Uluaki tohi a Paulo ki te kau KOLINITO 4
4
Fiamealahi o te kau Kolinito, fakataulalo o Paulo
1Koia, ke sio mai kia maua o hage ko ni tagata faifekau a Kilisito, pea mo ni tagata tauhi o te u misitelio o te Atua. 2Pea ko te mea e kumi ki ni tagata tauhi koloa, ke natou tahi agatonu i tana gaue. 3Kia au, e mole mauhiga ke kotou fakamaaui au, pe ke fakamaaui au e he fakamaauaga a te tagata. E mole au fakamaaui foki ia au totonu, koteuhi e mole au mau ni mea i toku loto e au hala ai; 4kae e mole ko te mea aia e fakamatatonu ai au. Ko ae e ina fakamaaui au, ko te Aliki. 5Koia ke aua naa kotou fakamaaui ai he mea ia mua o te aho, o kaku ki te hau o te Aliki, ae e ina fakaha anai ki te malama te mea e ugia i te fakapouli, pea mo te u manatu o te u loto. Pea e tali anai e te tagata takitahi te fakavikiviki mai te Atua.
6Koteuhi, o uhi ko koutou, u tehina, kua au too ai te u mea aeni o fakaaoga kia au mo Apolosio, ke kotou ako maia maua ke aua naa kotou fakalaka i te mea kua tohi, pea ke aua naa mau e he tahi o koutou he fiamealahi o uhiga mo ae ki ae. 7Koteuhi ko ai e ina fakakehei ia koe? Kotea e ke mau nee mole ke tali? Pea kapau nee ke tali te mea aia, kotea e ke fakakololia ai, o hage nee mole ke tali ia?
8I te lakaga nei kua kotou makona, kua kotou maukoloa, kua kotou kamata hau kae hala mo maua. Pea ke amusia age ke koutou hau mooni, ke ma hau fakatahi mo koutou! 9Koteuhi ko te Atua, e hage kia au, kua ina tuku ia matou, apositolo, ko te kau mulimuli osi i te u tagata fuli, o hage ko ni hahai kua tautea ki te mate, he kua matou liliu ko he mataga ki te malamanei, mo te kau aselo, pea mo te tagata. 10Kua matou vavale uhi ko Kilisito, kae ko koutou, e kotou popoto ia Kilisito; e matou vaivai, kae e kotou malohi, e kotou fakaapaapaia, kae e fakalainoai matou! 11O kaku mai ki te hola aeni, e matou tali te fiakai, mo te fiainu, mo te telefua; pea e gauhikovii matou, pea e matou feheaki i te ala; 12e matou vaivai i te gaue aki omatou nima; e matou foaki te tapuaki kae leakovii matou; ka fakatagai matou, e matou kataki; 13ka fasituu mai kia matou, e matou fakavaivai; o kaku mai ki te aho aeni, kua matou liliu ko ni otaota o te malamanei, ko ni mea fakalialia ki te tagata fuli.
14E mole au tohi te u mea aia ke kotou ufiufi; kae e au valoki koutou o hage ko ni aku fanau ofaina. 15Koteuhi, kapau e kotou mau foki ni pule e toko hogofulu afe ia Kilisito, kae e mole kotou mau ni tamai kaugamalie, koteuhi ko au ae nee au fanaui koutou ia Sesu-Kilisito aki te Evaselio. 16Koia e au kole atu ai kia koutou, ke kotou faifaitaki mai kia au. 17I te mea aia kua au fekaui atu ai kia koutou ia Timoteo, ae ko taku fanau ofaina mo agatonu i te Aliki; e ina fakamanatu atu anai kia koutou oku ala ia Kilisito, ae nee au ako ki te u Ekelesia fuli i te potu fuli.
Te pule fakaapositolo a Paulo
18Kae kua fiamealahi ni ihi ia koutou, o hage nee mole tonu ke au alu atu kia koutou. 19Kae kua vave pe taku alu atu kia koutou, mo kapau ko te finegalo aia o te Aliki, pea e au iloi anai, o mole ko te u palalau, kae ko te malohi o natou ae e fiamealahi. 20Koteuhi ko te puleaga o te Atua e mole ko te u palalau, kae ko te malohi. 21Kotea e kotou loto ki ai? Ke au alu atu kia koutou mo te akau, pee mo te ofa mo te agamalu?
ទើបបានជ្រើសរើសហើយ៖
Uluaki tohi a Paulo ki te kau KOLINITO 4: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland