Mbete Fe laɓna Tempuki 17
17
Ɓay Ŋgermbay ka̧h tusiɓa Tesaloni
1Pɔl ke Silasri mbi mahful#17.1 Ɓay Silasri : Silas ke Timote ɓa bɔh sina Pɔl. Í ki̧ Mbete Fe laɓna Tempuki 16.1-3 ɓay tu ɓayu. Silas mí ɓa ŋgernzuk ké sakra bɔh sina Pɔlri.. Ku si ka̧h Amfipoli ke Apoloni, mí ku kal si Tesaloni. Ké puh-aw, vul misoŋ ziɓri ƴo ri. 2Kandɔk ké ɓa fe laɓna ye, ke si vul misoŋ ziɓri ke bɔh sina yeri. Ɓil nam ɔknari ké dih fal hani sayaw, ke mbi ɓay Ŋgerzah ké ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri, ku ɓah ɓayu ziŋ haniri. 3Ke mbi mbete ra sɔk niri ɓay Ŋgermbay ke fulu fulu, ke ɓah ɓa teh-u ɓahri se, Ŋgerzah lek hi̧ Ŋgermbay ko seh hul, ke sɔk ɓay ti̧hna ye ke puh záh. Dara mí ke el ɓahri : « Ŋgermbay ké mi sɔk wuri ɓay ye-ay ra gi, a ye mí ke ɓa Zezu. »
4Nzuk a haniri ké haŋsekle woyri ya̧ ɓayu. Ku mbu̧h ziŋ Pɔl ke bɔh sina yeri. Daɓa gerekri ké ƴo dim Ŋgerzah ziɓri ƴo ri. Wu̧y riŋ ɗinari mah fe ƴo sakra woyri pi.
5Bale sere rih law ziɓ a haniri, mí ku mbu̧h kɔk nzukri ké kaɓ gɔr gɔr ké ɓel mgboŋ. Ku fa̧h niri si keni wuh wuh, ku zukru kerɓay nzukri ɓil puh hi̧ puh laŋ. Ku si ka̧h kerpuh Zasoŋ#17.5 Ɓay Zasoŋ na ɓil Mbete Rɔmri 16.21 pi.. Ku si ƴah Pɔl ke Silas ɓay ten niri ma sakra nzuk puhri. 6Mí ku ziŋ niri ya. Ku kɔklɔ Zasoŋ ke nzuk yi̧n ɓil Ŋgermbay a haniri, si keni pol ŋgernzuk puhri. Ku ɓah ɓay ke ŋgere ŋgere ɓahri : « Nzukawri-aw ƴo gbur tusiɓa gbam, mí aŋay, ku ka̧h puh wah-ay da. 7Zasoŋay ba, ya̧ niri na puh ye. Nzukawri-aw gbam ɓahri, mbay a ɓoru ƴo ri. Riŋ mbay woyri ɓa Zezu, mí ku to ɓay mbay sezar ma kpah. »
8Ɓayu-aw zukru kerɓay nzukri ke ŋgernzuk puhri gbam. 9Ku hi̧ Zasoŋ ke tɔr nzuk yi̧n ɓil Ŋgermbay a ɓoruri, ku puh lari dara mí ku poŋ niri tɔr ɓáy.
Nzukri ké Bere lah ɓaysuki Ŋgermbay
10Suŋ sih bale, nzuk yi̧n ɓil Ŋgermbayri pih Pɔl ke Silas seɗe mbɔk si Bere. Ku ka̧h, mí ku kal si vul misoŋ ziɓri. 11Ziɓri ké Bere na kandɔk ziɓri ké Tesaloni ya. Ku ɓa nzuk ru̧nari. Ku ya̧ nzak pihna ké Pɔl gi keni ra ɓa suki. Namri gbam, ku ƴo fakla ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri ɓay tu ɓahri, ɓay ké Pɔl ɓah-ay ra wa, ɓa ketina gaŋ le ? 12Mí daɓa ziɓri kan law tul Ŋgermbay. Ké haŋsekle gerekri kara, wu̧y riŋ ɗinari ke wo̧rori ɓa ŋgi̧-u kan law tul Ŋgermbay pi. 13Dale ziɓri ké Tesaloni lah ɓahri, Pɔl ƴo ka-kah ɓay puh lakna Ŋgerzah ké Bere bale, ku si ri. Ku zukru kerɓay nzukri hi̧ puh laŋ yik yik. 14Wara mí nzuk yi̧n ɓil Ŋgermbayri maŋ Pɔl ɗuk ɓa gah-u si ɓel mahmbih ɓay ké mbi kumbon. Silas ke Timote ba, ku kaɓ Bere. 15Nzuk yi̧n ɓil Ŋgermbayri puh kumbon, ku ɓaŋ Pɔl kpu̧ru ka̧h Aten dara mí ku el ɓáy. Pɔl pih niri ɓahri, kú si sɔk Silas ke Timote ɓá gi ziŋ ni ɓa gah-u.
Pɔl kaɓ Aten
16Pɔl ƴo geŋ niri ké Aten. Ke ha̧rma ɓil puh-aw. Ke ko sam fe záhri ɓoɗ ɓoɗ mbah ri, mí law ye se ni ɗɔk ɗɔk ɓayu. 17Kaŋ mí ke ƴo lu mberem ɓay Ŋgermbay Zezu nam ke nam ké ɓil vul misoŋ ziŋ ziɓri ke sa̧wnzuk a ɓoruri ké ƴo dim Ŋgerzah. Ké lumu kara, ke ƴo lu mberemu ziŋ nzuk a suŋ suŋ ké-e ziŋ ké ri pi. 18Bale nzuk-ten sa̧wɓayri kú-u ɗi niri ɓa Epikiri ke Esotikiri loh hehr gi ta̧w ye lu mberem ziŋ ni#17.18 Ɓay Epikiri ke Esotikiri : Nzukri-aw laɓ likol ké ta̧w nzuk ké riŋ ye ɓa Epikiri, nzuk a haniri laɓ likol ké ta̧w Zeno ké gel kú-u ɗi ɓa esotik. . Nzuk a haniri ɓahri : « A fe mí gbahla-ay ƴo ɓah-u le ? »
Nzuk a ɓoruri ɓáy ɓahri : « Ko ya le, ke ƴo ɓah ɓay záh a kalari hi̧ na munu. Ke sɔk ɓay záh a ɓoru ké riŋu ɓa Zezu ke ɓay ti̧hna záhri ke pa̧ymun a foyu. »
19Mí ku maŋ Pɔl si ndiseŋe ké riŋu ɓa Aropaz ké pol daɓa nzukri. Ku vbi ni ɓahri : « Mahful ƴo ri ɓay náh tu sa̧w fe sɔkna wo a foyu ké mu gi keni-ay ra le ? 20Ɓay fe le, nah lah ɓay a foyuri, mí nah yih tu sa̧wu ɓa teh-u. »
21Nzuk Atenri ke sa̧wnzuk a ɓoruri ké ɗeh puh ké Aten gbam zi sa̧wseh woyri ɓay lu mberem ke lah ɓay a foyuri. 22Wara mí Pɔl ur síɓa ké sakra nzukri ké ndiseŋe ra, mí ke yih nzak woyri ɓahri : « A woiri nzuk Atenri, mi ko ɓahri, ɓil fe laɓna woiri gbam, i ƴo dim záhri dim. 23Mi ha̧rma ɓil puh woiri gbam, mi ko gel kaniri ɓoɗ ɓoɗ bale, mi ziŋ gel kani a hani kú-u vbeh fe kan ri kandɔkay : “Nzuku a záh ké nah tu ni ya.” Mí záh ké i dim ni dan tu ni ra mí-i gi sɔk wuri ɓay ye-ay. 24Ŋgerzah, nzuk-laɓ nunmbam ke tusiɓa ke feri gbam ké na ɓilu, a ye, ke ɓa Gaŋ tul feri riw, mí ke ta kaɓ gel kani ké nzukri mboh ya. 25A ye, ke ta ke ɗaka ɓay nzuk ɓá hi̧ ni fe ya. Nzuk-mgba sa̧w ye kara ta-a pi. A ye ma, mí ke laɓ nzuk, ke hi̧ kuna ku nzuk, ke hi̧ fe a ɓoruri gbam hi̧ nzuk pi. 26Ke laɓ nzuk mbew, mí ke hi̧ sa̧wnzukri gbam ti̧h ke ɓil nzuku ku̧ tusiɓa. Ke kehr tusiɓa hi̧ sa̧wnzukri, ke hi̧ niri sew kaɓna woyri. 27-28Ke laɓ sa̧wnzukri ɓay kú nzah ni. Ku ndar ndɔk ƴah ni le, ku zá ni. Mí ketina, ke ƴo ɗih ya ké ta̧w wah mbew mbew gbam ɓay fe le, sa̧w ɔkna wah, ha̧rma wah, káɓ tukala wah gbam na ta̧w ye kandɔk ké nzuk woiri a haniri ten siŋ ɓahri : A wah nah ɓa sa̧wkani ye. 29Ké nah ɓa gun yeri, nah ta ker ɓahri, Ŋgerzah ɓa záh fal fe záhri ya. Ke ta ɓa záh lari lɔr mini lari a garu mini kasaw ké nzukri laɓ ke kerɓay woyri ya. 30-31Lewsa̧, Ŋgerzah ik law ké tul nzukri ké ƴo dim záhri ɓayu ké ku ɓa ra̧w. Wara mí, ke ƴo ɓah hi̧ nzukri gbam ké gelri riw ɓá mbi law ké tul záh woyri ma fal, kú el kan law tul ye ɓayu ké-e lu nam-kuŋ salɓay nzuk tukalari gbam, mí ke mbi nzuk ké mah ɓay kuŋ salɓay ke gelu gelu kandɔk ké-e ti̧h ke puh záh ke pa̧ymun a foyu. »
32Ku lah Pɔl ƴo ɓah ɓay záhri ké ɓay ziŋ pa̧ymun a foyu bale, nzuk a haniri sak ni sak. Nzuk a ɓoruri ba, ɓahri, ku yih lah ɓayaw ra ɓáy. 33Kaŋ mí Pɔl ti̧h ké sakra woyri. 34Nzuk a haniri mbu̧h ziŋ ni, ku kan law tul Ŋgermbay. Ké sakra nzuk-kan law tul Ŋgermbayri-aw, Denis ké ɓa ŋgernzuk ndiseŋe ke wu̧y a hani ké riŋ ye ɓa Damari dara mí ke nzuk a ɓoruri pi.
ទើបបានជ្រើសរើសហើយ៖
Mbete Fe laɓna Tempuki 17: SIAFNK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.
