Uluaki tohi a Paulo ki te kau KOLINITO 7
7
O uhiga mo te ohoana
1O uhiga mo te u mea nee kotou faitohi mai ai kia au, e au manatu e lelei ki te tagata ke aua naa lave ki he fafine. 2Kae, uhi ko te feauaki, ke tahi mau e te tagata hona ohoana, pea ke tahi mau e te fafine hona ohoana. 3Ke fai e te tagata ona maua ki tona ohoana, pea mo ia fafine ke fai tatau pe mo ia ona maua ki tona ohoana. 4E mole pule te fafine ki tona sino, kae ko tona ohoana. O feia pe mo te tagata, e mole ko ia e pule ki tona sino, kae ko tona ohoana. 5Ke aua naa kolua fefakafisiaki ia kolua, gata pe mo kapau kua kolua loto tahi ki ai i he kii temi veliveli, ke kolua fakamalotoloto ki te faikole; kae ka osi ia, ke kolua toe liliu o fakatahi, koteuhi naa fakahalai kolua e Satana i takolua mole kei faa tataofi. 6E au fakaha te mea aia o hage ko he manatu, kae e mole hage ko he fakatotonu. 7E au fakaamu age ke tatau te tagata fuli mo au. Kae e tali e te tagata takitahi he meaofa mai te Atua, ko he tahi te meaofa aeni, pea ko te tahi age te meaofa ae.
8E au tala atu ki te hahai tagata selipatea pea mo te hahai fafine finetaka, e lelei kia natou ke natou nofo o hage ko au. 9Kae kapau e mole natou mafai tonatou pulei, ke natou ohoana; koteuhi e lelei age te ohoana i te vela.
Fakatotonu kia natou kua ohoana
10Kia natou ae kua ohoana, e au fakatotonu, e mole ko au, kae ko te Aliki, ke aua naa mavae te fafine mai tona ohoana, 11kae kapau kua mavae te fafine aia, pea ke nofo feia kae aua naa toe ohoana, pe ke toe fakatokatoka mo tona ohoana, pea ke aua naa mavae te tagata mai tona ohoana.
12Kia natou ake ae, e mole ko te Aliki, kae ko au e au tala: Kapau e mau e he tehina hona ohoana e mole tui, pea e loto lelei te fafine aia ke na nonofo fakatahi, ke aua pe naa fakamavae e te tagata tona ohoana; 13pea kapau e mau e he fafine hona ohoana e mole tui, pea e loto lelei te tagata aia ke na nonofo fakatahi, ke aua naa fakamavae e te fafine tona ohoana. 14Koteuhi kua fakatapui te tagata mole tui e tona ohoana, pea kua fakatapui te fafine mole tui e tona ohoana; he kapau e mole feia, pea e mole maa anai akolua fanau, kae i te lakaga nei, kua natou tapuakina. 15Kapau e mavae ia ia e mole tui, ke mavae ia. E mole hai anai te tehina pe ko te tuagaane i te mea aia. Nee paui tatou e te Atua ke tou mauli i te tokalelei. 16Koteuhi e ke iloi feafeai, fafine, pe e ke haofaki anai tou ohoana? Pea e ke iloi feafeai, tagata, pe e ke haofaki anai tou ohoana?
17Koia, ke tahi haele te tagata o mulimuli ki te vaega nee tuku e te Aliki kia ia, pea mo te paui nee ina tali mai te Atua. Koena te mea e au fakatotonu ki te u Ekelesia fuli. 18Nee paui he tahi kae kua silikosisio, ke nofo silikosisio ia; pea nee paui he tahi kae nee heeki silikosisio ke aua naa silikosisio ia. 19Ko te mea noa te silikosisio, pea ko te mea noa te heeki silikosisio, kae ko te mea ae e mauhiga ko te fakalogo ki te u fekau a te Atua. 20Ke tahi nofo i te mauli nee nofo ai i tona paui. 21Nee paui koe kae kei ke kaugana, aua naa ke tuania ki ai; kae kapau e feala tau ateaina, too te faigamalie aia. 22Koteuhi ko te tagata kaugana ae kua paui e te Aliki ko he tagata ateaina ia a te Aliki; pea ko te tagata ateaina ae kua paui e te Aliki ko he tagata kaugana ia a Kilisito. 23Kua totogi kotou aki he totogi lahi; aua naa kotou liliu o kaugana ki ni tagata. 24U tehina, ke tahi nofo ia mua o te Atua i te nofo nee nofo ai i tona paui.
O uhiga mo natou e heeki ohoana
25O uhiga mo natou e taupoou, e mole au mau he fakatotonu mai te Aliki, kae e au tuku atu taku manatu, o hage ko he tagata kua ina tali mai te Aliki te kalasia o te agatonu.
26Koeni leva te mea e au manatu e lelei, koteuhi ko te u mamahi o temi nei: E lelei ki te tagata ke nofo feia. 27Pe kua hai koe mo he fafine, aua naa ke faiga ke motuhi te hai aia; e heeki hai koe mo he fafine, aua naa ke kumi hou ohoana. 28Kapau kua ke ohoana, nee mole ke fai he agahala; pea kapau kua ohoana te taahine taupoou, nee mole agahala ia; kae e mau anai e natou aia ni mamahi i te sino, pea e au loto ke kotou hao mai ai.
29Koeni te mea e au fia fakaha, u tehina: Kua nounou te temi; koia i te temi nei, e tonu ke mauli te tagata ae kua nofo mo hona ohoana o hage e hala ohoana; 30pea ko natou e tagi o hage e mole natou tagi; ko natou e fiafia o hage e mole natou fiafia; ko natou e faifakatau o hage e mole natou mau he mea; 31ko natou e natou fakaaoga te malamanei o hage e mole natou fakaaoga ia, koteuhi e puli anai te fofoga o te malamanei. 32E au loto ke kotou ateaina maia hoha aia. Kia ia ae e heeki ohoana e hoha pe ia ki te u mea a te Aliki, pe e feafeai tana fai ke fiafia ai tona Aliki; 33kae ko ae kua ohoana e hoha ia ki te u mea o te malamanei, pe e feafeai tana fai ke fiafia ai tona ohoana, 34koia kua nofo vaelua ia. E feia foki mo te fafine e mole hona ohoana pea mo te taahine taupoou, e na hoha pe ki te u mea a te Aliki, ke na maonioni i te sino mo te laumalie; kae ko te fafine ohoana e hoha ia ki te u mea o te malamanei, pe e feafeai tana fai ke fiafia ai tona ohoana.
35E au tala atu te mea aeni o uhiga mo tokoutou lelei, e mole ko taku fia tuku kia koutou he fakamaua, kae ke koutou fai te mea e lelei age mo aoga age ki takotou tauhi ki te Aliki.
36Kapau ko he tahi, i tana fakafuafua, kua fakalaka tana taahine i tona temi taahine, pea kua aoga ia ke ohoana, ke ina fai te mea e loto ia ki ai, e mole agahala ia, ke ohoana. 37Kae ko ae kua ina tonu i tona loto toko tahi, pea nee mole fakamalohii mai tua, ke ina taupau tona ofafine taupoou, ko ia aena e fai lelei. 38Koia, ko te tagata e ina fakaohoana tana taahine e fai lelei, pea ko ia e mole ina fakaohoana tona ofafine e fai lelei age.
39E hai te fafine mo tona ohoana i te temi katoa e mauli ai tona ohoana; pea kapau e mate te tagata, e ateaina te fafine ke ohoana mo ae e loto ia ki ai; kehe pe ke fai i te Aliki. 40Kae ko taku manatu e fiafia age te fafine aia mo kapau e nofo feia pe. Pea ko au foki, e au tui e au mau te Laumalie o te Atua.
ទើបបានជ្រើសរើសហើយ៖
Uluaki tohi a Paulo ki te kau KOLINITO 7: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland