Mishiraachechinaꞌo 7
7
Isxifanoosi Yibbaateti Yibbaatoo
1Qeeshee guudo “Hini mooyo iberoone?” iꞌi Isxifanoosin echehe.
2Isxifanoosi wochiꞌi ishichiye: “Ta maneenaꞌonaa ta niheenaꞌonote, waayebote. Oogee yiirechi Nuggishoo, no nihoo Abrahami Karaan hammii koteyaan bi beetaa, Mesopotaamee showoochaa biich bekkeꞌi, 3‘Ne showoonaa ne xibeenaꞌona waanee keyiree ta bekkiyemmi showooch hambe’#Hal. 12:1 iye.
4“Ebich arooba Kalideenaꞌochi showoochee kechiꞌi, Karaan hammii kotehe. Aroochee bi nihoo qititoyee gubb, Yeeri biin kichiꞌi hanaach ittoshi beeti hini showooch deebii kotiihe.#Hal. 11:31; 12:4 5Hiniichoo ikke ciix bede iristoonolla biich imaanoone. Tunebaani Abrahamich bushoo shiijjeyaan beetaa, ‘Hini showoon neennaa ne hillooch shiijjemmi ne yaroonoyich immemmo taane’ iꞌi gibenikkiye.#Hal. 12:7; 13:15; 15:18; 17:8 6Wotta Yeeri ‘Ne yaroo ashi showooch shiqqoo tuneree beeyemmone. Are showee asheenaꞌo awudde balle naton guuno tuniiree neexi hajjemminaꞌone. 7Tunebaani guuno tuniiree hajjemmi are showee asheenaꞌochi toommooch nallemmo taane; ebiyee gubb, ne yaroo keyiree hini xaaꞌoochaa taach goyinnemmone’#Hal. 15:13-14; Key. 3:12 iꞌi gettiye. 8Ebiyee gubb, Yeeri Abrahamina tookkii wogoon giyiye. Abrahamiyoo hini are wogoona dokireehe.#Hal. 17:10-14 Ebich Abrahami Yisaaqin shiyiꞌi shimitte qemooba dokiriye. Ebiyoommon Yisaaqi bi bushoo Yaaqobin dokiriye; Yaaqobiyoo no qaabbechinaꞌo tuneti aaraa gutte bi bushiisheenaꞌon dokiriye.
9“Hini no qaabbechinaꞌo boonoshi manoo Yooseefina qanaateꞌi Gibits hammiibeeti giixechinaꞌoyich biin kemmiyeete. Tunebaani Yeeri biinna tookkii tunehe;#Hal. 37:11,28; 39:2,21 10bi xuuxo bulliichee biin shiwee wodiihe. Gibitsee taatoo Farooni aafooch gidoonaa shalligoonon immiye. Hini are taatoo Yooseefin Gibitsee showoonaa bi kexo bullinooch iraashiihe.#Hal. 41:39-41
11“Aroyee gubb Gibitsee showoonaa Kanaanee showoo bullinooch beeti asheenaꞌon duꞌiiti shaacoo giyaa, no qaabbechinaꞌo maayemmon mucceheete. 12Arooba Yaaqobi Gibits maayee beemon waayeꞌi, shiichii no qaabbechinaꞌo tuneti bi bushiisheenaꞌon are Gibits daachiihe.#Hal. 42:1-2 13Bi guttinnooba Yooseefi bi maneenaꞌoyich Yooseefi bi tunoon arichiihe; arooba bi yoodo Faroonich arichehe.#Hal. 45:1,16 14Ebichi hillooch Yooseefi bi nihoo Yaaqobin ‘Ne kechi asheenaꞌo bullin yeshiree Gibits wobe’ iꞌi wochiihe. Arooba Yaaqobichi kechi asheenaꞌo shabaa uuche asheenaꞌone.#Hal. 45:9-10 15Yaaqobi eboshina tookkii tiyii, Gibits hammiye; biinnaa no qaabbechinaꞌona aroochaa qitiyeete. 16Boonoshi dubenoon Shekeem daammiꞌi Abrahami Hamoorichi bushiisheenaꞌo waanee bi gijjoona bi kemeti maashooch duukkiyeete.#Hal. 50:12-13; Yaas. 24:32
17-18“Aroyee gubb Yeeri Abrahamich bi gibenikkiti yemeeno katinnimmona, Yooseefin ariyaani bare taatoo Gibits bi taatemmi wottoon, Gibits beeti no macceenaꞌo shiijjee meettiyeete.#Key. 1:7-8 19Hini are taatoo no yareenaꞌoyich maroo halliꞌi no qaabbechinaꞌochi toommooch maacoo manjiye; boonoshi waanee shiijjemmi gaggereenaꞌon kashoona boonoshi beetaachemmoyich, ‘Maaxooch kichiree dufote’ iꞌi xuuxiihe.#Key. 1:10-11,22
20“Arooba Muusi shiijjehe; aroo Yeeri biinna emiriti bushoone. Biyoo bi nihoo kexooch keejje agenoon dicciye;#Key. 2:2 21aree hillooch bi duppeeti xaaꞌoochee Faroonichi bushee danaꞌa tiijjaa daammaa, bi bushoon tuniiꞌa dichiyan.#Key. 2:3-10 22Ebich Gibitseenaꞌo Muusich boonoshi ariyoo bullin dojjiyeete; aroo bi yibbaatoonaa bi shuunoo bullina giidechi asho tunehe.
23“Ebiyoommon Muusi bi shiijjeti aabbe natooba, bi maneenaꞌo tuneti Israꞌeeleenaꞌon beegga gabiꞌi, boonoshi waan hammiye. 24Boonoshi daggooch bi beetaa, ikke Gibitsee asho Israꞌeelee ashoon bi xuqqii beetaa beeggiꞌi gaachehe; Gibitsee ashoon wuxiꞌi xuqqeeti uroyich nichoon kichiye. 25Muusiyoo ‘Ta maneenaꞌo Yeeri boonoshin ta kishoona wodiyemmo tunoon shalligii beetinaꞌone’ iꞌi gabiye; tunetaa shalligaaneenaꞌone. 26Wotta dechara Israꞌeeleenaꞌochi daggoochee gutteenaꞌo boonoshinaa boonoshina kaaree beetaa beeggiꞌi, yeshi shuniiya iꞌi, ‘Hini asheenaꞌote, manaamanoo ittoshi amoyichiye ittoshi xuꞌee beeto?’ iye.#Key. 2:11-13
27“Are xuqqiibeeti uro, Muus waan wottee kishoona xuqqiꞌi, ‘No toommooch ukkiroonaa nallechona ne tunemmoyich, konine neen ukkiriito? 28Woyee yiich Gibitsee ashoon ne wuxitoommon, taan wuxiya qaawaa beetine?’#Key. 2:14 iye. 29Muusi ebin waayeꞌi Miidiyamee showooch maxxee hammii, shiqqoon tuneꞌi kotehe; aroochaa gutte bushoon shiyihe.#Key. 2:11-15; 18:3-4
30“Muusi arooch aabbe naton bi kotetoyee gubb, Siini guudi gaꞌooch beeti baraheexi tusho qaaqqoo tuneꞌi aaxxeebeeti qaaqqee aaxxee daggoochaa maraakoon beeggiye. 31-32Muusiyoo bi beeggiti mooyoyich worganehe; manjii beegga giddeꞌi, ‘Ne qaabbechinaꞌo Abrahamichi Nuggishoo, Yisaaqichi Nuggishoo, Yaaqobichi Nuggishoo taane’#Key. 3:1-2,6 ii beeti Doonochi qaaroon waayehe. Muusiyoo shattii qewehe; manjii ciinnemmon mawiihe.
33“Aree hillooch Doonoo ‘Ne neexeti xaaꞌoo yaafeeti showoo bi tunetoyich, ne baateexi caammoon kichibe. 34Gibits beeti ta macceenaꞌochi xuuxoon manjii beeggaꞌa, kachaa kashoon mucceꞌi boonoshi gaashiron waayaꞌa, boonoshin wodiiya kindito taane. Andoo tibe! Gibits neen wochemmo taane’#Key. 3:5,7-8,10 iye.
35“Hini Muusi ‘Ukkiroonaa nallechona ne tunemmoyich konine neen ukkiriito?’ iꞌi boonoshi hoxeti uroone. Aroonoo tushee daggoochaa bi beeggiti maraakoo kishoona Yeeri ukkiroonaa wodiyechonon tuniiꞌi deejjiye. 36Biyoo boonoshin yaabiꞌi Gibitsee kichiye; Gibitsaa, Ceelle baharoonaa Siinee barahoonoochaa aabbe naton worganikkiti mooyonaa malletoonon bekkiihe.
37“Israꞌeeleenaꞌon ‘Yeeri, taanoommi keemechon ittoshi maneenaꞌochi daggoochee ittoshich kaaciree neechemmone’#Yibba. 18:15,18 iꞌi gettito hini are Muusine. 38Aroo no qaabbechinaꞌona tookkii barahooch kiceeti asheenaꞌo daggooch, wotta Siini guudoochaa biich gettiti maraakoona tookkii beetone. Kasho beeti qaaroonoo nooch imma Yeer waanee deqqito aroone.
39“Tunebaani no qaabbechinaꞌo hini are Muusin xuqqiyeete; ‘No toommooch ukkireyaache’ iꞌi boonoshi mulloona Gibits wotteheete. 40Wotta Haroonin ‘Hini Gibitsee noon kichiti Muusi amooch bi giyito gaata ariyaano noone; ebich no aafooch shiichemmi nuggisheenaꞌon nooch shuunebe’#Key. 32:1 iyeete. 41Arooba maamon shaahiiꞌi shahalloon shuuneheete; biichoo deejjoon deejjiyeete; kishoona boonoshi shuuneti shuunoyich tiikkeshoo tiikkesheheete.#Key. 32:2-6 42Ebich Yeeri boonoshin qajjiye; shimaajji xojjeneenaꞌoyich boonoshi goyinnemmoyich beshiiꞌi boonoshin immiye. Keemechinaꞌochi macaafooch bi kooreetoommon,
‘Yeeri “Hini Israꞌeeleenaꞌote!
Aabbe naton barahooch ittoshi beehooba,
deejjoonaa buuroonon ittoshi giddiito taachiye?
43Boonoshich goyinneya ittoshi shuuneti,
Molooki duukkaanoonaa
Refaani getteebeeti ittoshi nuggishoo tuneti xojjenee shaahiyoonon
tiijjiꞌi shaaggiyote.
Ebich Baabloonee showoyee bekk ittoshin yoohi daachiyemmo taane” iye.’#Amo. 5:25-27
44“No qaabbechinaꞌo barahooch beehooba, Yeerichi miixee duukkaanoo boonoshina tookkii beetone. Are duukkaanoo Yeeri Muusich bekkiiꞌi gettitoommon shaahiitaa shuuneetone.#Key. 25:9,40 45No qaabbechinaꞌo wotta Yaasi boonoshin yaabee, Yeeri boonoshi aafoochee yookkii kichiti aageteenaꞌo showoon boonoshi yechiyooba, hini are boonoshi deqqiti duukkaanoon yechiꞌi giyiyeete; Daawiti yemeenooch beddaahaa arooch kotehe. 46Daawitiyoo Yeerichi aafooch gidoon daneꞌi, Yaaqobichi Nuggishoyich kexon hagga qollehe. 47Tunebaani Yeerich kexon haggito Solomoonine.#1 Taat. 6:1-2,38; 2 Kiin. 3:1
48“Tunetaa Beshoo Yeeri asho haggiti kexooch beetaache; keemecho gettitoommon,
49‘Doono Yeeri “Shimaayoo ta taatee qeenone;
showoo ta baatoo neexxemmi xaaꞌoone;
taach am shaahe kexoniye ittoshi haggemmo?
Ta kashemmi xaaꞌochi, amoommone?
50Eboshi bullin shuuneto ta kishoo toone?” itone.’#Isi. 66:1-2
51“Illa hini ittoshi mullo muumeti, ittoshi waamoo ulleti babbereenaꞌote! Ittoshi qaabbechinaꞌochoommon ittoshiyoo wotta bulli aaboon Yaafe Ayaanoyich deꞌa getaano ittoshine. 52Keemechinaꞌo daggoochee ittoshi qaabbechinaꞌo duꞌiyaano koniniye? ‘Cadiqo woyemmone’ iꞌi shiichii gettitinaꞌon wuxiyeete. Bi waatenoo, ittoshi and biin beshiiꞌi immiyote, wuxiihote. 53Yeeri bi maraakeenaꞌo kishoona bi immiti sheeroon deqqiyote; tunetaa quyeyaachote” iye.
Xaqqoona Yexaa Isxifanoosi Qitoo
54 Ayihudee nallechinaꞌo ishin waayee, oogichii ippeꞌi boonoshi gashoon shaacciyeete. 55Tunebaani Isxifanoosi Yaafe Ayaanoona ceenniꞌi shimaayooch manjii ciinniꞌi, Yeerichi oogee yiiroonaa Yesuusi Yeerichi qanne badd neexeꞌi bi beemonon beeggiye. 56Aroochee “Ebiyoche, shimaayoo qecheeꞌi Ashi Bushoo Yeerichi qanne badd neexeebeeto taach bekkeebeete” iye.
57Areegaata Ayihudee nallechinaꞌo boonoshi qaaroon oogichiꞌi cookiibee boonoshi waamon uppiyeete; ikkooch tiyiꞌi bi waan woceheete. 58Biin geechii katemoyee maach kichiyeete. Miixeenaꞌo boonoshi tahoon kichiꞌi, Sawuli#7:58 Mishiraachechi Phawuloosi shigo Hibiree noonoona Sawuli getteehe. getteebeeti ikke gurimaashoo aafooch geddiichii, Isxifanoosin xaqqoona yexooch giyiheete.
59Arooba Isxifanoosi xaqqoona yexxeebee, “Ta Doono Yesuuso, ta kasheen deꞌe” iꞌi qollehe. 60Guteneꞌi, “Ta Doonocho, hini axaaxoon boonoshi toommooch haddiyaahine” iꞌi oogichii cookiye. Ishichiichii qitiye.
ទើបបានជ្រើសរើសហើយ៖
Mishiraachechinaꞌo 7: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
