Mishiraachechinaꞌo 6
6
Shabaatte Asheenaꞌo Kaacceyoo
1Aroobee yemeenooch Yesuusichi dabbeenaꞌo meettii meettii boonoshi qeyimmona, Giriikee noonoon yibbaateebeeti Ayihudeenaꞌo Yihudee showooch shiijjeti Ayihudeenaꞌo toommooch guruuxiyeete. Ebiyoo qemi qemona boonoshi deggiibeeti degoochee Giriikee noonoon yibbaateebeeti xuume maacheenaꞌoyich boonoshi guutiitoyichiye. 2Arooba aaraa gutte mishiraachechinaꞌo Yesuusichi dabbeenaꞌo bullin ceeggiꞌi ishichiyeete: “Yeerichi qaaroon asheenaꞌoyich dojjoon qayiichi maayoon qoodooch no gimo tato toonoone. 3Ebich no maneenaꞌote, ittoshi daggoochee shabaatte asheenaꞌon kaacote. Ebi ittoshi kaaccemmi asheenaꞌo ‘Yaafe Ayaanoonaa shalligoona ceenniti asheenaꞌone’ getaa miixeetinaꞌo tunebeete; hini shuunoyich boonoshin ukkiriibone. 4No, corootoonaa Yeerichi qaaroon dojjoonoyich no mulloon ikkochibone” iyeete.
5Asheenaꞌo bulli ishin waayeꞌi emiriyeete. Ebich Yesuusi toommooch mullee tooꞌiyoona, Yaafe Ayaanoonoo ceenniti uro Isxifanoosin, Filipphoosin, Phirookiroosin, Niqaaroonin, Xemoonin, Pherimoonin, Ayihudeenaꞌo waan wotteti Antsookechi Niqolawiyoosin kaacciyeete. 6Eboshin mishiraachechinaꞌo aafooch deebii neechiyeete. Mishiraachechinaꞌo hini are kaacceti asheenaꞌoyich boonoshi corootitoyee gubb, kishoon boonoshi toommooch kotiiheete.
7Yeerichi qaaro gaminnii gaminnii hammiye; Yerusaalem beeti Yesuusichi dabbeenaꞌo meettii meettii waaheete. Qeesheenaꞌo daggoochee meetinaꞌo mishiraachee qaaroyich deꞌa iꞌi Yesuusi toommooch mulloon tooꞌiiheete.
Isxifanoosi Yecho
8Isxifanoosi Yeeri biich wojjoonaa giidoonon imaa asheenaꞌo daggooch giidechi gaakkechi shuunoonaa worganikkiti malletoonon tunii beehe. 9Arooba Qereni katemoonaa Iskindiri katemoonoochee, Kiliqee showoonaa Isiyee showoonoochee waati Ayihudeenaꞌo Guuchittinoochee Kechiti Ayihudeenaꞌo Kiceebeeti Kexo getteebeeti kexooch kicee beeheete. Eboshi daggoochee ikkikkeenaꞌo tiyiꞌi Isxifanoosina tookkii taggeheete. 10Tunetaa bi gettiibeeti ariyoonaa Ayaanoonon habbiyoon hakkaaneenaꞌone.
11Arooba “Muusinaa Yeerinon bi naagaa waayeto noone” getiree miixemmi miixeenaꞌon aashoona qanniiheete. 12Ebichi gommona asheenaꞌon, geeneenaꞌonaa Muusichi Sheeree dojjechinaꞌonon ippiiheete.
Boonoshiyoo hammii Isxifanoosin yechiꞌi, kiceeti Ayihudee nallechinaꞌo waan deebiyeete. 13Bi toommooch miixemmi koote miixeenaꞌon giddiiheete; are miixeenaꞌo giddeꞌi, “Hini uro [hini] yaafee kexonaa Yeerichi sheeroonon oonoochee wotteyaanoone. 14Andoo ‘Hini Naazireetechi Yesuusi getteebeeto, hini yaafee kexon happemmone; Muusi nooch bi beshiiti doyoonoo shaddemmone’ iꞌi bi getaa waayeto noone” ii miixeheete.
15Areegaata nalloyich koteti Ayihudeenaꞌo bulli Isxifanoosin manjii boonoshi ciinnimmona, bi aafo maraakee aafoon shaahiye.
ទើបបានជ្រើសរើសហើយ៖
Mishiraachechinaꞌo 6: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
