Mbete 1 Piyer 1
1
1A bi Piyer gun nzak pihna Ŋgermbay Zezu, mi vbeh mbete-ay hi̧ wuri a woiri ké riŋ Ŋgermbay kan tul woiri, ké i zikri el kaɓ ɓa nzuk a gi-uri ké tusiɓa Poŋ, Galaɗ, Kapados, Azi, Bitini. 2I ɓa sa̧wnzuk Ŋgerzah ké kaɓ ɓa nzuk a gi-uri kandɔk ké Bah wah Ŋgerzah tu ɓayu pol sa̧. Tempuki teh wuri ɓa nunu a Ŋgerzah ɓay í lah nzak ye, mí sem Ŋgermbay Zezu ŋga̧h wuri ziŋ ni. Lawsuki ke ɗeŋ ɓá seh ma pol pol hi̧ wuri.
3-4Nah el ke tumbɔl hi̧ Ŋgerzah ɓay mgbɔkɔ ye, a ye ké-e ɓa bah Ŋgermbay Zezu Gaŋ wah. Tumbɔl law in a luki ké-e mgba ziŋ na, ke mbuŋ na gi rih ɓil ɔkna. Mbuŋna wah a foyu ra kal ke ful ti̧hna Ŋgermbay Zezu ke puh záh ke pa̧ymun a foyu. Ɔkna ra ɓa fe baah ké nah ƴo geŋu. Fe Baah-aw ra ta sih ya, ta ko gay ya, seh kara ta mbi ŋgerna-u ya pi. Baah ƴo kɔr geŋ wuri ké nunmbam. 5A woiri ké Ŋgerzah ko kona ma tul woiri ke huhrumun ɓay law woiri ké te sa tul ye hi̧ i ƴo ke ɔkna ɓa suki. Ƴona woiri ké lek da-aw ɓay ten mun sew a ɔh tɔru.
6Law woiri rih wuri rih ɓay tulu. Mí aŋay ba, sam fe-leh lawri ɓoɗ ɓoɗ ké se law ɗɔk ɗɔk ƴo ziŋ wuri. 7Fe-leh lawri-aw ɓay hi̧ ketina law woiri ké i te sa tul Ŋgermbay ra ɓá ndu̧y. Ndu̧yna-aw mba ndu̧yna lari lɔr kú-u vbo ke hɔrɔ ɓay lu vbi̧ri-u poŋ munu. Lari lɔr ɓa fe a kpakpaŋu mí ɓay zi-u. Law woiri ké i te sa tul Ŋgermbay ba, ŋger mba lari lɔr mba-mba, mí su ɓay hi̧ fe-leh law ɓá ziŋ wuri dara pirna, dimna, riŋ ɗina ɓay mgbe-u ke seh ké Ŋgermbay Zezu ɓay ten mun ké nun nzukri. 8A ye ké i ko ni ke nun ya kara i sa ni, ké i ko ni aŋay ya ɓáy kara law woiri te sa tul ye, mí i zay mun ke sam law rihna ké nzuk mah ɓah ɓayu ya, ké mah riŋ ɗina Ŋgerzah. 9I ƴo mgba ɔkna ke pa̧ymun a foyu ra ɓa fe gama kanlaw woiri ké na sa tul Ŋgerzah.
10Ɓay káɓ ke pa̧ymun a foyu ra, gun nzak pihna Ŋgerzah a lewsa̧ri faŋ sa̧wu. Ɓay lawsuki ké Ŋgerzah laɓ ziŋ wuri-ay, Tempuki ɓaŋ ɓayu lewsa̧ ndoh ɓil law woyri, mí ku fakla ɓayu ɗaka ɗaka. 11Tem Ŋgermbay ndoh ɓay ɓil law woyri lewsa̧ te-teh ɓay koseh ké ɓay ziŋ ni ke ɓay riŋ ɗina ye ké gi doro-u, mí ku fakla ɓay tu ani mí fe-u ɓay kalu ke sa̧wseh a suŋ. 12Ŋgerzah ten sa̧wɓayay hi̧ niri tu ɓahri, nzak pihna kú-u ɓah-aw, ɓayu ta ɓa ɓay woyri nzuk a lewsa̧ri ya. Le ɓa ɓay woiri nzuk a guri-ay. Mí aŋay le Tem lawpuki ké ur ke nunmbam gi te-teh ɓayu ke nzak nzukri ké ka-kah-u hi̧ wuri i lah. Nun tem nzak pihnari kara pu pih ɓay tu sa̧wɓayay.
13Kandɔk ké ɓayu guh law woiri da, ké i mgba tul woiri da, í ɓaŋ law woiri te sa tul lawsuki a a̧y ké ten mun ke gina Ŋgermbay Zezu. 14Lewsa̧ kerɓay woiri ra̧-ra̧h, i ƴo dih fal fe laɓna ɗaka fe tukalari, mí aŋay i ɓa gun Ŋgerzahri ɓay lah nzak ye, í dih fal ɗaka fe-uri mba. 15Baah Ŋgerzah nzuk lawpuki tu riŋ hi̧ wuri ɓa gun yeri. A woiri kara í si siŋ sina nzuk lawpukiri. 16Ɓay fe le mbete Ŋgerzah ɓahri : Í na ɓa gun lawpuki kandɔk ké mi ɓa nzuk lawpuki#1.16 Ɓayay na ɓil Mbete Lévitique 19.2 ke gel ki̧na a ɓoruri ɓa ŋgi̧-u pi..
17A ye ké i ɗi ni « Baah », ke lu nun gun yeri ya. Ke ƴo ndar gun a suŋ suŋ mah ke fe laɓna ye, fe laɓna ye dale, í hȩk ni ke siŋ sina woiri ké tukala-ay ké ɓa gel gahru woiri. 18Ɓay fe le i tu wuri tu, ta ɓa lari a kpakpaŋuri ké ɓay ɓe-ɓeɓ kandɔk lari lɔr mini lari a ɓoru mí soh tul woiri ɓil kɔk fe laɓna sa̧w woiri ya. 19Le sem Ŋgermbay ké ɓa sem fe puhna ké ŋge-ŋgere mí soh tul woiri. Ke ɓa gun sami a suki ké ndɔh mah nun Ŋgerzah, mí Ŋgerzah ya̧-ya̧. 20-21A ye ra, Ŋgerzah tu ni kandɔkaw dara mí nunmbam ke tusiɓa laɓ ɓáy. Sew a ɔh tɔru-ay, ke ten mun ɓay suki woiri ké i ƴo mbew ke Ŋgerzah ɓay riŋ Ŋgermbay. A ye ké Ŋgerzah ten ni ké sakra hulri hi̧ riŋ ɗina ye mgbe mí law woiri te sa tul Ŋgerzah. Kerɓay káɓ ke pa̧ymun a foyu kara i ƴo geŋ ké ta̧w Ŋgerzah pi.
22Kandɔk ké i ya̧ ketina mí law woiri el pu mah nun Ŋgerzah ɓay í mbi law sana dan foh dale, í sa haniri law mbew kpatara. 23Mi̧hri-mbuŋ wuri ɓa nzuk pirmatul a foyu ra, hu hul kandɔk mi̧hri mbuŋna woiri a pol ya. Mun mi̧hri-u ké mbuŋ wuri ɓa ɓay Ŋgerzah ké ƴo ke ɔkna ɓa ŋgɔh kpatara#1.23 Su ɓay mgba gel ki̧na-ay tuh ke Mbete Za̧h 1.1 ke Mbete Zak 1.18 ke gel a ɓoruri ké ɓah si tul ɓay.. 24Sa̧wu mí ku vbeh lewsa̧ ɓahri se :
Nzuk pirmatulri gbam na kandɔk gay fe.
Ndɔhna woyri na kandɔk funa fe.
Gay fe ri̧h sɔrɔrɔ,
Funa fe ba, rol.
25 Mí ɓay Gaŋ tul feri riw na ɓa ŋgɔh # 1.25 Ɓayay na ɓil Mbete Esaïe 40.6-8..
Ɓay ké mbuŋ wuri ra ɓa ɓaysuki ké i lah.
ទើបបានជ្រើសរើសហើយ៖
Mbete 1 Piyer 1: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.