EVASELIO A MALEKO 1
1
Gaue a Soane-Patita
1Kamataaga o te Evaselio o Sesu-Kilisito, Alo o te Atua.
2O mulimuli ki te mea ae e tuu i te tohi a te polofeta ko Esaia:
Koeni, e au fekaui taku tagata faifekau i ou mua
E ina teuteui anai tou ala;
3 Ko te leo o ia ae e kalaga i te toafa:
Koutou teuteui te ala o te Aliki.
Koutou fakatokatoka ona ala liliki.
4Nee ha leva ia Soane, o faipapitema i te toafa, pea mo akonaki ki te papitema o te fakahemala o uhiga mo te fakamolemole o te u agahala. 5Nee alu kia ia te fenua katoa o Sutea pea mo te hahai fuli o Selusalemi, o kofesio anatou agahala, pea nee papitemai natou e Soane i te vaitafe o te Solotane.
6Nee kofu ia Soane ki he kofu fului kamelo, pea nee ina hai he kilii pipi i ona vakavaka. Nee kai ia ki te u hee mo te meli vao. 7Nee akonaki ia ia, o ui: E hau i oku muli ae e malohi age ia au, pea e mole au gali i te punou o veteki te hai o ona sulie. 8Ko au, nee au papitemai koutou i te vai; kae e ina papitemai anai koutou i te Laumalie Maonioni.
Papitemai o Sesu-Kilisito
9I te temi aia, nee hau leva ia Sesu mai Nasaleti ki Kalilea, pea nee papitemai leva ia ia e Soane i te Solotane. 10I te lakaga ae nee mavae ai ia ia mai te vai, nee sio leva ia ki te ava o te lagi, pea mo te hifo a te Laumalie Maonioni kia ia o hage ko he lupe. 11Pea nee fakaha leva e he leo nee hau mai te lagi te u folafola aeni: Ko koe ko toku Alo ofaina, ae kua au tuku ki ai toku ofa katoa.
Fakahalai o Sesu-Kilisito
12I te lakaga pe aia, nee taki leva Sesu e te Laumalie Maonioni ki te toafa, 13pea nee nofo leva ia ia i ai i ni aho e fagofulu, o fakahalai e Satana. Nee fakatahi ia ia mo te u manu o te vao, pea nee tauhi kia ia e te kau aselo.
Kamataaga o te gaue a Sesu i Kalilea
14I te osi o te puke o Soane, nee alu leva ia Sesu ki Kalilea, o fagonogono te Evaselio o te Atua. 15Nee ina ui: Kua hoko te temi, pea kua ovi mai te puleaga o te Atua. Koutou fakahemala, pea koutou tui ki te logo lelei.
Uluaki tisipulo a Sesu-Kilisito
16I tana haele i te matatai o te tai o Kalilea, nee sio leva ia ia kia Simone mo Atelea, tehina o Simone, ae nee na li he kupega ki te tai; koteuhi nee na tautai. 17Nee ui leva e Sesu kia naua: Kolua muli mai ia au, pea e au fakaliliu anai kolua ko ni tautai tagata. 18I te lakaga pe aia, nee na tuku leva ona kupega, kae na mulimuli leva ia ia. 19Pea i tana fakamamao atu fakasiisii pe, nee sio leva ia ia kia Sakopo, foha o Sepeteo, mo Soane, tona tehina, ae nee nonofo foki i he vaka pea e na onoono ona kupega. 20I te lakaga pe aia, nee ina paui leva naua; pea nee na tuku leva tana tamai ko Sepeteo i te vaka mo te kau gaue, kae nee na muli leva ia ia.
Kapu o ni temonio i Kafanaume
21Nee natou olo leva ki Kafanaume. Pea, i te aho o te sapato, nee ulu leva ia Sesu ki te sinakoka o akonaki i ai. 22Nee natou ofolele i tana akonaki; koteuhi nee akonaki ia ia o hage ko he tahi e ina mau he pule, kae nee mole akonaki ia ia o hage ko te kau sekelipa.
23Nee nofo leva i tonatou sinakoka he tagata ae nee ina mau he laumalie kovi, pea nee kalaga leva ia ia: 24Kotea ae e ke loto ke ke fai kia matou, Sesu mai Nasaleti? Pe nee ke hau o fakapuli matou? E au iloi pe ko ai ia koe: Ko te Sagato ia koe a te Atua. 25Nee pupulai leva ia ia e Sesu, o ui: fakalogologo, pea ke mavae i te tagata aia. 26Pea nee mavae leva te laumalie kovi i te tagata aia, i te osi o tana lu fakakovi ia ia, pea mo tana kalaga leo lahi. 27Nee natou ofolele fuli i te mea aia, o natou fefehui aki ia natou: Kotea te mea aeni? Ko he akonaki foou! E fakatotonu ia ia mo he pule, tatau foki ki te u laumalie kovi, pea e natou fakalogo kia ia! 28Pea nee mafola leva tona logologona i te lakaga pe aia ki te u fenua fuli i te u tafaaki o Kalilea.
Fakamauli o te fae o te ohoana o Petelo
29I tanatou mavae i te sinakoka, nee natou olo leva mo Sakopo mo Soane ki te api o Simone mo Atelea. 30Nee takoto te fae o te ohoana o Simone, koteuhi nee fiva ia ia; pea i te lakaga pe aia nee fakaha leva ia ia kia Sesu. 31Nee fakaoviovi age leva ia Sesu kia ia, pea nee ina too leva tona nima o fakatuu ia ia ki oluga, pea i te lakaga pe aia nee mavae leva te fiva ia ia. Pea nee tauhi leva te fafine kia natou.
Fakamauli o te u mahaki
32I te afiafi, i te to o te laa, nee aumai leva kia Sesu ia natou fuli nee mahahaki pea mo natou nee ulusino ai te u temonio. 33Pea nee fakatahi age te kolo katoa ki tona matapa. 34Nee ina fakamauli leva ni hahai kaugamalie ae nee natou mau ni mahaki kehekehe; nee ina kapu foki ni temonio toko lahi, pea nee mole ina fakagafua ke palalau te u temonio koteuhi nee natou iloi ia ia.
35I te hegihegi, kae kei fakapouli, nee ala ake leva ia ia, pea nee alu leva ia ia ki he kogamea lavaki, ae nee faikole ai leva ia ia. 36Ko Simone mo natou ae nee fakatahi mo ia, nee olo leva o kumi ia ia. 37Pea, i tanatou mau leva ia ia, nee natou ui leva kia ia: E kumi koe e te hahai katoa. 38Nee tali leva Sesu kia natou: Tou olo ki he tahi kogamea kehe, ki te u kolo e ovi mai, ke au akonaki foki i ai; koteuhi ko te tupuaga aia o taku hau. 39Pea nee alu leva ia ia o akonaki i te u sinakoka, i Kalilea katoa, pea nee ina kapu leva te kau temonio.
Fakamauli o he tagata kilia
40Nee hau leva he tagata kilia kia ia; pea nee tuutuli leva ia ia, o kolekole kia Sesu: Kapau e ke loto ki ai, pea e ke fealagia toku fakamaa. 41Ko Sesu, i tona ofa mamahi kia ia, nee ina faoi leva tona nima, o kapa ki ia, o ui: E au loto ki ai, ke ke maa. 42I te lakaga pe aia, nee mavae leva te kilia ia ia, pea nee maa leva ia ia. 43Pea nee fekau leva e Sesu kia ia ke alu aipe, mo ni fakatotonu mamafa, 44o ina ui kia ia: Aua pe naa ke fakaha he mea ki he tahi; kae ke alu o fakaha ia koe ki te tagata faisakilifisio, pea ke momoli o uhiga mo tou fakamaa te mea ae nee fakatotonu e Moisese, o tupu ke fakamooni te mea aia kia natou. 45Kae nee alu leva te tagata aia, pea nee ina kamata fakaha leva mo fakamafola i te u kogamea fuli te mea ae nee hoko kia ia. Koia nee mole toe feala ai te ulu fakahaha a Sesu ki he kolo. Nee nofo ia ia i te u tua kolo, i ni kogamea lavaki, pea nee omai kia ia mai te u potu fuli.
ទើបបានជ្រើសរើសហើយ៖
EVASELIO A MALEKO 1: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland