Uluaki tohi a Paulo ki te kau KOLINITO 3
3
Te gaue a te u faifekau a te Atua
1Kia au, tehina, nee mole feala ke au palalau atu kia koutou o hage ki ni tagata fakalaumalie, kae o hage ki ni tagata fakakakano, o hage ki ni fanau liliki ia Kilisito. 2Nee au foaki atu kia koutou he hua huhu, e mole ko he meakai fefeka, koteuhi nee mole koutou faa tali ia; pea e heeki koutou lavai ia i te temi foki aeni, koteuhi kei kotou fakakakano. 3He kei mau ia koutou te maheka mo ni ke, pe e mole kotou fakakakano, pe e mole kotou haele o mulimuli ki te tagata? 4He ka ui e he tahi: Ko au a Paulo! Pea mo he tahi age: Ko au a Apolosio! Pe e mole ko ni tagata koutou? 5Pe kotea foki ko Apolosio, pea kotea ko Paulo? Ko ni tagata faifekau, ae nee kotou tui ai, o mulimuli ki te mea nee foaki e te Aliki ki te takitahi.
Te Atua toko tahi e mauhiga i te gaue fakakilisitiano
6Nee au to, nee fakavai e Apolosio, kae nee fakahomo e te Atua. 7Koia e mole ko ae e ina to ko he mea, pee ko ae e ina fakavai, kae ko te Atua ae e ina fakahomo. 8Ko ae e ina to mo ae e ina fakavai e na tatau pe, pea e na tahi mau anai tona fakapale o mulimuli ki tana gaue.
Te fakapale o te gaue ki te Atua
9Koteuhi e ma kaugaue mo te Atua. Ko koutou ko te gaueaga a te Atua, te fale o te Atua.
10O mulimuli ki te kalasia o te Atua kua foaki mai kia au, kua au hili te fakatafito o hage ko he tufuga faifale poto, pea nee fau leva e he tahi age i oluga. Kae ke tahi tokaga ki tana faahiga fau i oluga.
Ko te fakatafito e tahi: Ko Sesu-Kilisito
11Koteuhi e mole fealagia e he tahi ke ina hili he tahi age fakatafito kehe i ae kua hili, ke iloi ko Sesu-Kilisito.
Ko faufale e lua mo ona aluaga
12Pea kapau e fau anai e he tahi i oluga o te fakatafito aia aki he aulo, he siliva, ni maka mauhiga, he akau, he luna moamoa, he penui fulumeto, e fakaha anai te gaue a te tagata takitahi: 13he iloi anai ia e te aho o te fakamaau, koteuhi e fakaha anai ia aki te afi; pea e ahiahii anai e te afi te mauhiga o te gaue a te tagata takitahi. 14Kapau e tuu te gaue nee fai e he tahi i oluga o te fakatafito aia, e ina mau anai he fakapale. 15Kapau e vela te gaue a he tahi, e puli anai tona fakapale; kia ia, e fakamauli anai ia, kae o hage ko te fakalaka i te afi.
16Pe e mole kotou iloi ko te fale tapu koutou o te Atua, pea e nofo te Laumalie o te Atua ia koutou? 17Kapau e maumaui e he tahi te fale tapu o te Atua, e maumaui anai ia e te Atua; koteuhi e maonioni te fale tapu o te Atua, pea ko tona fale tapu ko koutou.
18Ke aua naa kakaai e he tahi ia ia totonu: Kapau e tui he tahi ia koutou ko he poto ia i te sekulo aeni, ke liliu ia ko he vale, o uhi ke liliu ia ko he poto. 19Koteuhi ko te poto o te malamanei ko he vale ia ia mua o te Atua. Koteuhi kua tohi:
E ina puke te kau poto i tonatou fia poto. 20Pea e toe ui foki:
E iloi e te Aliki te u manatu a te kau poto,
E ina iloi e natou vaiga.
21Koia ke aua naa fakakololiai e he tahi ni tagata; koteuhi ko te u mea fuli a koutou: 22Pe ko Paulo, pe ko Apolosio, pe ko Sefasi, pe ko te malamanei, pe ko te mauli, pe ko te mate, pe ko te u mea o te temi nei, pe ko te u mea o te temi ka hau. 23Ko te u mea fuli a koutou; pea ko koutou a Kilisito, pea ko Kilisito a te Atua.
ទើបបានជ្រើសរើសហើយ៖
Uluaki tohi a Paulo ki te kau KOLINITO 3: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland