Uluaki tohi a Paulo ki te kau KOLINITO 2
2
E mole falala ia Paulo ki te poto fakatagata
1Kia au, tehina, i taku alu atu kia koutou, nee mole au alu atu mo he takimua o te lea mo te poto o fakaha kia koutou te fakamooni a te Atua. 2Koteuhi nee au tonu, i te temi nee au nofo ai mo koutou, ke aua naa au iloi he tahi age mea ia Sesu-Kilisito pe, pea ko Sesu-Kilisito ae nee kolusifikoi. 3Pea mo au totonu, nee au nofo mo koutou i he vaivai, mo he tuania, pea mo he tete lahi; 4pea nee mole fakatafito taku palalau mo taku akonaki ki te u palalau fakaoloolo o te poto fakatagata, kae ki he fakamahino a te Laumalie mo te mafimafi, 5koteuhi ke aua naa fakatafito takotou tui ki te poto o te tagata, kae ki te mafimafi o te Atua.
6Kae ko he poto ae e matou fakaha kia natou ae e haohaoa, poto ae e mole hau mai te sekulo aeni, pee mai te u pule o te sekulo aeni, ae ka tuku anai ki te vaivai; 7e matou fakaha te poto fakamisitelio o te Atua, ae nee fufu ki te tagata, kae nee filifili e te Atua o uhiga mo totatou kololia i mua o te fakatupu o te malamanei, 8poto ae nee mole pe iloi e he tahi o te kau pule o te sekulo aeni, he kapau nee natou iloi ia, nee mole natou kolusifikoi te Aliki o te kololia. 9Kae, o hage ko tona tuu i te tohi: ko ni mea ae nee mole sio ki ai te mata, nee mole logo ki ai te taliga, pea nee mole ulu ki te loto o te tagata, ko ni mea nee teuteui e te Atua kia natou e ofa kia ia. 10Nee fakaha e te Atua te u mea aia kia tatou aki tona Laumalie: Koteuhi e ulufi e te Laumalie te u mea fuli, tatau foki mo te u mea loloto a te Atua. 11Koteuhi ko ai te tagata e ina iloi te u mea a te tagata, kae ko te laumalie pe o te tagata ae e nofo ia ia? Pea e tatau foki, e mole iloi e he tagata te u mea a te Atua, kae ko te Laumalie pe o te Atua.
12Pea ko tatou, nee mole tou tali te laumalie o te malamanei, kae ko te Laumalie ae e hau mai te Atua, o uhi ke tou iloi te u mea nee foaki mai e te Atua kia tatou aki tona kalasia. 13Pea e matou palalau ki te u mea aia, o mole aki ni palalau e ako mai e te poto fakatagata, kae aki ni palalau e ako mai e te Laumalie, o fakaaoga he palalau fakalaumalie ki te u mea fakalaumalie. 14Kae e mole tali e te tagata fakanatula te u mea a te Laumalie o te Atua, koteuhi ko he vale natou kia ia, pea e mole feala ke ina iloi natou, koteuhi e hoki iloi fakalaumalie pe natou. 15Kae e iloi e te tagata fakalaumalie te u mea fuli, pea e mole feala ke fakamaaui ia e he tahi. 16Koteuhi:
Ko ai nee ina iloi te manatu a te Aliki?
Ko ai nee ina tuku ni tokoni kia ia?
Kae ko tatou, e tou mau te manatu a Kilisito.
ទើបបានជ្រើសរើសហើយ៖
Uluaki tohi a Paulo ki te kau KOLINITO 2: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland