Uluaki tohi a Paulo ki te kau KOLINITO 6
6
Fakamaau i te kau kilisitiano
1Ko he tahi ia koutou, moka ina mau he hala i tona tehina, pe e toa ia o tagi ia mua o te kau pagani, kae e mole ia mua o te kau sagato? 2Pe e mole kotou iloi e fakamaaui anai e te kau sagato te malamanei? Pea kapau ko koutou ae e kotou fakamaaui anai te malamanei, pe e mole koutou manatu e koutou tuha i te fakamaaui o te u mea liliki? 3Pe e mole kotou iloi e tou fakamaaui anai te kau aselo? Pea kotea e mole tou fakamaaui ai te u mea o te mauli aeni? 4Pea kapau e kotou mau ni fihi ki ni mea o te mauli aeni ke kotou too natou ae e mole honatou uhiga ki te Ekelesia ke tui fakamaau? 5E au fakaha te mea aia ke kotou ufiufi ai. Koia e mole mau ai he poto e tahi ia koutou ke kotou fakamaaui ona tehina. 6Kae kapau e tagi he tehina ki he tehina, pea e ina fai ia mua o natou ae e mole tui? 7Koeni, kua nofo he kovi lahi ia koutou, ko te fefakamauiaki o koutou, kotea e mole kotou katakii ai mua te kovi? Kotea e mole kotou tuku ai mua ke kaihaa okotou koloa? 8Kae ko koutou totonu ae e kotou fai te kovi mo kaihaa te u koloa, pea e kotou fai feia ki te u tehina!
E maonioni te sino o te kilisitiano: Koteuhi kua fufulu ia ia e te toto
9Pe e mole kotou iloi e mole mau tofiga anai te puleaga o te Atua e te kau hee agatonu? Aua naa kotou faihala i te mea aia: Ko te hahai feauaki, mo te hahai tauhi taulaatua, mo te hahai tono, 10mo te hahai agaifafine, mo te hahai faitagata, mo te hahai kaihaa, mo te hahai manumanu, mo te hahai konahia, mo te hahai fasituu, mo te hahai kaihaa tagata, e mole natou ulu anai ki te puleaga o te Atua. 11Pea nee feia ni ihi ia koutou i mua. Kae kua fakamaa koutou, kua fakamaonionii koutou, kua fakamatatonu koutou i te huafa o te Aliki ko Sesu-Kilisito aki te Laumalie o totatou Atua.
Koteuhi kua mau ia ia e Kilisito
12E gafua te mea fuli kia au, kae e mole aoga mai te mea fuli; e gafua te mea fuli kia au, kae e mole au tuku anai ke au popula ki he mea pe e tahi. 13Ko te u meakai e uhiga mo te fatu, pea ko te fatu o uhiga mo te u meakai, pea e maumaui anai e te Atua te fatu o tatau pe mo te meakai. Kae ko te sino e mole a te feauaki, e a te Aliki ia, pea ko te Aliki a te sino. 14Pea ko te Atua, ae nee ina toe fakatuuake te Aliki, e ina toe fakatuuake anai mo tatou foki aki tona mafimafi. 15Pe e mole kotou iloi ko okotou sino ko te u kogasino o Kilisito? Pe e au too anai te u kogasino o Kilisito o fakaliliu ko te u kogasino o he fafine paomutu? 16Kailoa aupito! Pe e mole koutou iloi ko ae e pipiki ki te fafine paomutu e liliu ia ko he sino e tahi mo ia? Koteuhi e ui, e na liliu anai ko he sino e tahi. 17Kae ko ae e pipiki ki te Aliki e liliu ia ia mo ia ko he laumalie e tahi. 18Koutou feholaki mai te feauaki! Ko te u agahala fuli e fai e te tagata, e ina fai i tua o te sino, kae ki te feauaki e agahala ia ki tona sino totonu.
Koteuhi ko te fale tapu aia o te Atua
19Pe e mole kotou iloi ko tokotou sino ko te fale tapu ia o te Laumalie Maonioni ae ia koutou, ae kua kotou tali mai te Atua, pea e mole kotou mau ia koutou totonu. 20Koteuhi kua totogi koutou aki he totogi lahi aupito. Koia ke koutou fakakololia ki te Atua aki tokotou sino mo tokotou laumalie, ae a te Atua.
ទើបបានជ្រើសរើសហើយ៖
Uluaki tohi a Paulo ki te kau KOLINITO 6: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland