Dalaana 26
26
Pesi Isaak a Rebekaa di Geraar
1Bín fë, yaaɓ húmú laɓpe gina, yaabi bokaay a bee húmú ɗeefaꞌ Abraham ra. Isaak kolohte saañce Abimelek buuri Fílístí në Geraar. 2Ɗeef Koo-Yahwee feeñiyohte Isaak, wonte ri tih : « Ngana pay Ésíp, lah home gina nay mi roo teeɓe ra. 3Lah tooke gina, mii roo hel#26.3 mii roo hel : Lahte ɓëewí habuu ri ɗeh : mi ot ɗoo na. te may roo barkel. May yeɗ ɗoni séttú feey fi baa ɓéeɓ, ti di húmú gapaꞌ mi ri boffu Abraham, mi añohte ra. 4May keñil talu, séttú caak níi ti hulla sun nen, mi yeɗ wa feey fi baa ɓéeɓ, te ginna feey fa ɓéeɓ ay barkeluu tii wa, 5ndah biti Abraham kelohte woni soꞌ, ñeete waala teeɓ mi ri ra, paŋke yee nah mi ri ra, ñeete kootaa pok mi ra. » 6Isaak tasaꞌte ɗaaha Geraar.
7Meeluu ri ɓëy gina yii leŋ ɓeleɓi na, ɗi won wa ti yaa ñéedí ; ɗi neeh biti won ɓeleɓi raa, ay hawu húl, bi ɗam Rebekaa níi ɗam. 8Bi maañis Isaak gina, lahte bis, Abimelek buuri Fílístí ɗúhíɗ afi falanteeri lasi, séenté Isaak na hégílëꞌ a ɓeleɓi Rebekaa, na mëesíɗ ɗí. 9Abimelek dëekrëhté Isaak, won ɗi tih : « Ɗi míntí hena ɓeleɓu ! Fu wonaꞌ biti ɗi ñéedú ɗíh ? » Isaak tahte won ɗi tih : « Mi neeh biti mi hawu húl af ɗi. » 10Abimelek tahaatte, won tih : « Fu pagaꞌ fun pagadi baa ɗíh ? Tasse ƴutuuɗ koon, ow di ɓëy gina fanoh a ɓeleɓu, fu ɓek fun ɓéeɓ lool. »
11Kolaꞌ baaha, Abimelek wolaꞌte un filiɓ gina ɓéeɓ won tih : « Ɓëyí leɓ ɓëyí bee mbée ɓeleɓi na, ay hawu húl. »
12Línëꞌ Isaak kíilí baaha, bi barkel ri Yahwee, gadi gaante níi gaan. 13Alal mi na tíl na ɓaatoh, na ɓaatoh níi ɗi caakke yin. 14Ɗi húmú lahte i yup har, peꞌ, fana a i súrgë caak, tahte níi ɓëy Fílístí eeñnjuute ri, 15púuɓúté yéemmë húmú hacu súrgë yí Abraham boffi, na pesaꞌ ri ra. 16Abimelek antee won Isaak tih : « Fu lukke fun doole leegi, kolee dee fu saañ. » 17Isaak kolaꞌ ɗaaha gina, saañce yíppé húur mí Geraar, hompe na.
Isaak a yéemmí
18Ɗi sukutrohte yéemmë húmú hacu na pesaꞌ Abraham boffi ra. Daa wa yéemmë húmú púuɓú ɓëy Fílístí, húlëꞌ boffi ra. Ɗi yeraatte wa tii ya húmú sakiɗ wa boffi ra. 19Bisa ín, súrgë yí Isaak hacu yéem húur më, daɓute cul muluɓ. 20Níirëh yë Geraar yejuute íñëꞌ a ƴi Isaak, wonu ti mulaa ƴi wa. Bi lah yéemë hécëꞌ, Isaak dëekëꞌté rí « Maanndaꞌ ». 21Kolaꞌ baaha, súrgë yí Isaak hacaatute yéem kay. Yéemí baaha lahilte íñëꞌ ; Isaak dëekëꞌté rí « Kaaꞌa ». 22Ɗi antee koloh daa saañce, hacilte yéemí éeyë fí lahay won yínée. Ɗi dëekëꞌté rí Rehobot (daa ri : deya). Ɗi won tígí daaha tih : « Koo-Yahwee onte yen deyi gaani yen ay naa mín saamaꞌ alal. » 23Isaak kolohte daa saañce Beer-Sebaa.
24Yiin lah ri ra, Yahwee feeñiyohte ri elgin won ɗi tih : « Daa mi Koope fi boffu Abraham. Ngana néekíñëꞌ yin, ndée mii roo yeris, te may roo barkel. Af súrgíi sëꞌ Abraham, tahte may keñil talu níi séttú caak. » 25Isaak yíppé ílíƴ hawraa daaha. Na ɗaŋ ri Koo ra, ɗi ñeyaꞌ ri tiyi, dëekëꞌté rí Yahwee, yíppé taanta yi, súrgë yí dalaatute hac yéem kay.
26Abimelek kolohte Geraar, ñéerëꞌté a Ahusat kooji, a Pikol kélfíi wohoh ya, ɗeefiɗte Isaak. 27Isaak won wa tih : « Ɗon ayu yi soo na te ɗon fahuuy soꞌ níi ɗon líkúté sëꞌ ginon ? » 28Wa tahute wonu ri tih : « Fun olu olo biti Yahwee ñéerëꞌté a ro, fun ayu biti koon yen pokantaꞌ kooƴ, yen añoh ri hanndal ki yen. 29Añee biti fii fun paŋ yin misik ndée fun pagiru ro yin wun kut, te fu sayaꞌ a jaamma, ɗo fa Yahwee barkel ro woteh ra. »
30Isaak pagiɗte wa ñami neɓpe, yeɗte wa han. 31Yíilëꞌ Koo ɓaabin cúɓ kéy fín fë, wa pokantuute kooƴ, añuute, Isaak pëkíssé wë, wa takuute a jaamma.
32Yiin fa, súrgë yí Isaak ayute woni biti yéemë na hacu wa ra gúlté. 33Isaak dëekëꞌté yéemë Sibaa (daa ri : añoh). Tii Beer-Sebaa fa na wonuu gini baa ra haalaꞌ yii baa níi a woteh.
Ɓeleɓɓi Esawuu
34Lahaꞌ Esawuu kíil sabay iniil (40) ra, ɗi kooɗte ɓeleɓ ana yi nonu tali Het : Yúdít koy Béerí, a Basmat koy Elon. 35Ɓeleɓɓi ana yi hetta kooɗ Esawuu ra yahute pesi Isaak a Rebekaa.
ទើបបានជ្រើសរើសហើយ៖
Dalaana 26: NDV
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.