Mbete Fe laɓna Tempuki 19
19
1Seh ké Apolo ƴo Kɔrente-aw, Pɔl ba, mbi mahful tul kasaw si ka̧h Efeze. Ke ziŋ nzuk-dih fal Ŋgerzah a haniri ké ri. 2Ke vbi niri ɓahri : « Seh ké i ya̧ ɓay Ŋgermbay ra wa, i tu ke mun woiri ɓahri, Tempuki ɓa záh woiri, tu-tu le ? »
Ku yih nzak ye ɓahri : « Bɔk mbew wah gel lah ɓay Tempuki ya. »
3Mí Pɔl el vbi niri ɓahri : « A̧w ba, batem a suŋ mí i ti̧h wuri ɓilu le ? »
Ku yih nzak ye ɓahri : « Nah ti̧h ɓil mbih batem nzuku a Za̧h. »
4Pɔl ɓah hi̧ niri ɓahri : « Za̧h soh ziɓri mbih batem nzuku a mbilaw ɓay kú mbi law woyri el kan law tul Ŋgermbay woyri ké-e ƴo gina. Í lah, Ŋgermbay ra gi da. Ke ɓa Zezu. »
5Ku lah ɓayu lah, mí ku ti̧h mbih batem Zezu, Gaŋ tul feri riw ɓa nzuk yeri. 6Pɔl ɓaŋ ndɔk kan tul woyri, mí Tempuki gi rih tul woyri hi̧ a ge ge le, ɓah ɓay ke nzakri ɓoɗ ɓoɗ kú-u tu ya. Ku ɓah ɓay ké Tempuki ɓaŋ ndoh nzak woyri. 7Ŋgi̧na nzukuri laɓ boh falu seɗe.
8Laɓ few say Pɔl ƴo si vul misoŋ ziɓri. Ke ƴo ɓah tehɓay lak mbay Ŋgerzah hi̧ guh law woyri, ke ƴo lu mberemu ziŋ niri kpatara. 9Mí nzuk a haniri ba, kpuh tul. Ku ƴo ɓeɓ ɓay mahful si ta̧w Ŋgerzah ké pol daɓa nzukri ɓahri, Zezu ta ɓa Ŋgermbay ya. Mí Pɔl lu mun ye ké haŋsekle woyri. Ke fa̧h nzuk-dih fal Ŋgermbayri si mbu̧h niri ké likol. Likolu ɓa likol nzuk a hani kú-u ɗi ni ɓa Tiranu. Pɔl ƴo lu mberem Ŋgermbay namri gbam ziŋ niri ké ri. 10Ke laɓ kaŋ kaŋ mbihmbam seɗe hi̧ ziɓri ke sa̧wnzuk a ɓoruri ké kaɓ tusiɓa Azi gbam lah ɓay Gaŋ tul feri riw. 11Ké ɓil mbihmbamu-aw, Ŋgerzah hi̧ Pɔl laɓ fe saŋ a mba-mba-uri pi. 12Nzukri fa̧h nzak gar pihna ké Pɔl ndoh si za keni nzuk senari le, sena woyri gah poŋ niri, záhri kara ti̧h ké tul nzukri pi.
13-14Ziɓ a hani ké ɓa ŋgernzuk fe puhna, riŋ ye ɓa Seva. Ke ƴo ke gunri toŋndɔk say. Gun yeri ɓa nzuk sa̧wkpuhri. Ku ha̧rma ƴo ni̧h záhri ké tul nzukri, mí nam mbew, ku mbi riŋ Zezu, Gaŋ tul feri riw. Ku rih tul nzuk a hani ké záh ƴo tul ye, mí ku ɓahri : « Ke riŋ Zezu ké Pɔl ƴo sɔk ɓayu ra, nah ɓah hi̧ mu, mú ti̧h. »
15Záh ké ƴo tul nzuk ra yih nzak woyri ɓahri : « Zezu le, mi tu ni tu. Pɔl kara, mi ko ni ko pi. Mí a woiri ba, i ɓa geri le wo ? »
16Nzuk ké záh ƴo tul ye ra, ur ziŋ niri katal ke nzak. Ke mba niri ke ŋgerna. Ke vba̧ niri ku̧ mbeleŋ mbeleŋ, ku ɗuk ndiwri ndiwri.
17Ziɓri ke sa̧wnzuk a ɓoruri gbam ké kaɓ Efeze-aw ra lah ɓayu bale, hȩkme laɓ niri, mí ku pir riŋ Ŋgermbay Gaŋ tul feri riw pir. 18Mí daɓa nzukri ké kan law tul Ŋgermbay gi ten ɓay fe laɓna su̧hru woyri, ku sɔk ɓay sa̧wkpuh woyri ké pol nzukri pi. 19Ŋgi̧na nzukri mah fe mí fa̧h mbete záh kú-u laɓ keni sa̧wkpuh woyri-aw gi keni ku̧ tul hani. Ku nzuh kum kum ké pol nzukri. Ku ki̧ suy lari mbete-uri le, lari-u mah lari pihna nam sɔɗ sɔɗ boh gel bon ndiɓi (nam 50.000). 20Kaŋ mí ɓay lak mbay Gaŋ tul feri riw ya̧ gel ma pol pol ke ŋgerna ye.
21Pihna Pɔl ɔh ké Efeze bale, Tempuki hi̧ kerɓay ziŋ Pɔl ɓay ké si Zurusalem. Ke kál ke tusiɓa Maseduwan ke tusiɓa Akay dara ke ká̧h Zurusalem ɓáy. Ke ɓahri se : « Mi ka̧h Zurusalem le, mah ɓay mí si ko Rɔm, puh kaɓna sezar. » 22Ke pih nzukri seɗe ké sakra nzukri ké ƴo so ni, si Maseduwan, Timote ke Arasi. A ye ba, ke ɓay kaɓ tusiɓa Azi nam ndi̧ ɓáy.
23Ke sewu-aw, baw ɓay ur ké Efeze goɗi goɗi ɓay mahful Ŋgermbay ké nzukri mbi. 24Ŋgernzuk vul tiw a hani ƴo ri. Riŋ ye ɓa Demtere. A ye mí ke tur ɓayaw. Ke ƴo tuh lari ɓa vul a mah gelu ŋgoɓ. Lari-u ŋge-ŋger. Vulu eŋ vul kani záh Artemi#19.24 Artemi ɓa riŋ záh a wu̧yu ké sa̧wnzuk gerekri ƴo dim ni ɓa ŋgi̧-u.. Nzukri ké ƴo laɓ pihna ziŋ ni-aw ya̧ lari pihna woyri ɓa ŋgi̧-u. 25Mí ke mbu̧h mbaŋ yeri, nzukri ké ƴo tuh vul kani záh Artemi pi. Ke ɓah hi̧ niri ɓahri se : « Ya̧h biri, i ko wuri ko, pihna wahri-ay mí nah ƴo ziŋ keni lari. 26I lah wuri lah, i tu wuri tu pi, Pɔlaw ra ƴo rah daɓa nzukri ké Efeze ɓahri, fe temri ké nzukri laɓ ɓay záh, ku ɓa kɔk záhri. Mí ke rah nzukri ké Efeze-ay kaŋto ya, ke rah nzukri ké tusiɓa Azi gbam pi. 27Ɓay Pɔlaw seh par par le, ta ɓa pihna wah kaŋto mí nzukri ɓay ko ɓa fe a kɔku ya. Wara le, nzukri ké Azi ke nzuk tusiɓa a ɓoruri gbam ɓay poŋ dim Artemi, záh a luki. Ku ɓay poŋ vul kani ye na ndikpo dale, riŋ ɗina ye kara ɓay gbu̧h pi. »
28Nzukri lah ɓayaw bale, law woyri fa̧h niri tuh tuh, mí ku vba̧ nzak gɔrɔm gɔrɔm ɓahri : « Artemi záh Efeze ɓa záh a luki. »
29Ɓayu ya̧ ka̧w puh ya̧h ya̧h zukru kerɓay nzukri gbam, mí ku ti̧h ke ɗukna wuh wuh ma gel-mbu̧h hani a luki. Ku mgba bɔh sina Pɔlri seɗe, Gayus ke Arisitar kú-u ɓa nzuk Masadewanri. Nzukri kɔklɔ niri kpola kpola ma gel-mbu̧h hani ra. 30Pɔl ba, yih ɓay si ma ta̧w daɓa nzukri-aw, mí nzuk-dih fal Ŋgermbayri gboh ni. 31Ŋgernzuk pihna ŋgomna a haniri ké tusiɓa Azi, ku ɓa ya̧h ke Pɔl. A woyri kara, ku pih nzak pihna hi̧ ni ɓay ké si gel daɓa ra ya. 32Pɔl ta-a, nzukri ba, zukru ɓay maŋ. A ge ge le ɓah ɓay ye si kpa̧ra kpa̧ra. Ŋgi̧na nzukri tu sa̧wɓay mbu̧hna ra ya. 33Mí ziɓri yih ɓay lu mun woyri. Ku to Aleksander kȩh hi̧ ni ke si ƴo pol daɓa nzukri. Aleksander ɔr ndɔk ɓay hi̧ nzukri ɓá poŋ suhɓay. Ke yih ɓay sɔk nzukri ɓahri, a woyri ziɓri, ku ta ɓil ɓayu ya. 34Nzukri tu ni ɓa ziɓ bale#19.34 Pɔl ɓa ziɓ. Nzuk puh Efezeri kehr haŋsekle ziɓri ya. Ku ko ziɓ ké dih fal Ŋgermbay ya mini ziɓri ké dih fal Ŋgermbay le, mah hani ké nun nzuk puhri. Ké sa̧w Ŋgermbay ɓa ziɓ, sa̧w ziɓri ke keretiyȩri ɓa mbew., ku titil vba̧ nzak gɔrɔm gɔrɔm ɓa foyu ɓáy ɓahri : « Artemi, záh Efeze ɓa záh a luki. Artemi, záh Efeze ɓa záh a luki. Artemi, záh Efeze ɓa záh a luki. »
35Ku vba̧ nzak kaŋ mah sa̧wseh seɗe bale, nzuk fe vbehna ŋgomna ziŋ ful hi̧ nzukri ɔk nzak woyri, mí ke ɓah ɓay ɓahri : « A woiri nzuk Efezeri, ɓay fe mí i vba̧ nzak kaŋ le wo ? A ge ge le tu ɓahri, nzuk Efezeri ɓa nzuk-kɔr vul kani Artemi záh a luki ké kasaw ye toh ke nunmbam ɓu puh-ay, tu-tu. 36Kandɔkaw, ma̧y ɓayu ta-a. Kaŋ dale í kaɓ ɗeŋ, í poŋ fe laɓna va̧h. 37Nzukri ké i mgba gi keni-ay ra, ku ɓeɓ vul kani záh wah ya, ku far záh wah kara ya pi. 38Demtere ke bɔh pihna yeri ƴo ke ɓay ziŋ nzuk le, gel-kuŋ salɓay ƴo puh-ay, nzuk-kuŋ salɓayri kara, ƴo ri pi. Kú si sek nzuku ma ma ri. 39Mí gelke i ƴo ke ɓay a ɓoru ké ko daɓa nzukri le, nam-mbu̧h hani a luki ké ŋgernzuk puhri kan ƴo ri. Kú lek ɓayu ké ri. 40Ŋgomna ɓay goh na ɓahri, nah ɓa nzuk-gbur puh ɓay tul fe ké nah laɓ guri-ay ɓay fe le, ɓay a hani mbew ké nah sɔ́k ɓay lu lakna ɓay mbu̧hna-ay, ta-a. »
Bol ɓay ye-aw, ke hi̧ nzukri gbakra hani, mí ku tɔr.
ទើបបានជ្រើសរើសហើយ៖
Mbete Fe laɓna Tempuki 19: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
