Maariqoosi 16
16
Qitoochee Yesuusi Timo
(Maatiyoosi 28:1-8; Luqaasi 24:1-12; Yowannisi 20:1-10)
1Shambetoo beshetoyee gubb Magidalechi Maariyami, Yaaqobichi indee Maariyaminaa Soloomina tuneꞌi Yesuusichi cahoon huutta cinnechi shittoon kemeheete. 2Shabaattee batti batti aaboobee#16:2 Shabaattee batti batti aabo Oogishambetoone. maaddee yaaꞌoona, oppo beetooch hammiibee, 3“Oppee kellee noonooch beeti ooge xaqqoon konine nooch gederikkemmo?” iꞌi yibbaateebee shaggiyeete.
4Kaamee ciinniꞌi, oppee kellee noonooch beeti ooge xaqqo aroochee ikke badd gedereton beeggiyeete. 5Shaggii, oppee daggooch giyii ciinniꞌi, nacce tahoon taheti ikke gurimaashoo are oppee gaꞌooch qanne badd koteꞌi beeton beeggii keqqiyeete.
6Tunetaa aroo “Keqqiyaahote! Ittoshi qaawiibeeto yoodaa qititi Naazireetechi Yesuusiniye. Aroo hiniich aalloone; tiyitone! Bi cahoo qeyiti xaaꞌoo ebiyoche. 7Andoo tunetaa hamiree bi dabbeenaꞌonoyich, Pheexiroosichoo ‘Ittoshich bi gettitoommon Galiila ittoshiyee shiichiree hammemmone; aroochaa beeggemmo ittoshine’ getote” iye.
8Maacheenaꞌo keqqoona qeweebee maashoochee kechiꞌi woceheete. Boonoshi shattitoyich, konichona getaaneenaꞌone.#16:8 “Aroochee genneenaꞌo maraakoo boonoshich gettito bullin Pheexiroosinaa bi nuucheenaꞌonoyich bekkech gettiyeete. Ebiyee gubb Yesuusi bi qelloona bi dabbeenaꞌoyich, ‘Bulli yemeenee wodoo tuneti shaddeyaani yaafe qaaroon aabi keyoochee aabi gimooch beddaahaa hamiree asheenaꞌo bullich getote’ iꞌi wochehe” ii beeto ikkikke wonnee Yaafe Macaafee daggooch haddee 8 beetona tookkii kooreetone.
Magidalechi Maariyamich Yesuusi Bekko
(Maatiyoosi 28:9-10; Yowannisi 20:11-18)
[ 9Shabaattee batti batt aaboobee maaddoona Yesuusi qitoochee bi tiyitoyee gubb, shiichii shabaatte yinneenaꞌon bi toommoochee bi yookkiti Magidalechi Maariyamich bekkehe. 10Areyoo hammaꞌa eeppii muusheneꞌi beeti bi dabbeenaꞌoyich gettahan. 11Yesuusi qitoochee tiyiꞌi kashoona bi beemon, biichoo bi bekkoon ure waanee boonoshi waayetaa, iberiyaaneenaꞌone.
Gutte Bi Dabbeenaꞌoyich Yesuusi Bekko
(Luqaasi 24:13-35)
12Ebiyee gubb, Yesuusi goyechi gafooch gommona hammiibeeti gutte bi dabbeenaꞌoyich bare malletoona bekkehe. 13Boonoshiyoo wotteꞌi bare bi dabbeenaꞌoyich gettiyeete. Hini areenaꞌon wotta iberiyaaneenaꞌone.
Aaraa Ikke Bi Dabbeenaꞌoyich Yesuusi Bekko
(Maatiyoosi 28:16-20; Luqaasi 24:36-49; Yowannisi 20:19-23; Mishiraachechinaꞌo 1:6-8)
14Ebiyee gubb, maayoon maaya madooch boonoshi beetaa, Yesuusi aaraa ikke bi dabbeenaꞌoyich bekkehe. Qitoochee bi tiyitoyee gubb boonoshi aafoona beeggiti asheenaꞌo boonoshich gettiton iberiyee qayona boonoshi mullo muumetoyich, boonoshin noggehe.
15Daakkiꞌi ishichiye: “Showee toommo bulliich hambote; ta mishiraachoon halleeto bullich getote. 16Mulloon ta toommooch tooꞌiiꞌi aacona afaalleemmo wodemmone; tunebaani tooꞌiyaano toommooch nalleyemmone. 17Mulloon tooꞌii beetinaꞌo ebi malletoon tuniyemminaꞌone: Ta shigoona asheenaꞌo toommoochee yinneenaꞌon yookkemminaꞌone; andire noonoona yibbaatemminaꞌone; 18dingereenaꞌon boonoshi yeshigaata woyee wuxiibeeti xuppattoon boonoshi uyigaata, boonoshin amolla hallaachemmone; biiyechinaꞌochi toommooch boonoshi kishoon boonoshi kotiimmona biiyechinaꞌo wodemminaꞌone” iye.
Shimaajj Yesuusi Keyo
(Luqaasi 24:50-53; Mishiraachechinaꞌo 1:9-11)
19Doono Yesuusi ishin bi dabbeenaꞌoyich bi gettitoyee gubb, shimaajj kechiꞌi Yeerichi qannooch kotehe. 20Boonoshiyoo kechii bulli xaaꞌooch hammiꞌi Yesuusichi wochoon gettiyeete. Hammii boonoshi beetaa, Doono boonoshin gaachee beehe; bi immiibeeti malletoona boonoshi gettiibeeti qaaroon manjii beehe.]#16:20 Maar. 16:9-20 beeti qaaro ikkikke wonnee Yaafe Macaafooch aalloone.
ទើបបានជ្រើសរើសហើយ៖
Maariqoosi 16: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.