Апостол. 12
12
12-НЭ ЕДЗЫГЪУЭ
Тепщэныгъэ зиӀэхэм Екъуб зэраукӀамрэ Петр лъэхъуэщым зэрыщӀадзамрэ
1Ирод пащтыхьым#12:1 Ирод пащтыхьыр – Ирод Агриппэ Япэрейрщ. Хьисэ къэхъуа нэужьым 41-44 гъэхэм ар Израил къэралым и пащтыхьу щытащ. Ирод Агриппэ Япэрейр Ирод Иным и къуэм и къуэжщ. члисэ зэхуэсым щыщ цӀыху гуэрхэр яригъэубыдри, и заулӀхэм хьэкӀэкхъуэкӀагъэ ярыригъащӀэу щӀидзащ а махуэхэм. 2Иуан и къуэш Екъубыр#12:2 Екъуб – Зеведей и къуэщ, Хьисэ и гъуэгу ирикӀуэ пщыкӀутӀым ящыщщ. джатэкӀэ иригъэукӀащ. 3Ар журтхэм яфӀэфӀ зэрыхъуар щилъагъум, Ирод и зауэлӀхэм Петри яригъэубыдащ. Ар къыщыхъуар ЩӀакхъуэ Мыгъэтэдж щашх махуэшхуэхэращ.#12:3 ЩӀакхъуэ Мыгъэтэдж щашх махуэшхуэхэр – еплъ Маттэ 26:2. 4Петр яригъэубыдри, лъэхъуэщым щӀригъэдзащ Ирод, зауэлӀ плӀырыплӀ хъу гупиплӀым яхъумэну яӀэщӀилъхьащ ар. Ирод и мурадт ар ӀутӀыж махуэшхуэм и ужькӀэ хеящӀэм и пащхьэм иришэну.
5Апхуэдэу Петр лъэхъуэщым щӀагъэсащ, члисэ зэхуэсым щыщхэр еш ямыщӀэу Тхьэм хуелъэӀуащ абы апщӀондэху.
МелыӀычым Петр лъэхъуэщым къызэрыщӀишыжар
6Ирод пащтыхьым Петр хеящӀэ пащхьэм щришэну махуэм и пэ къихуэ жэщым ар, Ӏэхъулъэхъу тӀуащӀэ иралъхьауэ, зауэлӀитӀым яку дэлъу жейрт. ХъумакӀуэхэм, бжэм Ӏуту, лъэхъуэщыр яхъумэрт. 7Зиусхьэным и мелыӀычыр а унэм къыщӀэхутэри, унэр нэху къэхъуащ напӀэзыпӀэм. МелыӀычыр Петр и джабэм еуӀури, къигъэушащ:
– ПсынщӀэу тэдж! – жиӀащ абы. Петр и Ӏэхэм Ӏэхъулъэхъур къыфӀэхуащ.
8– Зыхуапэ, уи вакъэхэри зылъытӀагъэ! – жриӀащ мелыӀычым Петр. Петр апхуэдэу ищӀащ. МелыӀычым жиӀащ итӀанэ:
– Уи щыгъын щӀыӀутелъыр щытӀагъи, си ужь иту къакӀуэ!
9Петр, мелыӀычым и ужь иту, лъэхъуэщым къыщӀэкӀыжащ. Ауэ мелыӀычым илэжьар пэжрэ мыпэжрэ Петр ищӀакъым, атӀэ зыгуэр къыхуэхутауэ и гугъащ. 10Япэрей хъумакӀуэ гупми етӀуанэрей хъумакӀуэ гупми къаблэкӀри, къалэ дыхьэпӀэм хэлъ гъущӀ куэбжэм нэсащ ахэр. Куэбжэм езыр-езыру абыхэм закъызэхуӀуихащ. Куэбжэм дэкӀри, зы уэрам ирикӀуа нэужь, Петр къигъанэри, мелыӀычыр ӀукӀыжащ напӀэзыпӀэм.
11ЗыкъыщищӀэжым, Петр жиӀащ:
– Зиусхьэным и мелыӀычыр къигъакӀуэу, Ирод сыкъызэрыӀэщӀихари, журт цӀыхухэм къысщыщӀыну жыхуаӀэ Ӏей псори симыгъэлъагъуу, сыкъызэрыригъэлари си нэгу щӀэкӀащ иджы.
12Петр къехъулӀар къыщыгурыӀуэжым, МарккӀэ зэджэ Иуан и анэ Мэрием деж кӀуащ ар. Абы деж цӀыху куэд щызэхуэсауэ Тхьэм елъэӀурт. 13Петр куэбжэм щытеуӀуэм, Родэ и цӀэу унэӀут хъыджэбз гуэр къэкӀуащ куэбжэр Ӏуихыну. 14Петр и макъыр къыщицӀыхужым, гуфӀэгъуэм зэщӀищтауэ, куэбжэр Ӏуимыхыу, унэм щӀэлъэдэжри, Петр куэбжэм зэрыӀутыр унэм щӀэсхэм яжриӀащ абы.
15– Уэ жыпӀэр пщӀэжыркъым, – къыжраӀащ абыхэм. Ауэ хъыджэбзыр жиӀам текӀакъым. ИтӀанэ жаӀащ:
– Ар Петр и мелыӀычырагъэнущ.#12:15 Ар Петр и мелыӀычырагъэнущ – дэтхэнэ цӀыхуми мелыӀыч гуэр иӀэрэ, абы ар къихъумэу къафӀощӀ журтхэм.
16Петр куэбжэм теуӀуэ зэпытт. Куэбжэр Ӏуахыу, Петр щалъагъум, хуабжьу ягъэщӀэгъуащ. 17Заущэхуну Петр Ӏэ яхуищӀри, Зиусхьэным лъэхъуэщым къызэрыщӀишыжар абыхэм яхуиӀуэтащ. ИтӀанэ жиӀащ:
– Екъуби#12:17 Екъуб – Зиусхьэн Хьисэ и къуэшхэм ящыщу, Ерусалим щыӀэ члисэ зэхуэсым и унафэщӀ къуэшхэм языхэзщ. адрей къуэшхэми къэхъуар евгъащӀэ.
Ар жиӀэщ, а унэм къыщӀэкӀыжри, нэгъуэщӀ щӀыпӀэ гуэрым кӀуащ.
18Нэху щыщым, зауэлӀхэр гузэвэгъуэшхуэм хэхуауэ зыр зым еупщӀыжырт:
– Дэнэ Петр щыбзэхар?
19ЗауэлӀхэм Петр къаригъэлъыхъуэри щамыгъуэтым, Ирод пащтыхьым хъумакӀуэхэм хьэкум ятрищӀыхьри яригъэукӀащ. Ирод пащтыхьыр Иудей хэкум икӀщ, Кесарие къалэм ехри, абы къыдэнащ.
Ирод пащтыхьыр зэрылӀар
20Ирод пащтыхьым Тир, Сидон къалэхэм дэсхэм хуабжьу гужьгъэжь яхуиӀэ хъуат. А къалэхэм дэсхэр зэгурыӀуэри, Ирод деж кӀуащ. Пащтыхьым хуэлажьэ Ӏэтащхьэу Власт зи цӀэм гурыӀуэри, пащтыхьыр къаригъэкӀужыну елъэӀуащ. Сыт щхьэкӀэ жыпӀэмэ пащтыхьым и къэралым къраш гъавэрат ахэр зэрыпсэур.
21Игъэува пӀалъэм Ирод, и пащтыхь щыгъынхэр щыгъыу, пащтыхь тахътэм тетӀысхьэри, цӀыхухэм я пащхьэм къыщыпсэлъащ.
22– Мыр цӀыху макъкъым, Тхьэм и макъщ, – жаӀэурэ цӀыхухэр зэрыгъэкӀийрт. 23Ирод пащтыхьым Тхьэм щӀыхьышхуэ зэрыхуимыщӀам щхьэкӀэ, Тхьэм и мелыӀыч гуэр а дакъикъэ дыдэм къригъэуащ. ХьэпӀацӀэхэм яшхыурэ, абы и псэр хэкӀащ.
24Тхьэм и псалъэхэм, цӀыху нэхъыбэм ялъэӀэсурэ, заубгъурт.
25Варнавэрэ Щаулрэ я Ӏуэхур щаухым, Ерусалим къыдэкӀыжщ, МарккӀэ зэджэ Иуан здашэри, Антиохие къалэм ягъэзэжащ.
ទើបបានជ្រើសរើសហើយ៖
Апостол. 12: KbdNTGP2017
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Библиер зэдзэкӀыным елжь Институт, 1993, 2007, 2011, 2017
