Mbete Fe laɓna Tempuki 20
20
Pɔl vbar nzukri
1Bol falu ké fe zɔklɔ ké Efeze ra voh bale, Pɔl mbu̧h nzuk-dih fal Ŋgermbayri. Ke hew niri ke ɓay Ŋgerzah, ke vbar niri, mí ke tɔr si Maseduwan. 2Ke ha̧rma ɓil tusiɓa-aw, ke hew nzuk-dih Ŋgermbayri ke ɓayri ɓoɗ ɓoɗ ɓa ŋgi̧-u, mí ke ka̧h keni Akay#20.2 Guri-ay, ku ɗi tusiɓa Akay ɓa Grèce.. 3Ke kaɓ ri laɓ few say bale, ke lek mun ye ɓay puh gel kaɓna ɓil kumbon ɓay si tusiɓa Siri dara, ke kál si Zurusalem#20.3 Í ki̧ Mbete Fe laɓna Tempuki 19.21 ɓay tu ɓahri, Pɔl lek ɓay kál si Zurusalem lewsa̧ da., mí ke lah ɓahri, ziɓri lek ɓay ké duh gel ɓay i ni bale, ke el ke mahful a Maseduwan ke bɔk. 4Nzukri ké ɓaŋ Pɔl, riŋ woyri mí na-ay : Sopate gun Purusi ké puh ye ɓa Bere, Arisitar ke Sekudu, puh woyri ɓa Tesaloni, Gayus nzuk Derbe, Tikus ke Torofin nzuk tusiɓa Aziri ke Timote. 5-6Ku ɓaŋ ni gi ka̧h Filipi ké tusiɓa Maseduwan. Ku poŋ ni ziŋ mi#20.5-6 Í ki̧ Mbete Fe laɓna Tempuki 1.1 ɓay tu ɓahri, Luk mí ɓa nzuk-vbeh mbete-ay., ku kal si geŋ na ké Torowa. A wah ba, nah kaɓ Filipi geŋ ti̧hmbih-i guy buma dara mí nah puh gel kaɓna ɓil kumbon ɓáy. Nah laɓ nam ndiɓi, suŋ ke seh ké tul mbih, mí nah ka̧h Torowa. Nah ziŋ niri, nah kaɓ ri dimasi mbew. 7Seh dimasi-aw, a wah nzuk-dih fal Ŋgermbayri nah mbu̧h hani ɓay gɔh peŋ#20.7 Ɓay tu ɓay gɔh peŋ, í ki̧ gun ɓay ké si ke gel ki̧na Mbete Fe laɓna Tempuki 2.42., mí Pɔl ƴo lu mberem Ŋgermbay ziŋ nzukri. Ke ɓah ɓay kpu̧ru kpu̧ru ka̧h haŋgel ɓayu ké pele le, nah tɔru. 8Nah mbu̧h hani ké ɓil vul a fál síɓa. Lamperi ŋgi̧-ŋgi̧ ƴo teh gel. 9Gun seke a hani, riŋ ye ɓa Yutuku, ke kaɓ fenetere. Nam duk ni mgbu̧ra mgbu̧ra. Pɔl ba, toŋ ɓah ɓay ma pol pol bale, nam kal Yutuku yek, mí ke lih ke fal nzarvbay toh buɓ ɓu kala ɓa hul. Ku ɔr ni le, ke hu da. 10Pɔl ɗer mí ke guɓ tul hul ra. Ke mbi ni, ke el ɓah hi̧ nzukri ɓahri : « Í ɔk nzak woiri. Ke ƴo ke nun. »
11Ku el hil si ɓil vul ra ɓáy, nah gɔh peŋ, nah su̧ fe ke haniri. Pɔl mbi nzak ɓay ye ɓah kpu̧ru ka̧h gel tipele ké fa̧h hoh, mí nah tɔr. 12Nzukri maŋ gun seke ra tɔr keni ke law rihna a luki.
Pɔl vbar ŋgernzuk vul misoŋ Efezeri
13A wah ke Sopateri, nah puh gel kaɓna ɓil kumbon, mí nah tɔr si Asos. Pɔl ba, ko su-su ɓay si ke bɔk. Nah lek ɓay ziŋ haniri ma Asos. 14Ke ziŋ na ké ri, nah mbi ni kaɓ ɓil kumbon kaɓna wah, mí nah tɔr si ka̧h Mitilin. 15Tipele, nah ur ké Mitilin si ka̧h Kiyos. Tipele a ɓoru, nah si ka̧h Samos. Nam a ɓoru ɓáy, nah ka̧h Mileɗ. 16Pɔl sa puh gel kaɓna ɓil kumbon ké ɓay si ma Efeze ya, rɔkɔ nam ye ɓá ŋgi̧ ké tusiɓa Azi. Mahful ƴo ri le, ké ka̧h Zurusalem dara ti̧hmbih Pandekoɗ ɓá laɓ ɓáy. 17Ké Mileɗ, Pɔl pih ɗi ŋgernzuk vul misoŋ Efezeri. 18Ku gi, mí ke ɓah ɓay hi̧ niri ɓahri : « Ke ka̧hna bi da̧y ké tusiɓa Azi-ay, i tu wuri mi ke siŋ sina bi ké sakra woiri tu pi. 19Mi laɓ pihna hi̧ Gaŋ tul feri riw ke mbihnun pi ke ɗiŋ tul hi̧ nzukri pi. Kosehri ɓoɗ ɓoɗ pi mí ziŋ mi ɓay ziɓri ké lek ɓay i mi. 20-21I tu wuri pihna ké mi laɓ tu-tu. Fe-ti̧h wuri suk ra, mi mu̧h wuri ya. Mi ka-kah kerɓay ké Ŋgerzah lek lewsa̧ ɓay í ti̧h ɓa gun puh lakna yeri#20.20-21 Í mgba Mbete Efezeri 3.3-6 tuh ke gel ki̧na-ay.. Mi sɔk wuri ké gel daɓa pi, ké hɔndal woiri pi. Mi te-teh ɓay Ŋgerzah hi̧ ziɓri ke sa̧wnzuk a ɓoruri ɓay kú mbi law woyri ké tul záh woyri ma fal, el kan law tul Gaŋ wah Zezu.
22Mí aŋay, í lah, Tempuki ƴo sɔkrɔ mi si ma Zurusalem. Mi tu fe ké ɓay ziŋ mi ké ri ya. 23Fe mbew ké mi tu mí na-ay : Tempuki ƴo sɔk mi puh ke puh ɓa teh-u, ŋga̧hna ke koseh ƴo geŋ mi. 24Keni-aw kara ɔkna bi ɓa fe gel garu ké nun bi. Fe ké ɓa fe a kpakpaŋu le, ɓa ɔ́h pihna ké Gaŋ bi Zezu ɓaŋ ndoh ndɔk bi ɓay mi te-teh ɓay lawsuki Ŋgerzah mí-i ɗuk keni ɓay ka̧h gbu̧h-u.
25Mí aŋay, í lah mi. Mi tu ɓahri, a woiri ké mi ha̧rma sakra woiri, mi ka-kah ɓay lak mbay Ŋgerzah ra, i ta ko mi mba wu̧m. 26-27Mi mu̧h wuri kerɓay Ŋgerzah mbew ya, mi sɔk wuri fe ké-e lek ɓay puh lakna ye gbam. Mi ƴo ɓah hi̧ wuri guri-ay ɓahri se, nzuk mbew ké sakra woiri zi le, ɓay zina ye ta tul bi mba. 28Í kɔr mun woiri, í kɔr sa̧w in Ŋgermbay pi. Ku ɓa sami ké Tempuki ɓaŋ ku̧ ndɔk woiri. I ɓa nzuk-hɔl niri, sa̧wkani Ŋgerzah, a ye ké-e ya̧ niri ke sem ye ɓa nzuku a ye. 29Mi tu ɓahri, fal tɔrna bi le, gaykoyri ɓay rih ké sakra woiri. Ku mgbá sami a haniri ɓay i niri. 30Ké sakra woiri-aw gaŋ kara, nzuk nzak rɔknari ɓay ur ké ri. Ku ra̧h ɓay a ketina ke nzak rɔkna woyri ɓay kɔklɔ nzuk-dih fal Ŋgermbayri ɓá dih fal woyri. 31Sa̧wu mí-i ɓahri se, í kaɓ ke nzakbɔk woiri. Í yȩkre ya, laɓ mbihmbam say, suŋ ke seh, mi ƴo hew wuri mbew mbew ke mbihnun ɓay lak mbay Ŋgerzah. 32Mí aŋay, mi poŋ wuri ku̧ ndɔk Ŋgerzah, mi poŋ wuri ku̧ ɓil ɓay lawsuki ye ké ƴo ke ŋgerna hí̧ wuri í hu̧h ɓa vul kani ye, ké ƴo ke ŋgerna hí̧ wuri í ɓa sa̧w ye, gun-ya̧ puh lakna ye ké-e lek ɓay tul woiri.
33Mi ɓaŋ nun bi te tul lari mini lari lɔr mini mah gar nzuk ya. 34I tu wuri tu, mi laɓ pihna ke ndɔk bi-ay mí-i ziŋ keni fe-hɔl mun bi ke bɔh sina biri. 35Fe laɓna bi gbam sɔk wuri ɓahri, kah rohna ziŋ fe so keni nzuk sehri mí su. Náh yȩkre wuri ɓay ké Gaŋ wah Zezu ɓah ra ya. Ke ɓahri se, hi̧ fe su mba ya̧ fe. Pol tehna ƴo ziŋ nzuk ké hi̧ fe. »
36Bol fal ɓay ké Pɔl ɓah ra, ke huk siɓa, ke goŋ Ŋgerzah ziŋ niri. 37Ku ku̧ rew gɔm. A ge ge le zo hak sol Pɔl hu̧hru ni ke mbihnun mbihnun. 38Ɓay ké Pɔl ɓah hi̧ niri ɓahri : « I ta ko mi mba wu̧m » ra, mí hi̧ law woyri se niri ɗɔk ɗɔk. Mí ku ɓaŋ ni si gel kumbon.
ទើបបានជ្រើសរើសហើយ៖
Mbete Fe laɓna Tempuki 20: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
