EVASELIO A MALEKO 2
2
Fakamauli o he tagata palalisia
1Nee hili ki ai ni aho, pea nee toe liliu leva ia Sesu ki Kafanaume. Nee iloi leva kua nofo ia ia i te fale, 2pea nee fakatahi leva ki ai he hahai kaugamalie osi, o mole kei hao i fale pea mo te mua matapa. Nee ina fakaha kia natou te folafola.
3Nee omai leva ni hahai kia ia mo he tagata palalisia, ae nee amo e ni tagata e toko fa. 4Pea i tanatou mole feala ke kaku kia ia o tupu ko te hahai, nee natou avahi leva he pu i te ato o te fale o tuha tonu mo Sesu, pea nee natou hifoaki leva i te ava aia te palepale ae nee moe ai te tagata palalisia. 5I te sio a Sesu ki tanatou tui, nee ina ui leva ki te tagata palalisia: Siaku fanau, kua fakamolemole au agahala. 6Nee nonofo i ai ni ihi o te kau sekelipa, ae nee felalai, pea nee natou ui i onatou loto: 7Kotea te uhiga o te lea feia ai te tagata aeni? E fasituu ia ia ki te Atua. Pe ko ai ae e feala ke ina fakamolemole te u agahala, pe e mole ko te Atua pe toko tahi? 8Nee iloi aipe e Sesu i tona loto te mea ae nee natou manatu ki ai i onatou loto, pea nee ina ui leva kia natou: Kotea e kotou mau ai ni manatu fena i okotou loto? 9Kofea e faigafua age, i te ui ki te tagata palalisia: Kua fakamolemole au agahala, pe e ko te ui: Tuu ki oluga, too tou palepale, pea ke haele? 10Kae, o tupu ke kotou iloi e mau e te Foha o te tagata i te kele te pule ke fakamolemole ai te u agahala: 11Pea nee ina ui leva ki te tagata palalisia: E au fakatotonu atu kia koe, tuu ki oluga, too tou palepale, pea ke alu ki tou api. 12I te lakaga pe aia, nee tuu ake leva te tagata palalisia ki oluga, o too tona palepale, pea nee ulu leva ia ki fafo kae nofoaki te hahai fuli; nee natou ofolele fuli, pea nee natou fakakololia ki te Atua, o ui: Nee heeki matou sisio ki he mea fenei i he aho!
Te paui o Levi
13Nee toe alu leva ia Sesu ki te matatai. Pea nee olo age te hahai fuli kia ia, pea nee akonaki ia ia kia natou. 14I tana alu, nee sio leva ia ia kia Levi, foha o Alefeo, nee heka i te pilo tukuhau. Nee ina ui leva kia ia: Mulimuli mai ia au. Pea nee tuu ake leva ia Levi ki oluga, o mulimuli ia ia.
E kalagai e Sesu ni hahai agahala, kae mole ko ni hahai agatonu
15I te temi aia, nee kai ia Sesu i te fale o Levi, pea nee toko lahi te kau popelikano mo te kau agahala nee kai fakatahi foki mo ia pea mo ana kau tisipulo; koteuhi nee natou kaugamalie, pea nee natou mulimuli ia ia. 16I te sio a te kau sekelipa mo te kau faliseo e kai ia Sesu mo te kau agahala pea mo te kau popelikano, nee natou ui leva ki ana tisipulo: Kotea e kai ai mo inu ai ia ia mo te kau popelikano mo te kau agahala? 17I te logo a Sesu ki te mea aia, nee ina ui leva kia natou: E mole ko natou ae e haohaoa e aoga ki ai he toketa, kae ko te kau mahaki. Nee mole au hau o paui te kau agatonu, kae ko te kau agahala.
Sesunio; te kie foou mo te u utele* foou
18Nee sesunio te kau tisipulo a Soane mo te kau faliseo. Pea nee natou omai leva o ui kia Sesu: Kotea e Sesunio ai te u tisipulo a Soane pea mo te u tisipulo a te kau faliseo, kae e mole sesunio au tisipulo? 19Nee tali leva e Sesu kia natou: Pe e feala ke sesunio te u kaumea o te tagata ohoana kae kei natou fakatahi mo te tagata ohoana? I te temi katoa kei natou fakatahi ai mo te tagata ohoana, e mole feala ke natou sesunio. 20E hoko mai anai te u aho e too ai anai maia natou te tagata ohoana, pea e natou sesunio anai i te aho aia. 21E mole pe he tahi e ina tui he kie foou ki he teu afea; koteuhi e haei anai e te kie foou te teu afea, pea e kovi osi anai te mahae. 22Pea e mole tuku e he tahi he vino foou ki ni utele afea; koteuhi e maumaui anai e te vino foou te u utele, pea e pulinoa anai te vino mo te u utele; kae e tonu ke tuku te vino foou ki ni utele foou.
E pule ia Sesu ki te sapato
23Nee hoko leva, i he aho sapato, nee fakalaka ia Sesu i ni gaueaga fulumeto. Pea ko ana tisipulo, i tanatou haele, nee natou kamata toli leva ni fulumeto. 24Nee ui leva e te kau faliseo kia Sesu: Kotea e natou fai ai te mea ae e mole gafua i te aho o te sapato? 25Nee tali leva e Sesu kia natou: Pe nee mole kotou lau te mea ae nee fai e Tavite, i te aho ae nee aoga ai he meakai kia ia, pea nee fia kai leva ia ia mo natou ae nee fakatahi mo ia; 26pe nee feafeai tana ulu ki te fale o te Atua, i te temi o te pule faisakilifisio ko Apiatale, pea nee ina kai te u pane o te molaga, ae nee mole gafua ke kai e he tagata, gata pe ki te kau faisakilifisio, pea nee ina toe foaki foki kia natou ae nee fakatahi mo ia! 27Pea nee ina ui leva kia natou: Nee fakatuu te sapato ki te tagata, kae kailoa te tagata ki te sapato: 28Koia, e pule te Foha o te tagata, tatau aipe ki te sapato.
ទើបបានជ្រើសរើសហើយ៖
EVASELIO A MALEKO 2: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland