Dalaana 25
25
Tala lahaꞌ Abraham a Keturaa ra
1Filoon fi Saara, Abraham kooɗte ɓeleɓ kay, bi hínú Keturaa. 2Ɓelaa límíɗté rí Simran, Yoksan, Medan, Majaan, Yisbak a Suwaa. 3Yoksan daa boffi Saba a Dedan. Asurra, Létússë a Léwúmmë coosaanuu Dedan na. 4Majaan daa boffi Efaa, Efeer, Hanok, Abida a Eldaa. Ƴaa daa ɓëy tali Keturaa. 5Húlëꞌ Abraham ra, ɗi heliɗte Isaak alal mi ɓéeɓ. 6Húmú homaꞌ ri ëldúnë rë, yúhëꞌ rí biti yee tallaꞌ ri pesi ra gaanlay, ɗi onte koyya lahuu ɓeleɓɓi kayya ra na alal ma, yeñce wa gini ín waal púlëen naꞌ, wa wuluute Isaak.
Húlí Abraham a haji
7-8 Abraham ɓahate níi paangaawte, na anti ɗeefiɗ caacci ɓúudé. Na húl ɗí rë, ɗeef ɗi pesse kíil tíméer a kíil sabay paana a kíil iip (175). 9Koyyi, Isaak a Ismayel hacuu ri kila Makpelaa, bee jaanndaꞌ Mamre, hom meey Eforon koon ra. Eforon koy Heda hínú Sohar ra. 10Abraham húmú lomaꞌ meeya Hetta na. Ɓani ɓeleɓi Saara daa boku hacaa. 11Filoon fi húlí Abraham, Koo barkelte koohi Isaak. Ɗi dékké hëbís yéemë na wonuu Lahaay Roy ra.
Ɓëy tali Ismayel
12Ƴee daa ɓëy faam Ismayel fi Abraham a Agaar fi ɓëy Ésíp, ñaami Saara. 13Tii yi koyyi Ismayel dalaꞌte saawa níi pëlíin fë në daa wa ƴeh : Nebayot, Kedaar, Atbeyel, Mipsaam, 14Misma, Duma, Massa, 15Hadat, Tema, Yetur, Nafis a Ketma. 16Ƴaa daa tii yi koyyi sabboo a ana yi Ismayel. Bina-bina ɓéeɓ kélfë tal, te gina ílíf ɗí rë teyu ɗii na. 17Na ɗeefiɗ Ismayel caacci ɓúudé rë, ɗeef ɗi lahte kíil tíméer a kíil sabay éeyë a kíil paana (137). 18Ɓëy faam Ismayel dékú dalaꞌte Hawilaa, larute níi Súur, hëbís Ésíp, di waal Asuur. Ɗaaha, wa wuluute mboko yi kayya ɓéeɓ#25.18 wa wuluute mboko yi kayya ɓéeɓ : Lahte ɓëewí habuu ri ɗeh : ɗi (Ismayel) húmú júɓëey a mboko yi..
Esawuu a Yakop
19Bee daa naaɓii faam Isaak koy Abraham. 20Lahaꞌ ri kíil sabay iniil (40) ra, ɗi húmú kooɗ Rebekaa koy-yaafi Laban. Rebekaa koy Betuwel Arameyeŋi dék Mesopotami. 21Ɓeleɓ Isaak húmú mínéh lah koy ; Isaak ɗagiɗte ri, Koo-Yahwee tahte ɗaŋa, ɓelaa pokaꞌte ri loo síis. 22Hompe níi koyya na yejantuu filiɓ lowa, ɗi tahte won tih : « Bee ke soꞌ bee yi kan ? » Kolaꞌ ri afi ra, 23Yahwee won ɗi tih :
« Gin ana daa faanu ;
talli ana yi bokuuy ay ɗúhëꞌ ɗoo na ;
ɓëyí yínëe nay luke doole,
te ɓahaa nay hene súrgíi ñéedë#25.23 Di ɓëy Israyel na, síisë ɗéɓpí límú rë, daa ɓahii bee míllëꞌ rë.. »
24Tílëꞌ níi lowa lahte ra, Rebekaa kúɗ síis ti ɗee húmú wonuu ri ra nen. 25Bee ɗéɓpí ac ra luum ti feey fi tagu nen, faana ɓéeɓ paalte fënúf ; ɗi dëekúuté Esawuu#25.25 Esawuu : Tii Esawuu di ébrë madaꞌ a : faana líiffé a fënúf.. 26Na ac ñéedë rë, habaaloh púgúlúɓ Esawuu. Ɗi dëekúuté Yakop#25.26 Yakop : Tii Yakop di ébrë madaꞌ a : púgúlúɓ mbée nofaꞌ.. Límí tuŋka, ɗeef Isaak lahaꞌ kíil sabay pëenë (60).
Esawuu yeraꞌte tígí saaw ki
27Ooru tuŋka ra, Esawuu hente dana gaan te hoñci homaꞌ luufa ; Yakop bi sos ri, na ɗúhéh faam. 28Isaak, bi neɓaꞌ ri boꞌ luuf níi, lukki fahaꞌ Esawuu ; ndaa Rebekaa lukki fahaꞌ Yakop.
29Lahte bis, Esawuu ɗúhëꞌ luufin mokke níi mok, ɗeef Yakop na paŋ ñam, 30ɗi won ɗi tih : « Top mi mínlíléh ! Yíp sëe nëe on ñami luumi ƴee mi hon, mee húl rë a yaaɓ. » Yee sëeddúu rí tii Edom ra haalaꞌ yii bah : Daa ri luuma. 31Tígí daaha, Yakop won ɗi tih : « Yeɗ soꞌ tígí saaw ku paaƴ#25.31 Lam koy saaw di ébrë daa na luk bi ɓëewí kayya ana.. » 32Esawuu tahte won tih : « Moh ! Bee na húlëꞌ mí a yaaɓ bee ra, tígí saaw ki soꞌ ay soo ɓaate yih ? » 33Yakop tíkílté won tih : « Añee ri ! » Esawuu añohte, yeɗɗaꞌte Yakop tígí saaw ki. 34Tígí daaha, Yakop túmíɗté rí ndak, yeɗte ri mbúurú. Esawuu ñampe, hante, kolohte saañce waali. Ɗi habaay tígí saaw ki yin kah-kah.
ទើបបានជ្រើសរើសហើយ៖
Dalaana 25: NDV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.