MARKO 13
13
Jesu kughora aighu ya kunoneka kwa Hekalu
(Mat. 24.1-2; Lk. 21.5-6)
1Iji Jesu orekoghe ukifuma Hekalunyi, umu wa wanughi wake ukamzera, “Mwalimu, zighana seji magho agha na maaghi gharo ghiboie.” 2Jesu ukamzera, “Kwawuyaghiwona agha maaghi mabaa? Aha ndekuchaasigharika igho jingi aighu ya mmbao jisevuchulo anduangi.”
Wasi na matiriro
(Mat. 24.3-14; Lk. 21.7-19)
3Nao iji Jesu orekoghe kidombo aighu ya Mghondi ghwa Mizeituni, chija kimonu kulangaya cha Hekalunyi, Petro, Jakobo, Johane, na Andrea, wikamruda njama wikamkotia, 4“Welee, dighorie, maza iri richakaia lii? Sena ni alama iao ichaadiwonyera angu maza iri ralighisa kukaia?”
5Jesu ukazoya kuwizera, “Manyenyi mndungi usakemlaghasha. 6Wengi wichacha wikitumia irina japo wikighamba, ‘Ini nuo moni;’ nawo wichalaghasha wengi. 7Hata iji mwasikira wuda na wuvoro ghwa wuda, msakeobua, angu suti maza iri rikaie; ela kuja kutua ndekulighisire kande anduangi. 8Angu mbari ichawuka kulwa na mbari na wuzuri ghuchawuka kulwa na wuzuri. Kuchakaia na misughusiko andu kuzima-kuzima na njala. Ela maza iri ni sa kuzoya kulumwa kwa kuva.
9“Ela manyenyi mkulindie inyo mmbeni, angu wandu wichamfunya mandunyi, na kumkaba andenyi ya masunagogi. Mchakaia kimusi imbiri ya wabonyi nguma na wazuri kwa wundu ghwapo, mpate kuwishuhudia.#Mat. 10.17-20; Lk. 12.11-12 10Ela imbiri ya iro, suti Ilagho Jiboie jichilo kwa mbari rose. 11Nao kasikira mwawadwa na kushitakilwa, msakeja wasi kiimbiri wei mchaghora wada, ela iro muchaanekwa kughora kwa ija ngelo cheni, niro reni, righorenyi; angu si inyo mghoragha anduangi, ela ni Roho Mweli ughoragha. 12Mundu uchamfunya mruna ubwagho; ndee mwana uchamfunya mwana, na wana wichawighalukia wavi wawo, wipate kuwibwagha. 13Nenyo mchamenywa ni wandu wose kwa wundu ghwa irina japo. Ela uo urumaghiagha hata kutua, nuo moni uchaakia.”#Mat. 10.22
Matiriro mabaa
(Mat. 24.15-28; Lk. 21.20-24)
14“Ela kasikira mwammbona uja ‘Mmbiwi Mnoni’ wakaia kimusi andu kuseko kwake anduangi, (uo ushomagha ndetambuo); kimu icho, awa wiko Judea, ndewikimbirie mghondinyi.#Dan. 9.27; 11.31; 12.11 15Uo uko aighu nyumbenyi, usakesea, hata usakengia kufunya kindo chingi chiko nyumbenyi kwake anduangi.#Lk. 17.31 16Uo uko mbuwenyi, usakewuya kuwusa nguwo yake. 17Ela ni bugha kwa waka wiko na vifu na awa wiongoshagha wana matuku agho! 18Lombenyi maza iri risakekaia matuku gha mbeo. 19Angu matuku agho, kuchakaia na matiriro jingi ghisewonekie kufuma kuumbwa kwa wurumwengu, hata na jingi sena ndeghichaakaia anduangi.#Dan. 12.1; Mab. 7.14 20Na ngera Bwana usereghipunguzireghe matuku agho, kumangu mndungi ndekiagha anduangi. Ela kwa wundu ghwa waja wasaghulwa orewisaghueghe, waghipunguza matuku agho.
21“Kimu icho, ngera mndungi wamzera, ‘Kristo hoyu aha!’ angu ‘Hoja aja!’ msakerumiria. 22Angu wichawuka weke Kristo wa tee, na walodi wa tee; wichawonyera wandu alama na mashiniko, kwa kuwilaghasha; hata ngera kudimika, na waja wasaghulwa wori. 23Nenyo mkumanye angu namghoria maza rose kiimbiri.”
Kucha kwake Mwana wa Mdamu
(Mat. 24.29-31; Lk. 21.25-28)
24“Ela matuku agho, nyuma ya matiriro, iruwa jichawuya kira, na mori ndeghuchaafunya miengere yaro anduangi.#Isa. 13.10; Eze. 32.7; Joe. 2.10,31; 3.15; Wuf. 6.12 25Nyerinyeri richakaia rikipotoka kufuma mlungunyi, nandighi ra mlungunyi richasukwa-sukwa.#Isa. 34.4; Joe. 2.10; Mab. 6.13 26Niko wichaammbona Mwana wa Mdamu ukicha mawingunyi kwa ndighi na wubaa mungi.#Dan. 7.13; Wuf. 1.7 27Nao uchawiduma weke malaika uwikwanye andwamweri wasaghulwa wake kufuma mbembe inya ra ndoenyi, kufuma kuzoya kwaro ndoenyi hata kutua kwaro.”
Ifundisho kwa mtini
(Mat. 24.32-35; Lk. 21.29-33)
28“Kwa mtini mkufundishe mmbeni mfwano ughu: Iji longe lwaro lwakafunya malemba makoo, mwadamanya angu sumesu yalighisa. 29Huwo koni inyo wori, iji mwawona maza iri rakaia, manyenyi angu Mwana wa Mdamu oko kaavui na ndighi. 30Namghoria loli, kivalwa ichi ndechichaaida, maza iri rose risekaie anduangi. 31Mlungunyi na ndoenyi kuchaida, ela madedo ghapo ndeghichaaida anduangi.”
Mndungi ndemanyagha ituku na saa
(Mat. 24.36-44)
32“Ela ituku na saa iyo, mndungi ndeimanyagha anduangi, hata weke malaika wiko mlungunyi, hata Mwana; ela uja Aba nuo uichi.#Mat. 24.36 33Manyenyi mchereshe, angu kimu charo ndemchimanyire chichakaia lii anduangi. 34Ni sa mundu wawuyadamba charonyi, nao ukighusigha muzi ghwake, ukawineka wadumiki wake kazi ra ugho muzi, kula mundu na kazi yake; ukamzera mlindiri wa mnyango uchereshe.#Lk. 12.36-38 35Kwa huwo chereshenyi, angu ndemmanyire ni lii uchaacha uja bwana wa nyumba anduangi; ngera ni luma lwa kenyi, angu kio ghadi, angu njogholo ikideda, angu luma lwa nakesho; 36usechemtukira na kumkua mwalala. 37Na seji nimzeragha inyo, nawizera wose: Chereshenyi!”
ទើបបានជ្រើសរើសហើយ៖
MARKO 13: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.