ZEKARIA 9
9
Kutanywa kwa wamaiza wa Israeli
1Agha ni malagho gha BWANA: Waghambie uchakaba isanga ja Hadraki, na muzi ghwa Dameshki. Si mizi ya vichuku va Israeli tu, ela hata na muzi m'baa ghwa Siria ni ghwa BWANA.#Isa. 17.1-3; Jer. 49.23-27; Amo. 1.3-5#Isa. 23.1-18; Eze. 26.1–28.26; Joe. 3.4-8; Amo. 1.9-10; Mat. 11.21-22; Lk. 10.13-14 2Hamathi iko mpakenyi ghwa Hadraki ni yake, na wokoni Tiro na Sidoni wiko na hikima ni yake wori. 3Tiro wakuaghie moni wurigha; wakutumbanyire feza kitungu sa teri, na dhahabu sa wuchafu ghwa chienyi. 4Ela BWANA uchamsoka vilambo vose uko navo, na kurikumba mali rake baharinyi; muzi ghwake ghuchakorwa ghusie. 5Muzi ghwa Ashkeloni ghuchawona na kuobua; muzi ghwa Gaza ghuchawona agho na kuwawa nandighi. Na muzi ghwa Ekroni wokoni ghuchanyamirwa na isuwirio jawo wori jichasia. Mzuri ufumagha Gaza uchasoweka, na Ashkeloni ghuchasigharika ghusene wandu.#Isa. 14.29-31; Jer. 47.1-7; Eze. 25.15-17; Joe. 3.4-8; Amo. 1.6-8; Zef. 2.4-7 6Wandu wirangane bagha wichakaia Ashdodi. BWANA waghamba, “Nichameria lukaso lwa wandu wa Filistia. 7Ndewichaaja nyama iko na bagha sena, hata kindo chingi wikanilo. Awo wifufunukagha wichawuya wandu wapo, na kuwuya kinyumba andenyi ya kichuku cha Juda. Wandu wa Ekroni wichawuya wandu wapo sa Wajebusi. 8Nichajilindia isanga japo, na kulegha ijeshi jingi jiseide aghadi yaro. Sichaasigha mkorongi ungi uwikoronge wandu wapo kwa kukaia namerie kuwona seji wandu wapo wikorongelo.”
Mzuri uchagha
9Zumenyi ee wandu wa Sioni!
Kemenyi kwa kuboilwa inyo wandu wa Jerusalemu!
Wonenyi mzuri onyu uamchea!
Oko na wusimi m'baa;
ela ni mmboa nao wajoka aighu ya punda;
punda mtini, mwana wa punda.#Mat. 21.5; Joh. 12.15
10BWANA waghamba,
“Nichainja magare gha wuda kufuma Israeli, na farasi
kufuma Jerusalemu;
na ndana ra wuda richanonwa.
Mzuri onyu uchabonya sere ikaie aghadi ya mbari ra wandu;
na nguma yake ichaera kufuma bahari
hata bahari,
na kufuma Moda ghwa Eufrate hata kutua kwa ndoenyi.”
Kuwuya kwa wandu wa Mlungu
11BWANA waghamba,
“Na kwa wundu ghwa ilaghano japo na oho
jimangishiro kwa bagha ya kizongona,
nichawifungua wandu wako wifume
andenyi ya kina chisewadie machi.#Kuf. 24.8
12Wuyenyi inyo m'barishiro muko na isuwirio,
wuyenyi andu konyu kwa wubanana.
Naghamba nichamlipa marasimio mando awi.
13Nichamtumia Juda sa ndana ya asikari
na Israeli sa mawanu.
Nichawitumia wandu wa Sioni sa lufu,
nipate kulwa na wandu wa Griki.”
14Niko BWANA uchafutuka aighu ya wandu wake,
na kukumba mawanu ghake sa luhehia;
BWANA Mlungu uchakaba tarumbeta,
na kughenda andenyi ya kikulughulu cha kusinyi.
15BWANA Uwadie-Ndighi-Rose uchawilindia wandu wake,
nawo wichawitotesha wamaiza wawo;
wichakema wudenyi sa wawongeri,
nawo wichawibwagha wamaiza wawo,
bagha yawo ichadika sa ya vizongona yadilwa madhabahunyi.
16Ituku ijo, BWANA Mlungu wawo uchawikira,
seji mlisha ukiragha chagha cha iranu jake;
nawo wichang'ala-ng'ala isangenyi kwake,
sa lulu ra kirumbu.
17Maza richakaia nicha saki!
Wandu wa irika wichakaia na ndighi kwa wundu ghwa viro na divei.
ទើបបានជ្រើសរើសហើយ៖
ZEKARIA 9: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.