ZEKARIA 11
11
Kughwa kwa wang'eti
1Rughua minyango yako ee Lebanoni,
modo ghukore misida#11.1 Misida: Misida aho yatumilwa sa fwana ya wabaa na wazuri. yako!
2Kema mchungu ee msumbesu, angu misida yaghwa;
iyo midi ikumikie yanoneka.
Kemenyi mchungu mlile ee mialoni ya Bashani,
ugho msidu m'baa ghwademwa.
3Wabonyi nguma waawuyakema kwa wasi;
wubaa ghwawo ghwameria kuinjwa!
Sikirenyi mrurumo ghwa shimba;
mbagho yawo ekaia iko Jordani yameria kunonwa!
Walisha wawi
4BWANA Mlungu wapo wanizerie, “Lisha ng'ondi riendaabwaghwa. 5Waghui waro wadaribwagha hata ndewinekwagha adhabu. Wadauza nyama na kughora, ‘BWANA ndekaso, dawuya wazuri wa mali nao!’ Walisha waro weni ndewine wughoma naro.”
6(BWANA waghamba, “Sichaakaia na wughoma ghungi na wandu wa isanga iji. Nichawika kula mundu aisi ya nguma ra m'baa wake. Wabaa wichakoronga ndoenyi, nani sichaakira ungi wawo na ndighi rawo anduangi.”)
7Awo wandu wereghueghe na kuuza ng'ondi wikaniandika kazi; ngawuya mlisha wa ng'ondi riendaabwaghwa. Ngawada vangu viwi; chimu ngachiwanga “Mvono” na chimu ngachiwanga “Wumweri.” Ngalisha ng'ondi. 8Andenyi ya mori ghumweri, ngachumbana na walisha wadadu werezamiloghe ni ini, dikasighana. 9Niko ngarizera ng'ondi, “Siwuyaamlisha sena. Iro riko refwa, nderifo; iro riko renonwa, nderinono, na iro risigharikagha, richatoteshana reni na reni.” 10Ngawada changu chapo chiwangwaghwa “Mvono,” ngachichikanya; eri nijinone ilaghano BWANA orebonyereghe na mbari rose. 11Kwa huwo ijo ilaghano jikanonwa ijo ituku. Awo wereghuagha na kuuza ng'ondi werekoghe wikinizighanira, wikamanya angu BWANA orekoghe ukighora nani kwa agho nabonya. 12Niko ngawizera, “Mkawona nicha, munineke mafungu ghapo; si huwo, kaienyi nagho!” Nawo wikanilipa vibelele va feza mirongo idadu kukaia mafungu ghapo.#Mat. 26.15#Mat. 27.9-10
13Niko BWANA ukanizera, “Vikumbe ivo vibelele va feza Hekalunyi andu kowika mali.” Niko ngawusa ivo vibelele va feza mirongo idadu, ijo ifungu weregheshereghe wei ni ifungu ibaa wanilipa, ngavikumba Hekalunyi andu kowika mali. 14Nao ngachikanya changu chapo cha kawi chiwangwagha “Wumweri,” kughunona wuruna ghwa Juda na Israeli.
15Nao BWANA ukanizera, “Wada kazi ya wulisha sena, ela kukaie sa mlisha wa kisha. 16Nawikie mlisha ozighana chagha chapo, ela ndetesiagha ng'ondi riturusiro ni kutoteshwa hata kulola rilagharie, angu kurighita iro rishoghonokie, angu kulisha iro riko banana. Wulalo ghwaro wadaja nyama ra iro ribandie na kubara kochokocho raro.
17Ni bugha kwa uja mlisha wapo wa kisha!
Wachisighie chagha.
Wuda ghucharimeria ndighi rake putu. Mkonu ghwake ghuchaoma na iriso jake ja kiwomi jichafwa.”
ទើបបានជ្រើសរើសហើយ៖
ZEKARIA 11: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.