Uluaki tohi a Paulo ki te kau KOLINITO 11
11
1Kotou liliu ko oku faifaitaki, o hage ko au ko te faifaitaki o Kilisito.
Teu o te fafine i te Ekelesia
2E au vikiviki koutou i takotou manatui au i te mea fuli, pea mo takotou taofi aku akonaki o hage ko taku tuku atu natou kia koutou.
3Kae e au loto ke kotou iloi ko Kilisito ko te pule aia o te tagata fuli; ko te tagata ko te pule aia o te fafine; ko te Atua ko te pule aia o Kilisito. 4Ko te tagata fuli e faikole pe tala fakapolofeta, kae puloui tona ulu, e ina fakamatagafuai tona pule. 5Pea ko te fafine fuli e faikole pee tala fakapolofeta, kae e mole puloui tona ulu, e ina fakamatagafuai tona pule: E tatau te fafine aia mo ae nee tele tona ulu. 6Koteuhi kapau e mole pulou he fafine, ke kosi foki tona lauulu. Kae, kapau e fakamatagafua ki he fafine te kosi o tona lauulu pee ko te tele o tona ulu, ke pulou ia. 7E mole tonu ke puloui e te tagata tona ulu, koteuhi ko te paaki ia o te kololia o te Atua, kae ko te fafine ko te kololia aia o te tagata. 8Koteuhi, nee mole too te tagata mai te fafine, kae ko te fafine ae nee too mai te tagata; 9pea nee mole fakatupu te tagata o uhiga mo te fafine, kae nee fakatupu te fafine o uhiga mo te tagata. 10Koia, o uhiga mo te kau aselo, e tonu ai ke ai e te fafine ki tona ulu he fakailoga o te pule e fakalogo ia ki ai. 11Logo pe, i te Aliki, e mole ateaina te fafine mai te tagata, pea e mole ateaina te tagata mai te fafine. 12Koteuhi, o hage ko te fafine nee too ia mai te tagata, e feia foki mo te tagata nee tupu ia mai te fafine, pea e hau te mea fuli mai te Atua. 13Kotou vakai pe e koutou totonu: Pe e lelei ke faikole he fafine ki te Atua kae mole hona pulou? 14Pe e mole ako mai e te natula totonu kia tatou ko he matagafua te lauulu o te tagata, 15kae ko he kololia te lauulu o te fafine, koteuhi nee foaki te lauulu kia ia o hage ko he pulou? 16Kapau e fia fakafihi ki ai he tahi, ke ina iloi: E mole ko he aga mahani aia ia matou, pea e tatau i te u Ekelesia fuli o te Atua.
Fai o te kai a te Aliki
17I taku tuku atu te valoki aeni, e mole au viki koutou, koteuhi ka kotou fakatahitahi, e mole ke koutou asilisili lelei age, kae ke koutou asilisili kovi osi. 18Uluaki, e au logo, moka kotou fakatahi fakaekelesia, e i ai ni fakavaevae ia koutou, pea e au tui fakakoga ki te mea aia, 19koteuhi e tonu ke i ai foki ni magai lotu ia koutou, ke iloi ai natou ae kua fakamooni ia koutou. 20Koia ka kotou fakatahi, e mole ko te kai a te Aliki e kotou kai; 21koteuhi, ka hoko te kai, e tahi kamata kai te tagata tana meakai, pea e fia kai te tahi, kae e kona te tahi. 22Pe e mole ni okotou api ke kotou kai mo inu ai? Pe e kotou manuki ki te Ekelesia o te Atua, pea mo fakalainoa natou e mole hanatou mea? Kotea ke au ui atu anai kia koutou? Pe e tonu ke au viki koutou? I te mea aeni e mole pe au viki koutou.
23Koteuhi nee au tali mai te Aliki te mea nee au ako atu kia koutou; ko te Aliki Sesu, i te po nee fakatau ai ia, nee ina too leva te pane, 24pea i te osi o tana fakafetai, nee ina tofitofi leva ia, o ui: Ko toku sino aeni, kua tofitofi o uhiga mo koutou; kotou fai te mea aeni o fakamanatu kia au. 25Nee tatau pe i te osi o te kai, nee ina too leva te ipu, o ui: Ko te ipu aeni o te hai foou i toku toto; kotou fai te mea aeni o fakamanatu kia au, i te u temi fuli e kotou inu anai ki ai. 26Koteuhi i te faiaga fuli e kotou kai ai te pane aeni mo inu ai te ipu aeni, e kotou fakaha te mate a te Aliki, o kaku ki tana toe haele mai.
27Koia ko ae e kai anai ki te pane mo inu anai ki te ipu o te Aliki, mo he hee fakaapaapa, e hala anai ia ki te sino mo te toto o te Aliki. 28Koia e lelei ai ke tahi ahiahii e te tagata ia ia totonu, pea ke fena tana kai ki te pane mo tana inu ki te ipu; 29koteuhi ko ae e kai mo inu kae e mole fakaapaapa ia ki te sino o te Aliki, e ina kai mo inu he malaia kia ia totonu.
30Ko te tupuaga aia o te mau ia koutou o he tokalahi e maimoa mo mahahaki, pea mo he kaugamalie kua mamate. 31Kapau e tou vakavakai ifo ia tatou totonu, e mole tautea anai tatou. 32Kae ka e fakamaaui tatou e te Aliki, pea e ina tautea tatou, ke aua naa tautea tatou fakatahi mo te malamanei. 33Koia, oku tehina, ka kotou fakatahitahi ki te kai, kotou fetalitaliaki ia koutou. 34Kapau e fia kai he tahi, ke kai ia i tona api; ke aua naa kotou fakatahi ke aumai ai he fakamaau kia koutou. O uhiga mo te tahi ake u mea, e hoki au vakai anai natou moka au kaku atu anai.
ទើបបានជ្រើសរើសហើយ៖
Uluaki tohi a Paulo ki te kau KOLINITO 11: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland