona giidechi shuunoon shuunetone;
geecechinaꞌon boonoshi mullee gaboona shaccitone;
52giidechi taateenaꞌon boonoshi taatee qeenoochee kindiitone;
boonoshi qelloon giishii beetinaꞌonoo oogiitone.
53Shaacetinaꞌonoo deꞌe mooyona michiitone;
gaannechinaꞌonoo shokke kishoon echiitone.
54-55Wonna no qaabbechinaꞌoyich bi gettitoommon,
‘Abrahaminaa bi yareenaꞌonoyich bulli yemeenooch ariqqemmo taane’ ii
Yeeri bi gibenikkiti gibenoon gabiꞌi
biich maddeebeeti Israꞌeelee yaroo noon gaachetone”#Hal. 17:7 iyan.
56Aroochee Maariyami keejje agen bedoon Elsabeex waan bi kotetoyee gubb, bi kexooch wottahan.
Aacona Afaallechi Yowannisi Shiijjo
57Elsabeexiyoo bi shiyemmi aabo shagaa, anaami bushoon shiyahan. 58Bi giyeenaꞌonaa bi xibeenaꞌona Doono biich wojjiti ooge ariqqoon waayeꞌi waa biinna tookkii emiriyeete.
59Boonoshiyoo bi shiijjeti shimitte qemooba bushoon dokiriyoyich waaheete#Lew. 12:3; bi nihoochi shigoona Zakaariyaasi iꞌi shigiyoon shunniyeete. 60Tunebaani bushoochi indee tiyaꞌa, “Tuneyaache; Yowannisi getaa shigebe” iyan.
61Boonoshiyoo “Ne xiboochee koniyoona hini shigoon shigeto aalloone” iyeete.
62Bushoochi nihoo Zakaariyaasinoo “Bushoon koni getiree shigiyoon shunnaa beetine?” iꞌi malletoona echeheete.
63Bi kooremmi kooree qiicoon boonoshi immemmoyich echeꞌi “Bi shigo Yowannisine” ii kooriye. Ebich boonoshi bulli worganeheete. 64Areegaata bekkech bi noonoo qecheehe; tippeti bi heciyoo biichehe; Yeerinoo galleteebee yibbaatehe. 65Ebich boonoshi giyeenaꞌo bulli oogichiꞌi shattiyeete. Ebi mooyo bulli Yihudee showeexi geppechi katemoo bulliich waayeehe. 66Ebin waayetinaꞌo bulli “Ishigaata, hini bushoo gubb amoon tunehe?” iibee hini mooyon boonoshi mullooch kotiiheete; ebiyoo Doonochi giidoo biin gaachee bi beetoyichiye.
Zakaariyaasi Keemmiti Keemo
67Arooba bushoochi nihoo Zakaariyaasiyoo Yaafe Ayaanoona ceenniꞌi ishichii keemoon keemmiye:
68-70“Israꞌeelee Nuggishoo Doono Yeeri galleteebe!
Wonna yaafeeti keemechinaꞌochi noonoona bi gettitoommon,
bi aagetoon wodiyoyich waaꞌi boonoshi qoodoon qocciichii biishetone;
biich maddeebeeti Daawiti yaroochee
giidechi wodiyechon nooch tiijjitone.
71Ebin bi shuuneto, noon shixxii beetinaꞌonaa
noonna koyee beetinaꞌo bullinochi kishoochee
noon bi wodiyemmoyichiye;
72-73no asheenaꞌoyich bi ariqqemmoyich,
no qaabbechi Abrahamich bi giyiti wogoon,
ebiyoo bi yaafe wogoon gabiree bi ceechemmoyichiye.
74-75Wotta noon shixxii beetinaꞌo kishoochee noon wodiiree,
no beemi yemeeno bulliich shataanoon
yaafoonaa cadiqoona tuneree beebee,
biich no maddemmon bi hakkiyemmoyichiye.
76“Wotta hini gaggeroocho, Doonochi gommon qaxxeya
bi aafooch shiichemmo ne tunetoyich,#Milik. 3:1
Beshoo Yeerichi keemecho getteyemmo neene;
77Yeeri boonoshi axaaxoon bi maaroona boonoshin bi wodiyoon
bi aagetoyich arichiyemmo neene.
78No Nuggishoo maaco shaacaani ariqqechone;
ebich maaddee aabo keyoommon damba shimaayoochee keyiree
no waan woyemmone.
79No waan bi woyemmo,
manderoonaa qitee yiiroonooch kotaabeeti nooch bekkiiya,#Isi. 9:2
diggee gommoochoo noon yaabiyane” iye.
80Ebina are bushoo dicciye; ayaanoona kupphehe. Israꞌeelee ashi aafooch xalla bi kechemmi aabo beddimmi wottoon barahooch beehe.
ទើបបានជ្រើសរើសហើយ៖
Luqaasi 1: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
