Luqaasi 10
10
Shabaa Gutte Asheenaꞌon Kaacciꞌi Yesuusi Wocho
1Ebiyee gubb, Doono Yesuusi aaraa gutte bi dabbeenaꞌoyee bare shabaa gutteenaꞌon ukkiriihe; gutti guttoo tuniiꞌi, bi hammemmi katemoonaa gafoo bullinooch biyee shiichiree boonoshi shaggemmoyich daachiihe. 2Hamma boonoshi tiyimmona, boonoshich ishichiye: “Qecceyemmi maayo woddoone; tunebaani qeccii kicechinaꞌo giishecheenaꞌone. Illa maayi Doono maayo beeti budooch qeciree kicemminaꞌon bi daachiyemmoyich corootibote. 3Illa tibote; bagoochoommon okereenaꞌo daggooch ittoshin wochemmo taane. 4Kolloon woyee kojjoon woyee caammoon yechaahote; gommon hamibee koninolla diggiyoyich neexeyaahote.
5“Koni kexoocholla ittoshi giyigaata, shiichiree, ‘Diggoo hini kexooch tunebe’ getote. 6Yeerichi diggoyich bedditi asho arooch bi beegaata, ittoshi diiroo bi toommooch tunemmone; bi aallegaata, are diiroo ittoshi waan wottemmone. 7Shuunecho biin shuuniito waanee maayi beddiye; ebich are kexoochaa boonoshi giddiimmon maa uyibee kotebote. Ittoshi qeyiibeeti kexon qayiree bare kexooch hammaahote.
8“Ittoshi giyimmi katemoo bulliich beeti asheenaꞌo ittoshin boonoshi iibbiigaata, boonoshi giddiimmon mamote; 9are katemooch beeti biiyechinaꞌon wodiibote; arooch beeti asheenaꞌoyichoo ‘Yeerichi taatittine ittoshi kellooch shaggetine’ getote. 10Tunebaani ittoshi giyimmi katemoo bulliich beeti asheenaꞌo ittoshin iibbiyoo boonoshi qayigaata, gommooch keyiree, 11‘Ittoshi toommooch miixoo bi tunemmoyich, no baatooch beeti ittoshi katemeexi quttoonolla tebbemmo noone; tunebaani ebin ariibote: Yeerichi taatittine ittoshi kellooch shaggetine’ getote. 12Ittoshich gettoye: Nallaa gallooba are katemeexi asheenaꞌoyee Sodoomi katemeexi asheenaꞌoyich gaawiye”#Hal. 19:24-28 iye.
Keejje Katemee Asheenaꞌo Ittibateyoo
(Maatiyoosi 11:20-24)
13“Koraziine, neech woowo! Beetisayide, neech woowo! Ittoshich bekketi gaakkechi shuunoo Xiroosinaa Sidooninoyich bi bekketo gaata, wonna dookoon tahe tullooch koteree, axaaxee gommoochee Yeer waan wotteshinaꞌone.#Isi. 23:1; Hiz. 26:3-4; Amo. 1:9-10 14Tunebaani nallaa gallooba ittoshiyee Xiroosi asheenaꞌonaa Sidooni asheenaꞌonoyich gaawemmone. 15Hini Qifirinaahe! Shimaayooch beddaahaa ciixenne? Tunebaani kindiiree Siꞌoolooch duppeyemmi neene” iye.
16Ebiyee gubb, Yesuusi bi dabbeenaꞌon “Ittoshichon waayeebeeto, taachon waayee beetone; ittoshin qajjiibeeto, taan qajjii beetone; taanoo qajjiibeeto, taan wocheti Yeerin qajjii beetone” iye.
Shabaa Gutte Asheenaꞌo Boonoshi Wocheetoochee Wotto
17Shabaa gutteenaꞌo boonoshi wocheetoochee oogichii emiriibee wotteꞌi, Yesuusin “Doonocho, yinneenaꞌolla ne shigoon no ceeggemmona nooch yittiꞌi hajjee beetinaꞌone” iyeete.
18Yesuusiyoo ishichiye: “Sheexaanoo xeeyoochoommon shimaayoochee kindiꞌi bi dihaa beeggoye. 19Dingeroonaa barahee machoonon baatoona ittoshi neexxemmoyich, ittoshin shixxiibeeti Sheexaanee giidoo bullin yittiiree ittoshi hajjemmoyich, ukkirittinoon ittoshich immeto taane. Ittoshich etto tunemmi mooyo amolla aalloone. 20Tunebaani ittoshi shigo shimaayeexi macaafooch bi kooreetoyich emiribotalli, yinneenaꞌo ittoshich boonoshi yittiꞌi hajjee beetoyich emiriyaahote” iye.
Yesuusi Emiroo
(Maatiyoosi 11:25-27; 13:16-17)
21Arooba Yesuusi Yaafe Ayaanoona oogichii emiriꞌi “Showoonaa shimaayoonochi Doono tuneti ta Nihoocho, ebin ariyechinaꞌonaa shalligechinaꞌona ariyaachemmoyich ne aachitoyich, gaggereenaꞌoomminaꞌoyichoo ne bekkiitoyich neen galletehoye. Iberoone, ta Nihoocho, ebin tuniyoyich gaaweti ne daaggoo tunetone” iꞌi Yeerin galletehe.
22Aree hillooch “Ta Nihoo bulli mooyon taach immitone; Nihoo Yeeriyee damba Yeerichi Bushoo taan koni ta gaata ariibeeto aalloone. Yeerichi Bushoo tayee beshetaa, wotta Yeerichi Bushoo ta biich bekkiiya ta daaggiti ashoyee beshetaa, Nihoo Yeeri koni bi gaata biin ariibeeto aalloone” iye.
23Ebichi hillooch Yesuusi bi dabbeenaꞌo waan wotteꞌi boonoshi ikkeetoyich “Ittoshi beeggii beeton, beeggii beetinaꞌo diireetinaꞌone. 24Ittoshich gettoye: Meeti keemechinaꞌonaa taateenaꞌona ittoshi beeggii beeton beegoyich qaatitinaꞌone; tunebaani beegaaneenaꞌone. Ittoshi waayee beetonoo waayoyich qaatitinaꞌone; tunebaani waayeyaaneenaꞌone” iye.
Deꞌe Shamaaree Uroochi Shaahiyoo
25Ikke areddoon, Muusichi Sheeree dojjecho Yesuusin muriciiya qaawii kotoochee tiyiꞌi, “Dojjechocho, bulli yemeenee kashoon ta danemmoyich, amoon hallibote?” iꞌi echehe.
26Yesuusiyoo “Muusichi Sheeree Macaafooch kooreeto amoone? Aroochee amooniye ne ciinnaabeeto?” iye.
27Uroo wochiꞌi, “ ‘Ne Nuggishoo Doono Yeerin ceeni ne mulloona, ceeni ne kashoona, ceeni ne giidoona, ceeni ne shalligoonoo shune; neenoommi ne manoon neenna tachiree shune’#Yibba. 6:5; Lew. 19:18 ii beetone” iye.
28Yesuusi “Iberoon gettehine; ebin ne tuniigaata, bulli yemeenee kashoon danemmo neene” iye.
29Are uroo bi qelloon deꞌo tuniiya qaawiꞌi Yesuusin “Ta manochi konine?” iꞌi echehe.
30Yesuusiyoo wochiꞌi ishichiye: “Ikke uro Yerusaalemee Yaariki katemooch hammii bi beetaa, diqqich bokkeenaꞌo biinna daneheete. Biin boggiꞌi bi tahoon shoottiyeete; yexxiinoo iyeete; bi kasheyoo kechi beddaachaa qajjii hammiyeete. 31Diqqoona ikke qeeshoo are gommona hammiibee uro dihiꞌi beeti xaaꞌooch shaggiꞌi beeggiichii gommon ikke baddaa kuxxii beshehe. 32Wotta ikke Lewee asho are uro dihiꞌi beeti xaaꞌooch shaggiꞌi beeggiichii gommon ikke baddaa kuxxii beshehe. 33Ebiyoommon wotta are gommona ikke Shamaaree asho hammiibee uro dihiꞌi beetooch shaggiye; beeggiꞌinoo ariqqehe; 34bi waan giddeꞌi zayitoonaa woyinee uyoonon uroochi mayooch ukkiꞌi kaappiye; bi hajjee kuroon yebbiiꞌi gijjoo qocaa qeyeebeeti ikke iibbee kexooch daammiye; aroochaanoo shiimeebee quyeꞌi qeyiye. 35Deco haraa gutte diinaaroon kichii iibbee kechi doonoyich immiꞌi, ‘Hini uroon gaawichiree shiimebe; hini ta immeti gijjoo bedo qayigaata, ne kichito bullin ta wottehooba qoccemmo taane’ iichii hammiye.
36“Illa hini keeminaꞌoochee bokkeenaꞌo kishooch dihiti uroyich manoon tuneto neech aabi shaahii beete?” iꞌi echehe.
37Muusichi Sheeree dojjecho wochiꞌi, “Ariqqeꞌi gaachetone” iye.
Yesuusiyoo “Ne wotta hamiree ebiyoommon tuniibe” iye.
Yesuusi Maarittinaa Maariyamina Waan Shaggii Boonoshin Beego
38Yesuusi bi dabbeenaꞌona tookkii hammiibee ikke gafooch shaggiye; Maaritti getteebeeti ikke ure bi kexooch biin iibbiihan. 39Biichoo Maariyami getteebeeti manee beetine. Maariyami Yesuusichi baatooch kotaachaa bi gettii beeton waayaa beehan. 40Tunetaa Maaritti shuunoo biich bi meettitoyich, bi mullo shacehe; Yesuus waan giddaꞌa, “Ta Doonocho, ta manee shuunoo bullin ta toommooch duppaachaa bi qayon beeggaabee, cikkii qajjenne? Eke ne getaa, waaree taan gaachebuye” iyan.
41Doono Yesuusi wochiꞌi, “Maaritte, Maaritte! Meeti mooyona ne mulloon xuuxiihine; iriteenoo iyine. 42Tunebaani qaaweeto ikke mooyo baachiye; Maariyamiyoo are gaaweti mooyon yechetine; biichoo bacheyaache” iye.
ទើបបានជ្រើសរើសហើយ៖
Luqaasi 10: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
