MARKO 14
14
Njama em'bwagha Jesu
(Mat. 26.1-5; Lk. 22.1-2; Joh. 11.45-53)
1Idana, ghedesighwa matuku awi tu kuvikia Ndima ya Pasaka na ya Mikate Isewadie Chachu. Wakohani wabaa na walimu wa Sharia werekoghe wikilola chia emmbwada Jesu kwa wuya, wim'bwaghe.#Kuf. 12.1-27 2Ela wereghambieghe, “Ngelo ya ndima mbai, iechekaia nganyi wandunyi.”
Jesu kushingwa mavuda aja Bethania
(Mat. 26.6-13; Joh. 12.1-8)
3Nao iji Jesu orekoghe Bethania, uko kidombo vindonyi nyumbenyi kwa Simoni Mkoma, ukacha muka umu uwadie chupa ya mavuda ghiboie gha nardo gha zoghori m'baa na ndighi, ukaichikanya na kumdiria agho mavuda chongonyi kwake.#Lk. 7.37-38 4Ela wandu wamu werekoghe ahoeni wikabonya machu wikighamba weni na weni, “Kwaki mavuda agha ghawuyanonwa duu? 5Kumangu ghauzwa kwa dinari kuchumba maghana adadu, na kunekwa wakiwa!” Wikamkemia uja muka.
6Ela Jesu ukawizera, “Mlekenyi; kwaki mumjishagha wasi, nao wanibonyera ilagho jiboie? 7Wakiwa mokwanye matuku ghose, na iji mwakunda mwadima kuwitesia; ela ndemchaakanya na ini matuku ghose anduangi.#Wuk. 15.11 8Waabonya agha gheni udimagha; angu wawada kushinga mumbi ghwapo mavuda imbiri ya mariko ghapo. 9Namghoria loli, kula andu kose jichaachilwa Ilagho Jiboie wurumwengunyi kose, iji najo wajibonya muka uhu jichaghorwa kwa kumkumbuka.”
Juda kurumiria kumfunya Jesu
(Mat. 26.14-16; Lk. 22.3-6)
10Nao Juda Iskarioti, uo orekoghe umu wa waja ikumi na wawi, ukawighendia wakohani wabaa umfunye Jesu kwawo. 11Nawo iji wasikira; wikaboilwa, wikalaghana wimneke pesa. Nao moni ukalola chia ifwane emfunya kwawo.
Jesu kubonya ndima na wanughi wake
(Mat. 26.17-25; Lk. 22.7-14, 21-23; Joh. 13.21-30)
12Ituku ja imbiri ja Mikate Isewadie Chachu, ngelo ng'ondi ya Pasaka ibwaghwagha, wanughi wake wikamkotia, “Welee, ni hao kukunde dikuboisire Ndima ya Pasaka?”
13Jesu ukaduma wawi wa wanughi wake, ukawizera, “Ghendenyi mzinyi, ahoeni mchakwana na mundu udwae mtungi ghwa machi. Mnughenyi 14hata nyumba uchaangia, mumzere mundu wa iyo nyumba, ‘Mwalimu wakotia welee: ni hao chumba chapo chiko chejia Pasaka na wanughi wapo?’ 15Nao moni uchammbonyera chumba kibaa cha naighu chipambilo, na kuwikwa nicha; ahoeni diboisirenyi.”
16Wanughi wikafuma, wikaghenda mzinyi, wikawona sa iji koni Jesu orewizerieghe. Wikaboisa Ndima ya Pasaka nicha. 17Hata iji lwavika luma lwa kenyi, Jesu ukacha andwamweri na waja ikumi na wawi. 18Nao iji werekoghe mezenyi wikija vindo, Jesu ukaghamba, “Namghoria loli, umu onyu dijanyagha, uchanifunya.”#Zab. 41.9 19Wikazoya kungilwa ni wasi ngolonyi, wikamkotia umu umu wikighamba, “Welee, ni ini?” 20Jesu ukawizera, “Ni umu wa awa ikumi na wawi, uhu dishingianyagha bakuli imweri. 21Angu Mwana wa Mdamu uaghenda sa iji koni iandikilo aighu yake; ela ni bugha kwake uja mundu umfunyagha Mwana wa mdamu! Ni nicha kumangu userevaloghe uja mundu anduangi.”
Ndima ya Bwana
(Mat. 26.26-30; Lk. 22.14-20; 1 Wakor. 11.23-25)
22Iji werekoghe wikija, Jesu ukawusa mkate, ukaghurasimia, ukaghuchikanya, ukawineka wanughi wake ukighamba, “Wusenyi: ughu nigho mumbi ghwapo.” 23Ukawusa kikombe, hata iji wafunya chawucha, ukawineka; wikanywa kwa icho cheni wose. 24Ukawizera, “Ihi niyo bagha yapo ya ilaghano, idikagha kwa wundu ghwa wandu wengi.#Kuf. 24.8; Jer. 31.31-34 25Namghoria loli, sichaanywa sena divei ya mizabibu anduangi, hata ituku jija niinywagha mbishi kwa Wuzuri ghwa Mlungu.” 26Nao iji wameria kubora lumbo, wikafuma, wikaghenda cha Mghondi ghwa Mizeituni.
Jesu kughora kiimbiri angu Petro uchamkana
(Mat. 26.31-35; Lk. 22.31-34; Joh. 13.36-38)
27Jesu ukawizera wanughi wake, “Inyo mmbose muchanisigha, angu yaandikwa, ‘Nichamkaba mlisha na ng'ondi richasaghisika.’#Zek. 13.7 28Ela nyuma ya kuruka kwapo, nichamkiria cha Galilaya.”#Mat. 28.16 29Ela Petro ukamzera, “Hata ngera wose wichakimbia, ini sichaakimbia anduangi.” 30Jesu ukamzera, “Nakughoria loli, angu oho, ichi kio cheni, imbiri njogholo isededie kawi, kuchanikana mando adadu.” 31Ela Petro ukafunga ndighi kughora, “Hata ngera dafwanya chia imweri, sichaakukana anduangi.” Na wanughi wose wikaghora wokoni.
Jesu kulomba aja Gethsemane
(Mat. 26.36-46; Lk. 22.39-46)
32Nao wikabusa andu kuwangwagha Gethsemane, na Jesu ukawizera wanughi wake, “Kaienyi kidombo aha ini ngilomba.” 33Ukamdwa Petro, Jakobo na Johane; ukazoya kungilwa ni kiture na kuja wasi loli-loli. 34Ukawizera, “Ngolo yapo yaja wasi nandighi kuvikia kufwa. Kaienyi aha mchereshe.” 35Nao ukasughuda imbiri katini, ukaghwa andoenyi, ukalomba ngera idimika ija saa ya matiriro imwide. 36Ukaghamba, “Abba, ee Aba, vilambo vose vadimika kwako. Kuniinjire kikombe ichi, ela si seji nikundagha ini, ela ni seji kukundagha oho kumoni.”
37Nao ukacha ukawikua walala, ukamzera Petro, “Welee Simoni, kwaalala? Ndekudimagha kucheresha hata saa imweri? 38Chereshenyi, mlombe msengie matimonyi. Roho yakunde loli, ela mumbi ghwakaia mnyonge.”
39Ukaghenda noko sena ukalomba ukighora madedo ghaja gheni. 40Ukawuya sena, ukawikua walala, angu meso ghawo gherekoghe ghalemerwa ni dilo; hata ndeweremanyireghe ja kumtumbulia anduangi.
41Uendawichea indo ja kadadu, ukawizera, “Welee, mduagha mkilala na kukuhoresha? Yakata! Ija saa yameria kuvika! Olenyi Mwana wa Mdamu wafunywa mikonunyi kwa wandu wa kaung'a. 42Wukenyi dighende, hoyu uo unifunyagha oko kaavui.”
Kuwadwa kwake Jesu
(Mat. 26.47-56; Lk. 22.47-53; Joh. 18.3-12)
43Nao ahoeni, Jesu ukighora, Juda umu wa waja ikumi na wawi, ukabusa; ukwanye na izungu ibaa jiwadie chufu na rungu, jafuma kwa wakohani wabaa na walimu wa Sharia, na waghosi. 44Na uo mfunyi Juda orewinekieghe alama ukighamba, “Uo nichaamsusugha-lee, nuo moni. Mmbwadenyi, mwende nao mkimlindia.”
45Juda uendavika woruwu, ukamghendia Jesu shwa wori, ukamzera, “Mwalimu,” Nao ukamsusugha. 46Awo wandu wikammbwada Jesu wikamdwa. 47Ela umu wa awo werekoghe kimusi aho, ukalukua lufu lwake, ukamdema mzumba wa Mkohani M'baa, ukamdumbua kudu. 48Jesu ukawizera, “Welee, mwaacha kuniwada mkidwa chufu na rungu seji neeka kiting'a? 49Ituku ituku nerekwanyeghe na inyo Hekalunyi ngifundisha, nenyo ndemoreniwadieghe anduangi, ela Maandiko suti ghikatisho.”#Lk. 19.47; 21.37 50Aho wanughi wose wikamsigha, wikakimbia. 51Ela mdawana umu ukamnugha ukumbie shuka ya kitani kufinikira wuduu ghwake, nao wikakunda kummbwada. 52Ela ukafufunuka, ukaisigha ija shuka ya kitani, ukakimbia duu.
Jesu imbiri ya mwandu
(Mat. 26.57-68; Lk. 22.54-55, 63-71; Joh. 18.13-14, 19-24)
53Nao wikamghenja Jesu noko kwa Mkohani M'baa, andu wakohani wabaa wose, waghosi, na walimu wa Sharia werekwanyikieghe.
54Petro oremnughieghe kwa kula, hata wazenyi kwa Mkohani M'baa, nao orekoghe kidombo na walindiri ukioda modo. 55Wakohani wabaa na Mwandu ghose wikalola ilagho jemshitakia Jesu wim'bwaghe, wikajisowa.
56Wandu wengi wikareda wushuhuda ghwa tee aighu ya Jesu, ela wushuhuda ghwawo ndeghorepataneghe anduangi. 57Ela wamu wikawuka, wikamzighiria kwa tee wikighamba, 58“Isi deremsikireghe ukighamba, ‘Nichainona Hekalu ihi iaghilo kwa mikonu, na kwa matuku adadu nichaagha zima isebonywagha kwa mikonu anduangi.’”#Joh. 2.19 59Hata huwo saki, madedo ghawo ndegherepataneghe anduangi.
60Nao Mkohani M'baa ukawuka kimusi aghadi yawo, ukamkotia Jesu, “Welee, ndekutumbuliagha ilagho jingi ado? Ni malaghoki agha wandu wikushuhudiagha nagho?” 61Ela uo ukanyama kima, hata nderetumbulieghe ilagho jingi anduangi. Mkohani M'baa ukamkotia kawi, “Welee, oho nuo Kristo, Mwana wake uja Mrasimilwa, anguwada?” 62Jesu ukatumbulia, “Ini nuo moni; nenyo mchammbona Mwana wa Mdamu uko kidombo chia ya mkonu ghwa kiwomi ghwa Uo-Uwadie-Ndighi-Rose, sena mchammbona ukicha na mawingu gha mlungunyi.”#Dan. 7.13 63Aho, Mkohani M'baa ukarashua nguwo rake, ukaghamba, “Dilola washahidi wazima wa indoki? 64Mwameria kusikira masholio ghake inyo mmbeni. Mwawona wada?” Na wose wikamtanya kukaia mundu ufwane kubwaghwa.#Wal. 24.16 65Wandu wamu wikawoka kumchuya mada, na kumfinikira wushu ghwake na kumkaba wikimzera, “Loda! Nani wakukaba?” Nao walindiri wikammbusa wikimkaba na chui.
Petro kumkana Jesu
(Mat. 26.69-75; Lk. 22.56-62; Joh. 18.15-18, 25-27)
66Nao iji Petro orekoghe aisi wazenyi, mwai umu ubonyagha kazi kwa Mkohani M'baa ukacha. 67Hata iji wammbona Petro ukioda modo, ukamzighana, ukaghamba, “Na oho wori morekwanyeghe na uja Mnazareti Jesu.” 68Ela Petro ukakana ukighamba, “Sighiichi ini, hata sighitambuagha agho kughoragha anduangi!” Aho, Petro ukafuma shighadi mnyangonyi na njogholo ikadeda. 69Uja mwai ukammbona sena, ukazoya kuwighoria kawi awo werekoghe kimusi kaavui, “Uhu ni mundu wa mzawo.” 70Petro ukakana sena. Nyuma kutini, awo werekoghe kimusi kaavui wikamzera Petro, “Ni loli, oho ko mundu wa mzawo angu kuko Mgalilaya.”
71Ela Petro ukazoya kukughemesha na kughema ukighora, “Simwichi mundu uhu mumghoragha anduangi.” 72Nao ahoeni njogholo ikadeda indo ja kawi. Petro ukakumbuka jija ilagho, seji Jesu oreghorieghe; “Imbiri njogholo isededie kawi, kuchanikana mando adadu.” Ukawawa ni ngolo, ukalila na ndighi.
ទើបបានជ្រើសរើសហើយ៖
MARKO 14: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.