Luqaasi 11
11
Corootoon Yesuusi Dojjoo
(Maatiyoosi 6:9-13; 7:7-11)
1Ikke areddoon Yesuusi ikke xaaꞌooch corootii beehe. Corootoon bi ciichitoyee gubb, bi dabbeenaꞌoochee ikkoo tiyiꞌi, “Doonocho, Yowannisi bi dabbeenaꞌon bi dojjitoommon ama getiree no corootemmo gaata noon dojjibe” iye.
2Ebich Yesuusi boonoshich ishichiye: “Ittoshi ishichi corootibote:
‘[Shimaayooch beeti] no Nihoocho!
Yaafe ne shigo oogebe!
Ne taatittino bulli toommooch bede!
3Heeyi koshon qemi qemona nooch imbe!
4No wotta noon xuqqitinaꞌo bullin no maarii beetoyich,
no gondoon nooch maaribe!
Gondoochi nihoo dachooch noon geddaahine’ ” iꞌi gettiye.
5Ishichiinoo iye: “Ittoshi daggoochee shunecho biich beeti ikke asho, xumee gutte qellimooch are bi shunecho waan hammiꞌi, ‘Ta manoocho, keejje koshon taach erettiibe! 6Ikke ta shunecho gommoochee ta waan bi waataa, ta immemmo amolla aallehe’ bi getaa, 7aroo kechi maac beechi ‘Taan iritiyaaye; and kelloon tuggeto taane; tawoo, ta bushiisheenaꞌoo tokketeto noone; tiyaꞌa neech imon hakkaache’ gettehe? 8Ittoshich gettoye: Shunecho bi tunetoyich tiyii imo bi qayi gaatoona, wochii wochii bi cookoyicha geti tiyiree bi echeto bullin immemmone.
9-10“Tawoo ittoshich gettoye: Yeerin qollebote; ittoshich immemmone. Yeer waanee qaawibote; danemmo ittoshine. Bi kelloonoo qofote; ittoshich qechemmone. Yeeri biin qolleebeeto bullich immemmone; qaawiibeeto bulliyoo Yeer waanee danemmone; bi kelloon qoppiibeeto bullichoo qechemmone.
11“Ittoshi daggoochee nihoo tuneti asho bi bushoo haashoon maaya bi qolletaa, haashee qoodoon dingeroon immehe? 12Woyee gabexoon maaya bi qolletaa, barahee machoon immehe? 13Gondo ittoshi tunetaanoona, ittoshi bushiisheenaꞌoyich deꞌe mooyon imon ariibeeto ittoshine. Illa shimaayooch beeti ittoshi Nihoo Yeeri biin qollee beetinaꞌoyich Yaafe Ayaanoon am shaahoon beshaa beshiiree immehe!” iye.
Yesuusinaa Beelzebulina
(Maatiyoosi 12:22-30; Maariqoosi 3:20-27)
14Ikke areddoon, Yesuusi miime yinnoon ikke uro toommoochee yookkiye. Bi yookkitoyee gubb noona miime uro yibbaatehe; dofee asheenaꞌoo worganeheete. 15Tunetaa boonoshi daggoochee ikkikkeenaꞌo “Yinnee taatoo Beelzebulichi#11:15 Beelzebuli, Sheexaanoo woyee daabiloosi ceekkeebeeti shigoone. giidoonane yinnoon asheenaꞌo toommoochee bi yookkiibeeto” iyeete. 16Bareenaꞌoo wotta biin muriciiya iꞌi, “Shimaayoochee malletoon nooch bekkiibe” ii echeheete.
17Tunetaa Yesuusi boonoshi gaboon ariiꞌi boonoshich ishichiye: “Ikke taatittineech beeti asheenaꞌo boonoshinaa boonoshina shacegaata, are taatittine aallemmine; wotta ikke kexooch beeti asheenaꞌo boonoshinaa boonoshina shacegaata, are kexo dihishiye bi gettemmo. 18Taanoo ‘Beelzebulichi giidoona yinnoon asheenaꞌo toommoochee yookkehine’ iyote; illa Sheexaanee naayinaꞌo wotta boonoshinaa boonoshina shacegaata, bi taatittine aabichiree neexehane? 19Tawoo Beelzebulichi giidoona yinnoon asheenaꞌo toommoochee yookkaabeeto ta tunegaata, ittoshi bushiisheenaꞌochi konichi giidoonane boonoshi yookkiibeeto? Ebich boonoshine ittoshi toommooch nallemminaꞌo. 20Tunebaani ta Yeerichi giidoona yinnoon yookkaabeeto ta tunegaata, illa Yeerichi taatittine ittoshi waan shaggetine.
21“Ikke giidechi uro gaachoonaa ginoonon yechiꞌi bi kexon bi quyegaata, bi gijjoo gaacheyaache. 22Tunebaani biyee beshe giidecho waa biin kochiꞌi bi yeshigaata, bi gibeneti gaachoonaa ginoonon boggemmone; bi gijjoonoo keciree daami bi guuphinaꞌoyich qoodemmone.
23“Taanna tookkii neexeyaano taan shixxii beetone; taanna tookkiinoo kicaano shaccii beetone” iye.
Bi Kechiti Kexooch Yinno Wotteꞌi Gimo
(Maatiyoosi 12:43-45)
24Yesuusi daakkiꞌi ishichiye: “Yinno ashi toommoochee bi tiyitoyee gubb, bi kashemmi xaaꞌoon qaawiibee aachaalli showoona guuddiye; guuddii mucceꞌi, ‘Ta kecheti kexooch wotteree hami gibona’ ii 25wottee bi waahaa, are bi kechiti kexo hidaa qanniꞌi beeton beeggiye. 26Aroyee gubb hammiꞌi biyee gonde shabaatte bare yinneenaꞌon kicii dabbii deebiye; boonoshiyoo biinna tookkii arooch giyiꞌi koteheete; are uroyichoo aafichoyee andi beemo biich beshoon gondehe” iye.
Ibere Diiroo
27Yesuusi ebin gettii bi beetaa, dofee ashi daggoochee ikke ure bi qaaroon oogichaꞌa biich “Neen shiyeti maacechi, neen xaachiti xachechi diireetine” iyan.
28Tunebaani Yesuusi “Beshoon diireetinaꞌo Yeerichi qaaroon waayeꞌi ceechii beetinaꞌone” iye.
Malletee Bekkiyoon Yesuusi Qayo
(Maatiyoosi 12:38-42)
29Dofee asheenaꞌo bi waan kicee waa beetaa, Yesuusi ishichooch giyiye: “Hini shiijjeroo gonde shiijjeroone; malletoon beegoyich qaawii beetone; tunetaa Yoonaasichi malletoyee besh bare malletoo biich icheyaachemmone. 30Yoonaasi Nanawi katemeexi asheenaꞌoyich malletoo bi tunoommon,#Yoona. 1:17; 2:10; 3:4 ebiyoommon Ashi Bushoo wotta hini yemeenee ashich malletoo tunemmone. 31Deshi-waanee waati taatee nallaa gallooba neexeree hini yemeeneexi asheenaꞌon taggemmine; ebiyoo Solomooni gettiibeeti shalligoon waayoyich showee tuggoochee bi waatoyichiye.#1 Taat. 10:1-10; 2 Kiin. 9:1-9,12 Ebiyoche, Solomooniyee besho hiniich beetone. 32Nanawi katemeexi asheenaꞌo nallaa gallooba neexeree hini yemeeneexi asheenaꞌon taggemminaꞌone; ebiyoo Yoonaasi Yeerichi wochoon getaa waayeꞌi, axaaxee gommoochee Yeer waan boonoshi wottetoyichiye.#Yoona. 3:5-10 Ebiyoche, Yoonaasiyee besho hiniich beetone” iye.
Ashittinee Ceecheechon Yesuusi Dojjoo
(Maatiyoosi 5:15; 6:22-23)
33“Koniyoona ceechoon bi ceechigaata, kexooch giyii beetinaꞌoyich bi bekkemmoyich xallooch kotiihalli, aashooch kotiyaache; woyee bi toommooch gafetoon guufaache. 34Ashittinee ceechoo geto aafoone. Illa ne aafo iiwoo bi tunegaata, ne ashittino bulli wotta biremmone; tunetaa ne aafo biiyecho bi tunegaata, ne ashittino wotta manderemmone. 35Illa ne waan beeti ashittinee ceechoo bi tahaachemmoyich, ne qelloon quyebe! 36Illa ne ashittinee daggooch beeti bekkoon yiiree manderiibeeti deebo aallegaata, ne ashittinoo biroo bi tunegaata, ceechoo aaxxeꞌi bi bekkoommon bulli ne ashittino bekkemmone” iye.
Sheeree Dojjechinaꞌonaa Fariseenaꞌonochon Yesuusi Geto
(Maatiyoosi 23:1-36; Maariqoosi 12:38-40)
37Yesuusi yibbaatee toommooch bi beetaa, Fariseenaꞌo daggoochee ikkoo bi kexooch hamiree maayoon bi maayemmoyich Yesuusin ataalliye. Ebich uroo kexooch hammii giyiꞌi biinna tookkii kotehe. 38Yesuusi maayoon maataan beechii, Ayihudeenaꞌochi doyoochoommon machee bi qayon are Farisoo beeggiꞌi worganehe.
39Tunebaani Doono Yesuusi biich ishichiye: “Farisoo tuneti asho ittoshi bulli xoofoonaa shaatoonochi qeddoon machiyote; tunebaani ittoshi maacooch bogoonaa gonde gaboona ceennitone. 40Hini mullaalleenaꞌote, maachi achoon hallito maacichon wotta hallaache? 41Ittoshi xoofoonaa shaatoonooch beeton amolla aalloyich wojjibote; arooba bulli mooyo ittoshich xallemmone.
42“Tunebaani hini Fariseenaꞌote, kefoonaa caddiraammoonoochee, daaddeexi cinnechi bechoo bulliichee asraatoon Yeerich kichiyote; #Lew. 27:30tunebaani tachiꞌi nalloonaa Yeerin shunonon qajjitote; are Yeerich ittoshi kichii beeton qayaanoon, eboshinoo wotta tuniiya bedo ittoshine. Ebich ittoshich woowo!
43-44“Hini Fariseenaꞌote, Ayihudeenaꞌo kiceebeeti kexoochaa genje gabberoon, wotta gabiyee godoochaa ‘Showooch qebona’ ii beeti diggiyoon ittoshi shunnii beetoyich ittoshich woowo! Asho ariyaanoon bi toommona shaꞌeebeeti, uxeraalli maashoon ittoshi shaahii beetoyich, ittoshich woowo!” iye.
45 Muusichi Sheeree dojjechinaꞌo daggoochee ikkoo wochiꞌi, “Dojjechocho, ishichoo wotta noon naagone” iye.
46Yesuusiyoo ishichiꞌi wochiye: “Ittoshi wotta hini Muusichi Sheeree dojjechinaꞌote, beshe magge shaagoon ashi toommooch minjiyote; ittoshi ikke yaphereenolla are shaagoon yeshachote. Ebich ittoshich woowo!
47“Ittoshi qaabbechinaꞌo wuxiti keemechinaꞌo duukketi maashee toommooch kexon haggiyote. Ebich ittoshich woowo! 48Illa ittoshi qaabbechinaꞌo wuxiti keemechinaꞌo maashooch kexon hagona, boonoshi gonde shuunoon xiishiibeeti miixoo ittoshine. 49Ebich Yeerichi shalligoo ishichiye: ‘Boonoshi waan keemechinaꞌonaa mishiraachechinaꞌonon daachiyemmo taane; boonoshi daggoochee ikkikkeenaꞌon wuxemminaꞌone; ikkikkeenaꞌon duꞌiyemminaꞌone’ itone. 50-51Yeeri alemoon bi halliti aaboochee tiijjiꞌi ufeti keemechinaꞌo bulli damoon Abeelichi damoochee tiijjiꞌi, deejjee gudoonaa yaafee kechi gutte daggoonoochaa boonoshi wuxiti Zakaariyaasichi damooch beddaahaa, ufeti damoon Yeeri hini yemeenee asheenaꞌo waanee echemmone.#Hal. 4:8; 2 Kiin. 24:20-21 Andoo ittoshich gettoye: Hini yemeenee asheenaꞌo waanee echemmone.
52“Hini Muusichi Sheeree dojjechinaꞌote, ariyee kelloon qechiibeeti qulfoon ashich aachito ittoshine; ittoshiyoo giyaano ittoshine; giya qaawii beetinaꞌoyichoo bajjito ittoshine. Ebich ittoshich woowo!” iye.
53-54Aroochee Yesuusi tiyiꞌi bi hammii beetaa, Muusichi Sheeree dojjechinaꞌonaa Fariseenaꞌona ippeꞌi echoona biin iritiiheete; bi noonoochee mooyon daneya ottiibee, diqqoona biin battiiree yibbaatiiya qiicceheete.
ទើបបានជ្រើសរើសហើយ៖
Luqaasi 11: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
