Апостол. 11
11
11-НЭ ЕДЗЫГЪУЭ
Ерусалим и члисэ зэхуэсым и пащхьэм Петр къэхъуар зэрыщиӀуэтэжар
1Хамэ лъэпкъхэм щыщхэми Тхьэм и псалъэхэр зэращтар апостолхэмрэ Иудей хэкум ис къуэшхэмрэ зэхахащ. 2Апхуэдэу щыхъум, Петр Ерусалим щыкӀуам, сунэт ящӀахэм Петр илэжьар ямыдэу, 3жраӀащ:
– Уэ сунэт ямыщӀахэм я деж ущӀыхьэри уадэшхащ.
4Петр Ӏуэхур зэрекӀуэкӀар чэзу-чэзууэ къагуригъаӀуэу щӀидзащ итӀанэ:
5– Иоппие къалэм Тхьэм сыщелъэӀурт. Тхьэм си акъылыр сщхьэщихури, щэкӀ хужь иным хуэдэу, зыгуэр уафэм къехыу къэслъэгъуащ абы щыгъуэ. Ар къуапиплӀкӀэ кӀэрыщӀауэ, уафэм кърагъэлэлэха хуэдэ, си пащхьэм ихьащ. 6ЩэкӀ хужьым сыщеплъым, лъакъуиплӀкӀэ зекӀуэ Ӏэщхэр, хьэкӀэкхъуэкӀэхэр, ныбэгукӀэ къэзыпщыхь псэущхьэхэр, къуалэбзухэр слъэгъуащ. 7Макъ гуэрым «Петр, къэтэдж. ФӀэгъэжи, шхы!» къызжиӀэу зэхэсхащ.
8«Хьэуэ, Зиусхьэн, ар хъуххэнукъым, мышхыпхъи хьэрэми зэи зыӀуслъхьакъым», жысӀэри жэуап стыжащ.
9– А макъыр уафэм етӀуанэу къиӀукӀащ: «Тхьэм хьэлэлу икӀи шхыпхъэу жыхуиӀар уэ хьэрэму умылъытэ», жиӀэу. 10Апхуэдэу щэнейрэ хъуащ. Уафэм псори дэкӀуеижащ итӀанэ.
11– А дакъикъэ дыдэм Кесарие къалэм кърагъэкӀыу си деж къагъэкӀуа лӀищ сэ сызыщӀэс унэм и бжэӀупэм къыӀухьащ. 12Сымычэнджащэу, абыхэм ящӀыгъуу, сыкӀуэну Тхьэм и Псэ ЛъапӀэм къызжиӀащ. Мы къуэшихри си гъусэу дыкӀуэри, а лӀым и унэм дыщӀыхьащ. 13А лӀым къыджиӀащ и унэм мелыӀыч гуэр къыщыхутэу, мыпхуэдэу жиӀэу зэрилъэгъуар: «ПетркӀэ зэджэ Симон къашэну лӀыкӀуэхэр гъакӀуэ. 14Уэрэ уи унагъуэм исхэмрэ фымыкӀуэду фыкъезыгъэлыну псалъэхэр абы къыбжиӀэнущ».
15– Сыпсэлъэну щыщӀэздзэм, Тхьэм и Псэ ЛъапӀэр абыхэм къахуехащ, дэри япэм къызэрытхуехыгъам хуэдэу. 16Абы щыгъуэ сигу къэкӀыжащ Зиусхьэным жиӀэгъа псалъэхэр:#11:16 Зиусхьэным жиӀэгъа псалъэхэр – еплъ 1:5. «Иуан цӀыхухэр псыкӀэ иумэхъу щытащ, ауэ Тхьэм фэ езым и Псэ ЛъапӀэмкӀэ фиумэхъынущ». 17Зиусхьэну Хьисэ МэссихькӀэ фӀэщхъуныгъэ диӀэ щыхъум, Тхьэм езым и Псэ ЛъапӀэр дэ къызэрытхуригъэхыгъам хуэдэу, абыхэми къахуригъэхамэ, сэ сыхэт Тхьэм сыпэувыну?
18А псалъэхэр щызэхахым, ахэр щым хъуащ. Тхьэм щӀыхь хуащӀри, жаӀащ:
– Хамэ лъэпкъхэри я гуэныхьхэм хущӀегъуэжынурэ, мыкӀуэдыжын гъащӀэ яӀэ хъуну Тхьэм игъуэу илъытащ абы щыгъуэ.
Антиохие къалэм члисэ зэхуэс щыӀэ зэрыхъуар
19Стефан мывэкӀэ еуэурэ яукӀа нэужь, ХьисэкӀэ фӀэщхъуныгъэ зиӀэхэм гугъуехь куэд зэрырагъэшэчам къыхэкӀкӀэ, ахэр зэбгрыкӀащ. Хьисэ теухуа хъыбарыфӀыр журтхэм фӀэкӀа зыми хуамыӀуатэурэ, Финикие хэкуми, Кипр хытӀыгуми,#11:19 хытӀыгу – еплъ 2:11. Антиохие къалэми#11:19-20 Антиохие къалэр – Рим къэралышхуэм щыщу Сирие хэкум и къалэшхуэу щытащ. нэс кӀуащ ахэр. 20Кипр хытӀыгум щыщ лӀы гупми, Кириние къалэм щыщ нэгъуэщӀ лӀыхэми, Антиохие къалэм* кӀуа нэужь, Зиусхьэн Хьисэ теухуа хъыбарыфӀыр алыджхэми#11:20 алыджхэр – грекхэрщ. хуаӀуэтащ. 21Зиусхьэныр я гъусэт абыхэм икӀи цӀыху куэд, фӀэщхъуныгъэ яӀэ хъуурэ, Зиусхьэным и гъуэгу техьащ.
22Мы Ӏуэхухэм я хъыбарыр Ерусалим щыӀэ члисэ зэхуэсым щыщхэм ялъэӀэсащ. ЩалъэӀэсым, Варнавэ Антиохием ягъэкӀуащ. 23Варнавэ Антиохием кӀуэри, Тхьэм и нэфӀыр абыхэм къазэрыщыхуэр щилъагъум, гуфӀащ, емыщу Зиусхьэным гурэ псэкӀэ хуэпэжыну яхуигъэуващ. 24Варнавэ цӀыхуфӀу щытащ. Тхьэм и Псэ ЛъапӀэри фӀэщхъуныгъэри и гум ину илъащ. Апхуэдэурэ, ЗиусхьэнымкӀэ фӀэщхъуныгъэ зиӀэхэм я бжыгъэм куэд къыхэхъуащ.
25Щаул лъыхъуэну Варнавэ Тарс къалэм кӀуащ итӀанэ. Абы ар къыщигъуэтри, Антиохием здишащ. 26Члисэ зэхуэсым щыщхэм я гъусэу зэхуэсурэ, цӀыху куэдым Тхьэм и псалъэхэр илъэс псокӀэ яригъэщӀащ. ХьисэкӀэ фӀэщхъуныгъэ зиӀэхэм «чыристанкӀэ» еджэ япэ дыдэ щыхъуар Антиохиерщ.
27А махуэхэм бегъымбар гуп Ерусалим къикӀри Антиохием къэкӀуащ. 28Абыхэм ящыщу Агав зи цӀэр къэтэджри, дуней псом гъаблэшхуэ къызэрыщыхъунур Тхьэм и Псэ ЛъапӀэм абы и гум кърилъхьэри къыжригъэӀащ. Клавдий кесарым#11:28 Клавдий кесарыр – Хьисэ къэхъуа нэужь, 41-54 гъэхэм Рим къэралышхуэм и кесару щытащ. Агав зи хъыбар жиӀа гъаблэшхуэр щыщыӀар Хьисэ къэхъуа нэужь илъэс 46-рэ дэкӀауэщ. и тепщэгъуэращ ар къыщыхъуар. 29ХьисэкӀэ фӀэщхъуныгъэ зиӀэхэм, щхьэж зэрылъэкӀкӀэ, Иудей хэкум ис къуэшхэм дэӀэпыкъуэгъу яхуэхъун мурад ящӀащ абы щыгъуэ. 30ФӀэщхъуныгъэ зиӀэхэм апхуэдэу ящӀщ, абыхэм зэхуахьэса ахъшэр Варнавэрэ Щаулрэ ӀэщӀалъхьэри, члисэ зэхуэсым и нэхъыжьхэм#11:30 нэхъыжьхэр – члисэ зэхуэсым Ӏуэхуу щекӀуэкӀым и унафэщӀ къуэшхэрщ. хуахьыну ягъэкӀуащ.
ទើបបានជ្រើសរើសហើយ៖
Апостол. 11: KbdNTGP2017
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Библиер зэдзэкӀыным елжь Институт, 1993, 2007, 2011, 2017
