Mbete Zak 4
4
1Fál suŋ mí ŋgermuri ur keni ké sakra woiri le ? Ɓa-ɓalari kara ur ke suŋ le ? Sa̧wu ɓa sa̧y feri ké ƴo ruh ké mun woiri. 2Law woiri tasa̧y fe, mí i ziŋ ya. Law woiri si̧h ɓay tul feri, sere mbah law woiri, mí i ziŋ fe-uri ya. I toŋ ɓal haniri, i toŋ i haniri. I ziŋ ya ɓay fe le, i goŋ Ŋgerzah ya. 3Mí gelke i goŋ ni kara i ziŋ ya ɓay goŋna woiri ké teh ya. I vbi ni ɓay í su̧ ma ɓil woiri kaŋto.
4A woiri i dih fal záh a ɓoru kandɔk wu̧y ké ti̧h si mbi wo̧ro a ɓoru. I tu wuri ya le wo ? Mgbá ya̧h ke tukala ɓa ruh ŋgermu ke Ŋgerzah. Nzuk a suŋ suŋ ké mgba ya̧h ke tukala le, ɓa nzukbaa Ŋgerzah munu. 5Uwa. I ker ɓahri se, ɓay ké na ɓil mbete ɓa fe gel garu ley ? Mbete-u ɓahri, Ŋgerzah ké hi̧ Tem ye ɗeh puh ɓil law wah ra, mahkeh ye ta-a. Ke kaɓ puh-u ke hȩk ye. 6Lawsuki a ɓoru ké Ŋgerzah laɓ ziŋ na ƴo ri mí ŋgi̧ mbamba ra ɓáy. Sa̧wu mí mbete ye ɓahri, Ŋgerzah ƴo ik tul nzuk-hu̧h tulri ma siɓa, nzuk-ɗiŋ tulri ba, ke ƴo laɓ lawsuki ziŋ niri#4.6 Ɓayay na ɓil Mbete Proverbes 3.34..
7Kaŋaw mí í hȩk wuri Ŋgerzah, í ɓer gi̧w ruh ŋgermu ziŋ mbay záh tukala ba. Le ke ɓay ɗuk ké ta̧w woiri. 8Í si ta̧w Ŋgerzah, ke ɓay nzɔh nun woiri. Í wɔk ndɔk woiri nzuk suyari. Nzuk law seɗeri, í hi̧ law woiri ɓá teh. 9Í laɓ mun woiri ɓa seh, í vba̧ haŋ woiri zaɗ zaɗ, í vuh rew ke mbihnun mgbɔk mgbɔk. Sakna woiri ɓá ti̧h ɓa mbihnun. Law rihna woiri ɓá ti̧h ɓa su̧hru ŋgu̧y ŋgu̧y ma. 10Í ɗiŋ wuri tul ké nun Gaŋ tul feri riw, ke ɓay ɔr tul woiri.
11Yi̧n biri, í ɓeɓ riŋ haniri ya. Nzuk ké mbi riŋ mbaŋ ye ɓah keni ɓay suya mini ke laɓ ɓay kan tul mbaŋ ye le, ke mbi ɓay Ŋgerzah ɓah keni ɓay gɔr gɔr, ke laɓ mun ye ɓa nzuk-kuŋ salɓay tul bolkusol Ŋgerzah munu. Nzuk ké kuŋ salɓay tul bolkusol le, ɓa gun-hȩk bolkusol ya, mí ke laɓ mun ye ɓa nzuk-kuŋ salɓay bolkusol. 12Mbay tul bolkusol mí ɓa nzuk-kuŋ salɓay mbew yaŋ. A ye mí ke mah ya̧ nzuk ke ndɔk hul mini zi nzuk. Dale a wo mu ɓa ge mí mu laɓ ɓay kan tul nzuk mbaŋ wo lo ?
13Í te wuri suk, a woiri ké i ɓah ɓay ɓahri : « Guri gaŋ, ta-a le, pele pele nah tɔ́r si gel a ɓoru. Nah káɓ ri mbihmbam mbew, nah ɗám fe yehna kari kari, nah zíŋ mbihlari-u. » 14Kaɓna woiri ké tusiɓa-ay ɓay na ani le, i tu ya, ɓayu ké kaɓna woiri na kandɔk gel ɗerna ké ɗer, ndi̧ le, el fa̧h. 15Su-su ɓay ɓahri : « Gaŋ tul feri riw yih, mí ke hi̧ nah kaɓ ɓáy le, nah láɓ fe kandɔkay kandɔkay. » 16Wara mí i ƴo vba̧ haŋ ndagiri ke ɓay ɓahna woiri-aw. Sam vbá̧ haŋ a kandɔkaw ɓa fe a pipiri-u. 17Kaŋ dale nzuk a a̧y ké tu suki ké-e mah laɓu, mí ke laɓ ya le, salɓay suya na tul ye.
ទើបបានជ្រើសរើសហើយ៖
Mbete Zak 4: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.