Mbete Fe laɓna Tempuki 18
18
Ɓay Ŋgermbay ka̧h Kɔrente
1Bol falu Pɔl ur ké Aten tɔr si Kɔrente. 2Ké gelaw, ke ziŋ ziɓ a hani ké riŋ ye ɓa Akila. A ye, ku mbuŋ ni ké tusiɓa Poŋ. Nam ro ya ɓáy, mí ke ur ke Rɔm ké tusiɓa Itali ke wu̧y ye Pirisil ka̧h Kɔrente ɓayu ké sezar Koloɗ mbay a luki ni̧h ziɓri ké ɓil puh kaɓna mbay ye. Mí Pɔl mbu̧h ziŋ niri. 3Ké goso pihna woyri mah hani, ke kaɓ ƴo laɓ pihna ziŋ niri. Pihna-u ɓa pihna-sa̧h ho̧ko ɓa vul a pɔru. 4Nam ɔknari gbam, Pɔl ƴo lu mberem lak mbay Ŋgermbay ké vul misoŋ ziɓri. Ziɓri ke gerekri ƴo ya̧ ɓayu. 5Silas ke Timote ur ke Maseduwan gi ka̧h bale, Pɔl poŋ pihna-sa̧h ho̧ko, ke mbi mun ye rih ɓil pihna-sɔk ɓay Ŋgermbay mbew yaŋ wara. Ke ƴo sɔk ziɓri ɓa teh-u ɓahri, Zezu mí ɓa Ŋgermbay. 6Mí ziɓ a haniri to ɓay ɓahna ye ma kpah. Ku ɓeɓ riŋ Ŋgermbay bale, Pɔl kpoh kasal gar ye#18.6 Ké ta̧w ziɓri, kpoh kasal ta ɓa mgba nazi ya. Fe laɓna-u sɔk ɓahri, ku ƴo ke hani ya.. Ke ɓahri : « Ɓeɓna woiri ɓa ɓay woiri, ɓayu ko mi mba. Aŋay, mi sí ma ta̧w sa̧wnzuk a ɓoruri wara#18.6 Í mgba gel ki̧na-ay tuh ke Mbete Ézéchiel 33.1-9.. »
7Ke ti̧h ke vul misoŋ ziɓri, mí ke si puh Titiyusi Zusteŋ. Ke ɓa nzuk-dim Ŋgerzah ziɓri. Puh ye na ɓel vul misoŋ ra. 8Kiripusi, mbay vul misoŋ ziɓri-aw kan law tul Ŋgermbay Gaŋ tul feri riw, a ye ke nzuk kerpuh yeri gbam. Daɓa nzuk Kɔrenteri kara, lah ɓay ɓahna Pɔl, mí ku kan law tul Ŋgermbay, ku ti̧h mbih batem pi. 9-10Suŋ a hani bale, Gaŋ tul feri riw rih tul Pɔl ke lɔlɔ ɓahri se : « Mú laɓ hȩkme ya. Mú poŋ nzak wo ya. Mú ɓah ɓay bi ma pol pol, mi ƴo ziŋ mu gaŋ. Nzuk mbew ké ɓay laɓ fe a se-u ziŋ mu ta-a ɓay fe le, nzukri ŋgi̧-ŋgi̧ mí ɓa mi̧hri biri ké ɓil puh-ay. »
11Pɔl el kaɓ Kɔrente laɓ mbihmbam mbew ke few tɔtɔklɔ. Ke sɔk nzukri ɓay lak mbay Ŋgerzah.
12Sew ké Galyoŋ ɓa guvener a foyu ké tusiɓa Akay, mí ziɓri mbu̧h nzak mbew bale, ku mgba Pɔl si keni gel-kuŋ salɓay. 13Ku goh ni ɓahri : « Gunwo̧ro-ay ƴo rah nzukri ɓá dim Ŋgerzah ke mahful a a̧y ké si ke bolkusol wah ya. »
14Pɔl ah haw ye ɓay ɓah ɓay wara mí guvener mbi ɓay. Ke yih nzak ziɓri ɓahri : « Gelke ɓa bolkusol tusiɓa mí ke ɓeɓ mini mgbɔrɔ mí ke laɓ le, mi yá̧ sekna woiri ziɓri. 15Mí kandɔk ké ɓa fahɓay tul ɓay ɓahna, tul riŋ feri, tul bolkusol woiri le, a woiri mí í ko ɓayu. A bi le, mi sa kuŋ salɓay a kandɔkawri ya. »
16Ke ni̧h niri ké gel-kuŋ salɓay ye. 17Bale ku el mgba Sosten mbay vul misoŋ ziɓri. Ku vba̧ ni vbir vbir ké gel-kuŋ salɓayaw. Guvener Galyoŋ ba, fer niri ya pi.
18Pɔl kaɓ Kɔrente nam mah fe dara mí ke vbar nzuk yi̧n ɓil Ŋgermbayri, mí ke tɔr. Pirisil ke Akila si ziŋ ni. Ku ka̧h Senkere. Ku puh gel kaɓna ɓil kumbon. Pɔl yih si ma tusiɓa Siri, mí ke su̧h tul ké Senkere ɓay nam-saŋ mun ye ké-e wah ziŋ Ŋgerzah ɔh da. 19Ku dah ké Efeze. Pɔl poŋ bɔh sina yeri. Ke kal si vul misoŋ ziɓri, ke lu mberem Ŋgermbay ziŋ niri. 20Ku goŋ ni ɓay ké kaɓ ziŋ niri nam ma pol ɓáy, mí ke sa-a. 21Ke vbar niri ɓahri : « Ŋgerzah yih le, mi él gi ta̧w woiri ɓáy. »
Ke el si hil kumbon, mí ke tɔr.
22Ke ka̧h Sezareh ké tusiɓa Siri, mí ke hil si Zurusalem. Ke vah sa̧w nzuk Ŋgermbayri dara mí ke ɗer si Antiyos ké tusiɓa Siri ɓáy. 23Ke kaɓ ri nam mah fe dara mí ke tɔr. Ke ha̧rma ké tusiɓa Galaɗ ke tusiɓa Firizi ƴo hi̧ nzuk-dih fal Ŋgermbayri gbam ŋgerna ƴo ke Ŋgermbay ɓa kpuh-u.
Ɓaysuki Ŋgermbay ka̧h Efeze
24Ziɓ a hani mbew ka̧h Efeze. Riŋ ye ɓa Apolo. Ku mbuŋ ni ké Aleksandere ké tusiɓa Eziɓte. Ke ɓa nzuk-tu mahful ɓah ɓay, ke ɓa nzuk goso-tu mbete vbehna Moyiz ke mbete vbehna gun nzak pihna Ŋgerzah a lewsa̧ri. 25Ku firma ni mahful ké Gaŋ tul feri riw nda hi̧ nzuk yeri ɓa teh-u. Tempuki ƴo ziŋ ni, mí ke ɓer ɓay ke mun rihna. Ke ti̧h mbih batem nzuku a Za̧h#18.25 Í ki̧ Mbete Luk 3.3-18 ɓay tu ɓay batem nzuku a Za̧h. kaŋ ɓáy, mí ke toŋ ka-kah ɓay Zezu. Ke sɔk nzukri ɓayu ke gelu gelu. 26Apolo ra ka̧h Efeze, mí ke titil sɔk ɓay Ŋgermbay ɓa teh-u ɓil vul misoŋ woyri ziɓri. Pirisil ke Akila lah ɓay ye, mí ku maŋ ni gi ta̧w woyri. Ku firma ni fulɓay Ŋgerzah ma pol ɓáy. 27Apolo yih ɓay si ma Akay, mí nzuk yi̧n ɓil Ŋgermbayri ké Efeze so ni. Ku vbeh mbete hi̧ nzuk-dih fal Ŋgermbayri ké Akay ɓay kú ya̧ ni ɓa suki. Ka̧hna ye ti̧h suk hi̧ nzukri ké kan law tul Ŋgermbay ɓay tumbɔl lawsuki Ŋgerzah. 28Ke mbi mbete vbehna Moyiz ke mbete vbehna gun nzak pihna Ŋgerzah a lewsa̧ri sɔk keni ɓa teh-u hi̧ ziɓri ké pol daɓa nzukri ɓahri, Zezu mí ɓa Ŋgermbay gaŋ, mí ku ta̧h ma̧y ɓayu kpu̧y.
ទើបបានជ្រើសរើសហើយ៖
Mbete Fe laɓna Tempuki 18: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
