Uluaki tohi a Paulo ki te kau KOLINITO 10
10
Faifaitakiaga i te hisitolia o Iselaele
1U tehina, e au loto ke koutou manatui nee nofo fuli atatou tamai i te malumalu o te ao, pea nee natou fakalaka fuli i te tai, 2pea nee papitema fuli natou ia Moisese i te ao mo te tai, 3pea nee natou kai fuli ki he meakai fakalaumalie e tahi, 4pea nee natou inu fuli ki he meainu fakalaumalie e tahi, koteuhi nee natou inu ki he maka fakalaumalie nee mulimuli ia natou, pea ko te maka aia ko Kilisito. 5Kae ko te tokolahi o natou nee mole lelei ia e te Atua, koia nee natou mamate ai i te toafa.
6Nee hoko te u mea aena o hage ko he u faifaitakiaga kia tatou, ke aua naa tou mau ni holi kovi o hage ko te u holi kovi nee natou mau. 7Aua naa kotou liliu ko he u tauhi taulaatua, o hage ko ihi o natou, o hage ko te mea nee tohi: Nee nonofo leva ki lalo te hahai o kakai mo iinu, pea nee natou tutuu ake leva ki oluga o fakafiafia. 8Aua naa tou feauaki, o hage ko te feauaki a ihi o natou, pea nee mamate ai te toko uafulu ma tolu afe i he aho e tahi. 9Aua naa tou ahiahii te Aliki, o hage ko tona ahiahii e ihi o natou, pea nee tamatei natou e te u gata. 10Aua naa kotou munamuna, o hage ko te munamuna a ihi o natou, pea nee tamatei natou e te aselo o te malaia. 11Nee hoko te u mea fuli aia kia natou ko ni fakatokaga mai kia tatou, pea nee tohi natou ko totatou akoi, ia tatou aeni kua kaku mai ki te fakaosi o te u sekulo. 12Koia, ko ae e manatu e tuu ia i oluga, ke tokaga ia naa higa!
13E mole he fakahala e tahi kua kaku atu kia koutou nee fakalaka i te malohi o te tagata, pea ko te Atua e agatonu, e mole ina fakagafua anai ke fakahalai koutou o fakalaka i tokotou malohi; kae e ina tuku atu anai fakatahi mo te fakahala te faigamalie ke kotou hao ai pea mo te malohi ke kotou matatali ia.
E mole tatau te laupapa o te Aliki mo te tauhi ki taulaatua
14Koia, oku ofaaga, kotou hola mai te tauhi ki te u taulaatua.
15E au palalau atu o hage ki ni tagata popoto; kotou vakai totonu te mea e au palalau atu ki ai. 16Ko te ipu o te tapuakina ae e tou tapuakii, pe e mole ko te komunio aia ki te toto o Kilisito? Pea ko te pane ae e tou tofitofi, pe e mole ko te komunio aia ki te sino o Kilisito? 17E i ai he foi pane e tahi; logo ai ko tatou e tou kaugamalie, kae e tou faufau he sino e tahi koteuhi e tou kai fuli ki he foi pane e tahi. 18Kotou sio ki te hahai o Iselaele i te kakano: Ko natou e natou kai te u vikitima pe e mole natou komunio mo te aletale? 19Pe kotea foki e au fia palalau atu ki ai? Pe ko he mea mauhiga te kanoimanu nee sakilifisioi ki te u taulaatua? Pe ko he mea mauhiga te taulaatua? Kailoa osi. 20Kae e au ui atu ko te mea e sakilifisioi e te kau pagani, e natou momoli ia ki te u temonio kae e mole ki te Atua; pea e mole au loto ke kotou komunio mo te kau temonio. 21E mole feala ke kotou inu te ipu o te Aliki pea mo te ipu o te kau temonio; e mole feala ke kotou kau ki te laupapa o te Aliki pea mo te laupapa o te kau temonio. 22Pe e tou loto ke tou fakatupu te fuaa o te Aliki? Pe e tou malohi age ia ia?
Te lao o te ofa e taki ia te u mea fuli
23E gafua te mea fuli, kae e mole aoga te mea fuli; e gafua te mea fuli, kae e mole faufau te mea fuli. 24Ke aua naa kumi e he tahi te mea e aoga kia ia totonu, kae ki te mea e aoga kia natou ake ae. 25Kotou kai ki te u mea fuli e fakatau i te malese*, kae aua naa kotou fai ni fehui o uhi ko te kosiasi; 26koteuhi a te Aliki te kele katoa mo te u mea fuli i ai. 27Kapau e fakaafe koutou e he tagata hee tui pea e kotou loto leva ke kotou olo ki ai, kotou kai ki te u mea fuli e foaki atu anai kia koutou, kae aua naa kotou fehui o uhi ko te kosiasi. 28Kae kapau e ui atu leva e he tahi kia koutou: Nee momoli te mea aeni i he sakilifisio! aua takotou kai ki ai, uhi ko ia nee ina fakatokaga atu kia koutou pea mo tona kosiasi. 29E mole au palalau i heni o uhiga mo tokotou kosiasi, kae ki te kosiasi o ona. He kotea e fakamaaui ai anai toku ateaina e te kosiasi o he tahi kehe? 30Koteuhi kapau e au kai mo he loto fakafetai, kotea e valoki ai anai au o uhiga mo he mea e au fakafetai ai?
31Koia pe kotou kai, pe kotou inu, pe kotou fai he mea pe, kotou fai te mea fuli ki te kololia o te Atua. 32Aua naa kotou liliu ko he higaaga ki te kau Keleka, pee ki te kau Sutea, pee ki te Ekelesia o te Atua. 33E feia pe mo au, e au faiga ke au lelei ki te hahai fuli pe i te u mea fuli pe. E mole au kumi te mea e lelei kia au, kae te mea e lelei ki te kaugamalie, ke haofaki ai natou.
ទើបបានជ្រើសរើសហើយ៖
Uluaki tohi a Paulo ki te kau KOLINITO 10: WB2011
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland