ZEKARIA 10
10
Ilaghiro ja BWANA jekira
1Mlombenyi BWANA vua ngelo ya kimu cha mwaka. BWANA nuo uredagha iwingu ja vua na mshushure; nuo ubonyagha mbuwa rikaie na miwalwa ideghedekie kwa kula mundu. 2Wandu weelaghaya sa ng'ondi wikilola njama kwa milimu; walaghui wiaghora malagho gha tee; wandu wamu wiafasiri ndodo ra tee relaghasha; waja wasi kwa kusowa kilongozi.#Mat. 9.36; Mk. 6.34 3BWANA waghamba, “Nakaia na machu kwa waghenyi wiwibonyeragha wandu wapo nguma, nani nichawikaba. Wandu wa Juda ni wapo, na ini BWANA Uwadie-Ndighi-Rose nichawilindia. Wichawuya farasi rapo ra wuda riwadie ndighi. 4Igho ja mbembenyi jichafuma Juda, kikosi cha hema chichafuma mzawo, ndana ya wuda ichafuma mzawo, na kula m'bonyi nguma uchafuma mzawo. 5Wandu wa Juda wichakaia wasimi sa masikari wifashagha wamaiza wawo a mazozonyi chienyi. Wichalwa na kuwisima wajoki farasi, angu BWANA oko andwamweri nawo.
6“Nichawibonya wandu wa Juda wikaie na ndighi;
nichawikira wandu wa Israeli.
Nichakaia na wughoma nawo, na kuwiwunja wose mzawo.
Wichakaia seji serewileghieghe jingi.
Ini ne BWANA Mlungu wawo;
nani nichatumbulia malombi ghawo.
7Wandu wa Israeli wichakaia na ndighi sa masikari;
wichakaia na kuboilwa sa wandu wanywa divei.
Wana wawo wichakumbuka wusimi ughu na kuboilwa,
kwa wundu ghwa agho BWANA ughibonyere.
8“Nichawiwanga wandu wapo na kuwikwanya chiaimweri.
Nichawikombua na kuwibonya wichurikie sa kala.
9Hata ngera nerewisaghisireghe aghadi ya
mbari ra wandu,
ela sena wichanikumbuka wiko ahoeni masanga gha kula;
nawo, chiaimweri na wana wawo wichakaia moyo
na kuwuya sena isangenyi.
10Nichawireda kufuma Misri na Ashuru,
na kuwivikisha mzinyi isangenyi kwawo koni.
Nichawikaisha Gileadi na Lebanoni,
na isanga jose jichachulwa ni wandu.
11Wikaida aghadi ya bahari ya wasi ghwawo;
ini BWANA nichaikaba mivo-mivo ya bahari,
na andu kumilie kose kwa Moda ghwa Naili kuchaoma.
Waashuru wikukasire wichaserwa
na mang'oni gha wandu wa Misri wichalaghasha ndighi rawo.
12Nichawibonya wandu wapo wikaie na ndighi,
wichanitasa na kunisikira.”
Ini BWANA naghamba.
ទើបបានជ្រើសរើសហើយ៖
ZEKARIA 10: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.