Uluaki tohi a Paulo ki te kau KOLINITO 12
12
Meaofa fakalaumalie
1Ki te mea o uhiga mo te u meaofa fakalaumalie, e mole au loto, u tehina, ke kotou nofo i te fakapouli. 2E kotou iloi, i takotou kei nofo i te pagani, nee kotou tuku koutou ke ave ki ni taulaatua gutu mate, pea nee taki koutou e natou. 3Koia e au fakaha atu kia koutou e mole ui e he tahi, moka palalau ia i te Laumalie o te Atua: E malaia ia Sesu! Pea e mole feala ke ui e he tahi, moka e mole palalau ia i te Laumalie Maonioni: E Aliki ia Sesu.
4Pea koeni, e i ai te u meaofa kehekehe, kae ko te Laumalie pe e tahi; 5mo te u tauhi kehekehe, kae ko te Aliki pe e tahi; 6mo te u gaue kehekehe, kae ko te Atua pe e tahi ae e ina fai te u mea fuli i te tagata fuli.
7Kae e foaki e te Laumalie ki te tagata takitahi he meaofa ke fakaha ai ia ia, o uhiga mo te lelei fakatahi. 8Koia, kua foaki ai e te Laumalie ki he tahi he palalau o te poto; ki he tahi ake, he palalau o te iloilo, aki pe te Laumalie e tahi; 9ki he tahi ake, te tui, aki pe te Laumalie e tahi; ki he tahi ake, te meaofa o te fakamauli o te u mahaki, aki pe te Laumalie e tahi. 10Ki he tahi ake, te meaofa o te fai o ni milakulo; ki he tahi ake, te tala fakapolofeta; ki he tahi age, te iloi o te u laumalie; ki he tahi age, te meaofa o te u palalau kehekehe; ki he tahi age, te fakamahino o te u lea. 11Ko he tokatahi pe pea ko te Laumalie e tahi ae e ina fai te u mea fuli aia, pea mo ina tufa natou ki te tagata takitahi o mulimuli ki tona finegalo.
Ko te kilisitiano ko te koga sino o Kilisito
12Koia, o hage ko te sino e tahi ia pea e lahi te u kogasino e ina mau, pea ko te u kogasino fuli o te sino, logo pe tona lahi, e natou fau pe he sino e tahi: pea e feia foki mo Kilisito. 13Koteuhi nee papitema fuli tatou i he Laumalie e tahi, ke fau he sino e tahi, pe Sutea, pe Keleka, pe popula, pe lauatea, pea nee fakainu fuli tatou mai he Laumalie e tahi.
14Koia ko te sino e mole ko he kogasino e tahi, kae e fau ia aki he u koga sino e lahi. 15Kapau e ui e te vae: Koteuhi e mole ko he nima au, e mole au kau ki te sino; pe e mole kau anai ia ki te sino i te mea aia? 16Pea kapau e ui e te taliga: Koteuhi e mole ko he foi mata au, e mole au kau ki te sino; pe e mole kau anai ia ki te sino i te mea aia? 17Kapau ko te sino katoa nee ko he foi mata, pe e ifea anai te logoaga? Kapau nee logoaga katoa ia, e ifea anai te mamanu? 18Koeni nee fakatuu e te Atua te u kogasino takitahi i te sino o mulimuli ki tona finegalo. 19Kapau ko te u kogasino fuli ko he kogasino pe e tahi, e ifea anai te sino? 20Kae koeni, e lahi te u kogasino, kae ko te sino pe e tahi. 21E mole feala ke ui e te foi mata ki te nima: E mole ke aoga mai kia au; pe e ui e te foi ulu ki te u vae: E mole kolua aoga mai kia au. 22Kae e lelei age, ko te u kogasino o te sino ae e mata mai e vaivai, e natou aoga. 23Pea ko natou ae e tou ui e mole mauhiga i te sino e tou tokaga lahi age kia natou. Pea ko otatou koga sino ae e mole palalau ki ai, e tou tokaga lahi age kia natou; 24kae ko natou ae e matalelei, e mole aoga ke tou tokaga kia natou. Koteuhi nee fai e te Atua te sino ke tuku te fakaapaapa o lahi age ki te u kogasino ae e fakapulipuli, 25koteuhi ke aua naa i ai ni mavaevae i te sino, kae ke fetokagaaki te u kogasino fuli. 26Pea kapau e mamahi he kogasino e tahi, e mamahi te u kogasino fuli fakatahi mo ia; pea kapau e fakamauhiga he kogasino e tahi, e fiafia te u koga sino fuli fakatahi mo ia.
27Ko te sino koutou o Kilisito, pea ko ona kogasino koutou takitahi. 28Pea nee fakanofo e te Atua i te Ekelesia, uluaki te kau apositolo, lua te kau polofeta, tolu te kau faiakonaki, pea hoholo mai ai natou e natou mau te meaofa o te u milakulo, pea mo natou e natou mau te u meaofa o te fakamauli mahaki, o te tokoni, mo te lagiaki, mo te palalau i te u lea kehekehe. 29Pe e natou apositolo fuli? Pe e natou polofeta fuli? Pe e natou faiakonaki fuli? 30Pe e natou mau fuli te meaofa o te u milakulo? Pe e natou mau fuli te meaofa o te fakamauli mahaki? Pe e natou palalau fuli i te u lea kehekehe? Pe e natou fakahokolea fuli?
31Koia kotou holi ki te u meaofa ae e lelei tukupau. Pea e au toe fakaha atu anai kia koutou he ala takimua aupito.
ទើបបានជ្រើសរើសហើយ៖
Uluaki tohi a Paulo ki te kau KOLINITO 12: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland