Mishiraachechinaꞌo 5
5
Hanaaninaa Sapphiirina Koottiti Kooto
1Hanaani getteebeeti ikke uro bi mechee Sapphiirina tookkii tuneꞌi bi showoon kemmiye. 2Hini are showoo kecheti gijjoochee bi mechee arii beetaa, bi qellich qoodii echiichii, eche gijjoon deebii mishiraachechinaꞌoyich immiye.
3Tunetaa Pheexiroosi ishichiye: “Hanaano, Yaafe Ayaanoyich kootiree showoon ne kemmeti gijjoochee ne qellich ne echiyemmoyich Sheexaanoon ne mullooch aakka giijjinne? 4Kemaani ne beehooba, showoo ne hajjoo toone? Ne kemmetoyee gubb, gijjoo ne bullo toone? Ebiyoommi mooyon amoyich ne mulloona gabinne? Yeerichalli, ashich kootaano neene” iye.
5Hanaani ishin waayeꞌi bekkech dihiye; bi dihiti xaaꞌoochaa bi kasho kechiye. Ebin waayetinaꞌo bulli oogichii shattiyeete. 6Aroochee gurimaasheenaꞌo tiyiꞌi, bi dubenoon kaappiꞌi kichii daammii duukkiyeete.
7Aree hillooch keejje saato bedditoyee gubb, Hanaani mechee wotta hini bi keno toommooch shaggiti mooyon batt ariyaan beebee, are kexooch waahan. 8Bi giyemmona Pheexiroosi tiyiꞌi, “Eke taach gete: Ittoshi showoon ittoshi kemmito, ebinane?” iꞌi echehe.
Areyoo wochaꞌa, “Eeha ebinane no kemmeto” iyan.
9Aroochee Pheexiroosi “Doono Yeerichi Ayaanoon dawushoyich aakkiya ikkottehote? Ebeege, ne kenoon duukkiti asheenaꞌo shaggitinaꞌone; neenoo wotta kichiree duukkemminaꞌone” iye.
10Areyoo bekkech Pheexiroosi baatooch dihaꞌa qitiyan. Gurimaasheenaꞌo wottee kexooch giyiꞌi, qitaꞌa beetin daneheete; kichiꞌinoo bi kenoochi gaꞌooch duukkiyeete. 11Arooba Yesuusichi asheenaꞌonaa ishin waayeti bare asheenaꞌo bullinochi maacooch oogeti shato giyiye.
Mishiraachechinaꞌochi Kishoona Meeti Biiyechinaꞌo Wodoo
12 Mishiraachechinaꞌochi kishoona meeti worganikkiti malletoonaa gaakkechi shuunoona asheenaꞌo daggooch tunee beehe. Bulli ikke mulloona tuneꞌi, Solomoonichi Genje Gaaddaafooch kicee beeheete. 13Boonoshi waan wotteyaaneenaꞌo daggoochee koniyoona boonoshi daggooch gimoyich aafoon kuppheto aalloone. Tunetaa asheenaꞌo boonoshin oogii beeheete. 14Boonoshi mulloon Doono Yesuusi toommooch tooꞌiiti meeti anaaminaꞌonaa maacheenaꞌona aafichoyee beshoon Yesuusichi asheenaꞌo daggooch daakkeeheete. 15Asheenaꞌo biiyechinaꞌon gommooch kichiꞌi shaaꞌoonaa yeebboonooch qeejjii beeheete. Ebin boonoshi tuniito, Pheexiroosi aroona beshemmona bi yiirittolla ikkikkeenaꞌo toommooch bi yiiremmoyichiye. 16Wotta Yerusaalemi guudoona beeti gishiishi katemoochee biiyechinaꞌonaa maachi biiyo yechii iritii xuuxiitinaꞌonon deebiti dofee asheenaꞌo kiceeheete; biiyechinaꞌo bulliyoo wodiyeete.
Mishiraachechinaꞌo Toommooch Moochi Timo
17Arooba qeeshee guudoonaa biinna tookkii beeti Saduuqee guuphi asheenaꞌo bullina oogeti qanaatoona mishiraachechinaꞌo toommooch tiyiyeete. 18Boonoshinoo yechiꞌi, cuyee kexooch cuchiiheete. 19Boonoshi cuchiiti aroobee xum, Doonochi maraakoo cuyee kechi kelleenaꞌon qechii boonoshin maach kichiꞌi, 20“Hamiree yaafee kexooch neexeree, hini kashee qaaree bulli mooyon asheenaꞌoyich getote” iye. 21Mishiraachechinaꞌo ishin waayeꞌi maaddoona yaafee kexooch giyiꞌi, Yeerichi qaaroon asheenaꞌoyich dojjiyeete.
Tunebaani qeeshee guudoonaa biinna tookkii beetinaꞌona, kaacheti nallechinaꞌon, Israꞌeelee showee geeneenaꞌo bullinoo ceeggiꞌi, ikkooch kiciyeete. Mishiraachechinaꞌon boonoshi deebemmoyich asheenaꞌon cuyee kexooch wocheheete. 22Tunetaa wocheeti asheenaꞌo cuyee kexooch hammiꞌi mishiraachechinaꞌon mucceheete. Wotteꞌi ishichiyeete: 23“Cuyee kexooch hammaa shaggaꞌa, cuyee kechi kelleenaꞌo gaawichii tuggeechaa, quyechinaꞌo kellooch neexeꞌi boonoshi beetaa danehone; qechaa giyaꞌa, bi maacooch boonoshi daggoochee koninolla muccehone” iꞌi gettiyeete. 24Yaafee kechi kellechinaꞌochi ukkiroonaa qeeshee ukkireenaꞌona hini mooyon waayeꞌi, “Hini mooyo gubb amo bi tunemmo gaata ariyaachone” iibee boonoshi gettemmi mooyon mucceheete.
25Areegaata ikke uro waaꞌi, “Ebiyoche, yiich ittoshi yechii cuchiiti asheenaꞌo yaafee kexooch neexeꞌi, asheenaꞌoyich dojjii boonoshi beetaa beeggaꞌa waahoye” iꞌi gettiye. 26Aroochee bekkech yaafee kechi kellechinaꞌochi ukkiroonaa ikkikke bi naayinaꞌona hammii, mishiraachechinaꞌon yechiꞌi deebiyeete; boonoshi deebito giidoona toonoone. Ebiyoo “Asheenaꞌo noon xaqqoona yexxemminaꞌone” iꞌi boonoshi shattitoyichiye.
27Mishiraachechinaꞌon deebiꞌi, Ayihudee nallechinaꞌo aafooch neechiyeete. Aree hillooch qeeshee guudo boonoshin, 28“ ‘Hini ittoshi ceeggiibeeti shigoona asheenaꞌoyich dojjiyaahote’ iyaꞌa manjaayaa ittoshich getaano noone? Ebiyoche, Yerusaalem beetinaꞌo bullich bechitote. Are uroochi damee naboona no echeyemmoyich tuniiya qaawiibeeto ittoshine” iye.#Maat. 27:25
29Pheexiroosinaa bare mishiraachechinaꞌona wochiꞌi ishichiyeete: “Ashich deꞌa no getoyee Yeerich deꞌa no geto tunibede mooyone. 30Mixooch yooddiiꞌi ittoshi wuxiiti Yesuusin no qaabbechinaꞌochi Nuggishoo qitoochee tiijjitone. 31Biinoo Yeeri axaaxee gommoochee bi waan wottoonaa maaroonon Israꞌeeleenaꞌoyich bi immemmoyich, bullichi Shimboonaa Wodiyechonon tuniiꞌi bi qanne badd kotiitone. 32Ebi mooyinaꞌoyich no miixoo noone; wotta Yeerich deꞌa ii beetinaꞌoyich bi immiti Yaafe Ayaanoo miixoone” iyeete.
33Ayihudee nallechinaꞌo ishin boonoshi waayetoyich oogichii ippeꞌi, “Hini asheenaꞌon wuxibone” iyeete. 34Tunetaa asho bulli oogiibeeti Muusichi Sheeree dojjechi Gamaleeli getteebeeti ikke Farisoo boonoshi daggoochee tiyiꞌi, “Ikke wottoon hini asheenaꞌon maach kichibote” bi itoyee gubb, 35Ayihudee nallechinaꞌoyich ishichiye: “Hini Israꞌeeleenaꞌote, hini asheenaꞌo toommooch halloyich ittoshi gabiti mooyoochee ittoshi qelloon quyebote. 36Ebiyee aaf Tiyodaasi getteebeeti uro ‘Ta oogoo taane’ iꞌi bi tiyaa, awudde ball bede asheenaꞌo biinna tookkii ikkotteheete. Tunetaa hini are uro ashi kishoona qitiye; biinna tookkii ikkottetinaꞌo bulliyoo shacee aalleheete; mooyoo duubee echehe. 37Aree hillooch, asheenaꞌo haddeehooba, Galiilechi Yihudi tiyiꞌi meeti asheenaꞌon dabbiitone; aroo wotta ashi kishoona qitiye; biin dabbitinaꞌo bulliyoo shaceheete. 38Andoo ittoshich gettoye: Hini asheenaꞌochi achooch shaggaahote, qayote. Hini shalligoo woyee hini mooyo ashi waanee tuneto gaata aallemmone. 39Yeer waanee tuneto gaatoo, boonoshin aalliyoon hakkaachote; hini mooyo Yeerina tookkii kaareꞌi koyo ittoshich tunemmone” iye.
Ayihudee nallechinaꞌo Gamaleelichi yibbaatoon waayeheete; 40aree hillooch mishiraachechinaꞌon boonoshi waan ceekkiiꞌi, arengoona xoobbiyeete. “Yesuusichi shigoona guttinnoon yibbaateyaahote” iꞌi gawukkiyeete.
41Ebich mishiraachechinaꞌo Yesuusichi shigoyich hoxeyoyich bedditinaꞌo tuneꞌi boonoshi haddeetoyich emiriibee Ayihudee nallechinaꞌo aafoochee kechiyeete. 42Ebiyee gubb, qemi qemona yaafee kexonaa kexi kexonooch guuddiꞌi, “Yesuusi aroo Kiristoosine” iibee mishiraachee qaaroon asheenaꞌoyich dojjoonaa yibbaatoonon kuxaanoon beeheete.
ទើបបានជ្រើសរើសហើយ៖
Mishiraachechinaꞌo 5: KBRC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
SIM International, 2020.
