Mbete Zak 5
5
1A woiri nzuk va̧nari, í te wuri suk. Í vuh mun, í vuh rew ɓay koseh ké ti̧h tul woiri-ay. 2Fe ziŋna woiri pu-puŋ. Gar woiri ké ku̧ vul, si̧niri su̧-su̧. 3Lari lɔr woiri ke lari woiri ko gay. Ɓeɓna-u-aw ɓa fe tehɓay tul woiri mí ɓay ruklu wuri kandɔk hɔrɔ ké ruklu sa̧w kpuh kaŋ, a woiri ké i mbu̧h fe ziŋna woiri ɓil sew a ɔh tɔru-ay.
4Í ko lari pihna ké i gɔɓrɔ nzuk-laɓ pihna waka woiri. Tiri-u mgbe wɔsɔk wɔsɔk hi̧ Gaŋ tul gaŋri lah. Vuhna nzuk-vbeh naŋ woiri toh suk ye Gaŋ tul feri riw. 5I kaɓ ɓil bela ké tukala-ay. Fe ké rih law woiri, i la-laɓ. I hɔl mun woiri hu̧h taɓ taɓ geŋ nam-vbeh nday#5.5 Nzuk goso fe tuna mbete Ŋgerzah a haniri ɓahri, nam-vbeh nday ɓa nam ké nzukri i fe hɔlna, mí nzukuri kerɓay tul ko̧hkori ya. Ku su̧ ma ɓil ke hȩk. Nzuk goso fe tuna mbete Ŋgerzah a ɓoruri ba, ɓahri, namu ɓa nam-kuŋ salɓay a luki ké ƴo gina.. 6I kuŋ salɓay kan tul nzuk mbaŋ woiri ké ta ke ɓay ziŋ wuri ya. A ye ké-e kpuh tul ziŋ wuri ya kara i i ni.
7Kaŋaw ba, yi̧n biri, í ik law ɓil koseh woiri ge, í geŋ gina Gaŋ tul feri riw. Í ko nzuk pay. Ke ƴo ɓaŋ law te tul fe pay waka ye ur ke mbam dɔh ka̧h sar mbam tul nzak kew. 8A woiri kara í ik law kaŋ pi, í su̧ law ɓay fe le, gina Gaŋ tul feri riw ɗih ya. 9Yi̧n biri, í ŋgu̧hru ɓay ke riŋ haniri ya rɔkɔ í ziŋ ɓay. Í ko nzuk-kuŋ salɓay ƴo nzak vul da.
10Yi̧n biri, í ker ɓay tul gun nzak pihna Ŋgerzah a lewsa̧ri. Ku ɓah nzak pihna ke riŋ Gaŋ tul feri riw, ku koseh mbamba, mí ku ik law ké tulu. 11Í ko, nah ɗi nzukri ké ɓer gi̧w tul Gaŋ tul feri riw ɓa gun pol tehnari. I lah fe ké laɓ Zoɓ#5.11 Ɓay tu ɓay Zoɓ, í ki̧ mbete Zoɓ. lewsa̧ lah. Ke ɓer gi̧w, ke el fal ya, mí Gaŋ tul feri riw hi̧ fe-u ɔh ɓa suki ɓay fe le, lawsuki ke law in ɓa mun Gaŋ tul feri riw.
12Fe-uri gbam ƴo pol woiri da. Le yi̧n biri, nzak woiri ɓá ti̧h ke fe hahna ya. Í hah mbam ya, í mgba tusiɓa hah keni fe ya. Fe a suŋ suŋ kara í hah keni fe ya. Nzak woiri ɓá na ɓa mbew yaŋ. Nzak woiri ɓahri, « yi̧h » mini « u̧-u̧ » dale, í ƴo tulu rɔkɔ salɓay ɓá mgba wuri. 13Nzuk mbew ké sakra woiri ƴo ɓil koseh le, ké goŋ Ŋgerzah. Law nzuk a ɓoru rih ni le, ké ɗi siŋ-pir Ŋgerzah. 14Ké sakra woiri, nzuk a hani na sena le, ké ɗi ŋgernzuk vul misoŋri, kú goŋ Ŋgerzah ɓay tul ye, kú suh num ke riŋ Gaŋ tul feri riw ku̧ tul ye. 15Goŋna nzuk ké law ye ƴo mbew ke Ŋgerzah ɓay ya̧ nzuk sena-u. Gaŋ tul feri riw ɓay ɔr ni ƴo síɓa. Salɓay sena-u kara ke lú ké tul ye ma fal pi. 16Kaŋ dale nzak woiri ɓá ten ketina woiri hi̧ haniri. Í goŋ wuri Ŋgerzah ɓay tul haniri pi hi̧ í ziŋ mun gahna. Vuhna nzuk ké tu Ŋgerzah ɓa záh ye ƴo laɓ pihna. 17Eli a lewsa̧#5.17 Eli ɓa gun nzak pihna Ŋgerzah a lewsa̧. Ɓay tu ɓay Eli le, í ki̧ Mbete 1 Rois mah-u 17 si ka̧h Mbete 2 Rois mah-u 2. ɓa nzuk pirmatul kandɔk a wah kaŋ, mí ke goŋ Ŋgerzah ke law mbew ɓay mbam ɓá to ya, mí mbam to ya ra gaŋ ba, laɓ mbihmbam say ke few tɔtɔklɔ. 18Ke el goŋ ni ra ɓáy, mí mbam to hi̧ fe payri ŋger ké tusiɓa. 19-20Yi̧n biri, gelke nzuk a hani reh ful, mí nzuk a ɓoru el ziŋ ni gi le, í tu wuri ɓa teh-u, nzuk ké ten nzuk ké vbol mahful el gi ɓil ketina ra, ke ya̧ mun nzuku ke ndɔk hul. Su̧hru si ma pol ya.
ទើបបានជ្រើសរើសហើយ៖
Mbete Zak 5: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.