Luqaasi 12
12
Maacoon Xalloo Shaahiyoochee Qellee Quyo
(Maatiyoosi 10:26-27)
1Arooba meeti hume asheenaꞌo ikkooch kiceeꞌi xuꞌeebee baatoona boonoshinaa boonoshina ariyaanoon neexee beetaa, Yesuusi shiichii bi dabbeenaꞌoyich ishichiꞌi getooch giyiye: “Fariseenaꞌochi bukee shittoochee ittoshi qelloon quyebote. Ebiyoo maacoon xalloo shaahiyoocheeniye. 2Qereeto bulli gaxxeyoo, aacheeto bulliyoo aricho echeyaani mooyone. 3Ebich qeroochaa ittoshi yibbaateto bulli bekkooch keyi waayeyemmone. Gatee daggoochaa ashi waamooch shaashikkoona ittoshi yibbaateto, asho bullich ceegaa getteyemmone” iye.
Yeerin Shato
(Maatiyoosi 10:28-31)
4“Ta shunechinaꞌote, ittoshich gettoye: Meenon wuxii beetinaꞌon shattaahote. Boonoshi wuxitoyee gubb boonoshi hallemmi bare mooyo amolla aalloone. 5Tunebaani ittoshi shattemmon ta ittoshich gettemmo taane: Aroo bi wuxitoyee gubb, shiweree qaaqqooch dufon hakkemmi Doonon shatote. Andoo ittoshich gettoye, biin shatote. 6Uuche gaashikafeenaꞌo gutte duudena kechee beetaacheete? Tunebaani boonoshi daggoochee ikkeenolla Yeeri batteyaanoone. 7Ittoshi qelli eexo bulliyona haddeetone. Illa shattaahote! Meeti gaashikafeenaꞌoyee beshoo ittoshine” iye.
Yesuusichon Ashi Aafoochaa Miixo
(Maatiyoosi 10:19-20,32-33; 12:32)
8“Ittoshich gettoye: Ashi aafoochaa taacho bi tunoon miixeebeeto bullich, Ashi Bushoo wotta Yeerichi maraakeenaꞌo aafoochaa taachone getiree miixemmone. 9Ashi aafoochaa taacho bi tunoon nookkee beeto, Yeerichi maraakeenaꞌo aafoochaa nookkeyemmone. 10Ashi Bushoo toommooch gondoon yibbaatee beeto maareyemmone; tunebaani Yaafe Ayaanoon naaggimmo maaroon daneyaachemmone.
11-12“Ittoshin Ayihudeenaꞌo kiceebeeti kechi nallechinaꞌo, showee iraasheenaꞌonaa ukkireenaꞌona waan boonoshi geechiyooba, arooba ittoshi gettemmi mooyon Yaafe Ayaano ittoshich arichiyemmo bi tunetoyich ‘Aabichiree woyee ama getiree wochehone?’ woyee ‘Ama gettehone?’ getiree xuuxeyaahote” iye.
Gaannechi Mullaalli Uroochi Shaahiyoo
13Arooba dofee asheenaꞌo daggoochee ikke uro Yesuusich “Dojjechocho, eke no nihoochi iristoon ta manoo taach bi qoodemmoyich gete” iye.
14Yesuusiyoo “Hini uroocho, ittoshi toommooch iristoon qoodechonaa nallechona ta tunemmoyich, konine taan ukkiriito?” iye. 15Wotta Yesuusi daakkiꞌi ishichiye: “Ashich kasho geto bi gaannee woddo tuno bi qajjitoyich, ittoshi qelloon ariibote! Hiriggoo bulliicheenoo ittoshi qelloon quyebote” iye.
16Ishichiinoo shaahiyoon boonoshich gettiye: “Ikke gaannechi uro gochiti maayo gaawichiꞌi shaggiye. 17Bi shagaa, biyoo ‘Hini ta maayoon ta geddemmi gotoo bedaache; ebich aabichibote?’ iꞌi woddoo gaabbiibee, 18ciiroochaa ‘Eechehoye!’ iye. ‘Hini ta goteenaꞌon happiree bare beshe gamini goteenaꞌon gotiyemmo taane; aroochoo ta maayoonaa ta qiico bullinon kicemmo taane. 19Ta kasheenoo “Ta kasheene, meeti yemeenooch beddemmi wodde adduunoo neech kiceetone; kashebe, mame, uye, emiribe” gettemmo taane’ iye.
20“Tunebaani Yeeri ‘Hini mullaalloocho! Ne kasheen ta kotiitoochee hanaachi xum tiijjemmo taane; hini ne kicitochi, konich tunehe?’ iye.
21“Bi qellich gijjoon kiciichii Yeeri aafoochaa girecho tuneti asho ebiyoommone” iye.
Yeerina Gibeneyoo
(Maatiyoosi 6:25-34)
22Ebichi hillooch Yesuusi bi dabbeenaꞌoyich ishichiye, “Ebich ittoshich gettoye: ‘Amoon maayehone?’ getiree ittoshi kashoyich woyee ‘Amoon tahehone?’ getiree ittoshi ashittinoyich qaawiibeeti mooyoyich xuuxeyaahote. 23Kasho maayoyee, ashittinoo tahoyee beshoone. 24Eke kurecheenaꞌon ciinote: Shoohaacheete; qecaacheete; maayi kicee kexo woyee gotoo boonoshich aalle; tunetaa Yeeri boonoshich maanjii beetone. Ittoshi kafoyee oogichii beshaachote? 25Ittoshi daggoochee konine xuuxeree bi neexooch ikke hiroon daakkoon hakkemmo? 26Illa ebiyoommi giisheche mooyonona tuniyoon hakkaachemmo ittoshi tunetoye, amoyichiye bare mooyoyich ittoshi xuuxeebeeto?
27“Eke mocee bungoo aabichiꞌi bi dicciibeeto gaata manjiiree ciinote. Huuttoon yokkeyaache; qoreddoonoo shifaache. Tunetaa ittoshich gettoye: Taatoo Solomooniyolla ebi wodde bi oogee daggoochee hini ikke mocee bungeechoommon taheyaanoone. 28Illa hanaach bekkeꞌi tiyii yaach qaaqqee gudooch dufaa micciibeeti gaddeexi mocoon Yeeri eechii tajjiibeeto bi tunegaata, hini Yeeri toommooch mulloon tooꞌiyaaneenaꞌote! Ittoshin aabichiree beshoon tajjoo qajjehe? 29Ittoshi gaboon ittoshi maayemmonaa ittoshi uchemmonoyich tuniyaahote. Ittoshi mulloon xuuxiyaahote. 30Eboshi bullin showee toommooch beeti aageteenaꞌo bulli qaawii beetinaꞌone. Ebi ittoshich qaawiibeeto bi tunoon ittoshi Nihoo Yeeri arii beetone. 31Tunebaani Yeerichi taatittineen qaawibote; arooba ebi bullin ittoshich daakkemmone” iye.
Gijjoon Shimaajji Kexooch Kotiyeechon Yesuusi Dojjoo
(Maatiyoosi 6:19-21)
32“Hini giisheche ta shiisheenaꞌote, shattaahote. Bi taatittineen ittoshich imoyich ittoshi Nihoo Yeeri oogichiꞌi emiritone. 33-34Ittoshi gijjoo beetooch ittoshi mullo tunemmone; ebich ittoshich beemmon kemiree iriteeti ashich imbote. Gaayo shagaachemmi, pilo aalliyaachemmi shimaajji kexooch ciyaani gijjoo kiceebeeti geeneyaani kolloon ittoshich qanniibote” iye.
Qanniꞌi Quyeebeeti Wochee Bushiisheenaꞌo
35“Illa cuyeree qannibote; ittoshi ceechoonoo ceechibote. 36Ittoshiyoo kechi doono gaaroochee bi wottoon quyeebeeti ashoon shaahibote; biyoo bi doono waaꞌi kelloon bi qofigaata, bekkech qechoyich quye beeyemmone. 37Boonoshi doono waahaa, tokketeyaanoon quyeebee danemmi wochee bushiisheenaꞌo diireetinaꞌone. Iberoon ittoshich gettoye: Bi shuunee tahoon taheree madooch boonoshin kotiichi qoomeree maanjemmone. 38Diqqich xumi tokketee gacooch woyee yaaꞌooch bi waagaata, eechibee danemmi wochee bushiisheenaꞌo diireetinaꞌone. 39Tunebaani ebin ariibote: Kechi doono gaayo woyemmi saatoon bi ariimmo gaata, bi kexon gaayoona iichiyaacheshone. 40Ebich ittoshi wotta qanniree beebote; Ashi Bushoo ittoshi gabaani saatooch woyemmone” iye.
Mullechi Wochee Bushoonaa Mullaalli Wochee Bushoona
(Maatiyoosi 24:45-51)
41Arooba Pheexiroosi Yesuusin “Doonocho, ebi ne getteti shaahiyoo no ikkeetoyichiyee woyee bullichiye?” iꞌi echehe.
42Doono Yesuusiyoo ishichiye: “Illa heeyi maayoon boonoshich qaawiimmi saatoona bi immemmoyich, doono bi kechi asheenaꞌo toommooch bi ukkiriiti gibeneeti mullechi wochee bushoo konine? 43Bi doono waahaa, bi shuunee toommooch beebee danemmi are wochee bushoo diireetone. 44Iberoon ittoshich gettoye: Biich beeto bulli toommooch ukkiriyemmone. 45Tunetaa are wochee bushoo ‘Ta doono kaate waataachemmone; yagemmone’ ii bi mulloona gabiꞌi, bi doonoyich maddeebeeti anaaminaꞌonaa maacheenaꞌonon yexooch, mamonaa uyonooch, mashoochoo bi giyigaata, 46bi doono bi gabaani aabooba, bi ariyaani saatooch woyemmone; biin yeshiree gutte beera gaakkemmone; bi ixoonoo Yeeri toommooch mulloon tooꞌiyaani asheenaꞌona tookki tuniyemmone.
47“Bi doonochi daaggoon ariibee qanniyaano, bi daaggitonoo tuniyaani are guuno oogichi xooppemmone. 48Tunebaani ariyaanoon biin xooppiiya bedoon shuuneti wochee bushoo ariyaanoon bi shuunetoyich, giishechoon xooppemmone. Yeeriyoo meeton biich bi immiti asho bulli waanee meeton qaawemmone; beshiiꞌi bi immiti ashi waanee beshoon echemmone” iye.
Yesuusichi Naboona Woyemmi Barbarittino
(Maatiyoosi 10:34-36)
49Yesuusi daakkiꞌi ishichiye: “Showee toommooch qaaqqoon duppa waato taane; and kaateree bi aaxxemmoyich amoommon qaatii beetote! 50Tunebaani ta afaalleyemmi xuuxee afaalleyoo beetone; are afaalleyoo beshemmi wottoon ta kasheyich kashe xaaꞌoo aalloone. 51Ta waato, showee toommooch diggoon deeboyich ittoshich shaahii beete? Ittoshich gettoye, toonoone; ta waato shacoon tiijjoyichiye. 52Hanaachina ikka getiree ikke kexooch beeti uuche asheenaꞌo qoodeeree keeminaꞌo gutteenaꞌo toommooch, gutteenaꞌoo keeminaꞌo toommooch tiyiree kaaremminaꞌone. 53Nihoo bi bushoo toommooch, bushoo bi nihoo toommooch, indee bi bushee toommooch, busheyoo bi indee toommooch, amaatee bi naamechee toommooch, naamecheyoo bi amaatee toommooch tiyiree kaaremminaꞌone”#Mik. 7:6 iye.
Yemeenoon Xiishoo
(Maatiyoosi 16:2-3)
54Wotta Yesuusi dofee asheenaꞌoyich ishichiye: “Aabi-gimoochaa yiibo yiibaa ittoshi beegigaata, bekkech ‘Amiyo dihemmone’ iyote; ittoshi gettitoommonoo dihiye. 55Deshi-waanaa yongo yongetaa beeggiꞌi, ‘Showoo biremmone’ iyote; ittoshi gettitoommonoo tunehe. 56Hini ittoshi maacoon xalloo shaahiibeeti asheenaꞌote! Showoonaa shimaayoonon aafoona ciinniꞌi xiishoon arii beehote; tunebaani hini yemeenoon ittoshi xiishoo qajjiibeeto amoyichiye?” iye.
Biinna Taggechona Tookkii Shuno
(Maatiyoosi 5:25-26)
57“Wotta ittoshi qellich tate mooyon kichii kindiiꞌi amoyich kuxaachote? 58Ne taggechona tookkiree ukkiroo waan hamibee, gommoochaa ‘Neennaa taanna shunebone’ getiree qollebe. Ebin ne qayigaata, ukkiroo waan neen geechiyemmone; ukkiroo bi ginee naayoyich beshiiree neen immemmone; bi ginee naayo cuyee kexooch neen duppemmone. 59Illa neech gettoye, ciireexi ikke duudenolla ne qoccemmi wottoon aroochee ciroona keyaachemmo neene” iye.
ទើបបានជ្រើសរើសហើយ៖
Luqaasi 12: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
