MATHAYO 23
23
Jesu kuwionya walimu wa Sharia na Mafarisayo
(Mk. 12.38-39; Lk. 11.43, 46; 20.45-46)
1Niko Jesu ukajizera jija izungu ja wandu na wanughi wake, 2“Walimu wa Sharia na Mafarisayo niwo wabaa wefundisha Sharia ra Musa; 3kwa huwo agho ghose wimzeragha, ghiwadenyi na kughibonya, ela msakebonya seji wibonyagha; angu awo wadaghora ela ndewibonyagha anduangi. 4Wadafunga misigo ilemere isedukikagha, na kuwidukishira wandu maweghenyi, ela awo weni ndewiiwadagha hata na chala cheni. 5Mabonyo ghawo ghose wadabonya wikikunda kuwonwa ni wandu, angu waghibonya mafindikio ghawo na hemu ra nguwo rawo rikaie mbaa;#Mat. 6.1; Mit. 15.38; Wuk. 6.8 6wakunda malalo gha ishima karamunyi, na vifumbi va imbiri sunagoginyi, 7na kurogholwa sokonyi wikiwangwa ni wandu ‘Mwalimu.’ 8Ela inyo msakewangwa ‘Mwalimu’ angu Mwalimu onyu ni umweri na inyo mmbose moko wanyinyu. 9Sena msakemmbanga mndungi ‘Aba’ aha ndoenyi, angu Ndeyo onyu ni umweri uko mlungunyi. 10Hata msakewangwa ‘Bwana’, angu Bwana onyu ni umweri, nuo Kristo. 11Uo uko m'baa aghadi konyu uchawuya mdumiki onyu;#Mat. 20.26-27; Mk. 9.35; 10.43-44; Lk. 22.26 12na uo ose ukujosagha moni uchaserwa, ela uo ose ukuseragha moni uchajoswa.#Lk. 14.11; 18.14
Jesu kukemia waji-kuwi
(Mk. 12.40; Lk. 11.39-42, 44, 52; 20.47)
13“Ni bugha konyu inyo walimu wa Sharia na Mafarisayo, waji-kuwi! Angu mwaghurugha mnyango ghwa Wuzuri ghwa mlungunyi; inyo mmbeni ndemngiagha, na awo wikundagha kungia mwawighiria. [ 14Ni bugha konyu inyo walimu wa Sharia na Mafarisayo, waji-kuwi! Angu mwadaiwia waka wakiwa, sena mkilomba malombi mengi mpate kukaswa. Mchapata kutanywa kubaa.]
15“Ni bugha konyu inyo walimu wa Sharia na Mafarisayo, waji-kuwi! Angu mwadamara-mara baharinyi na andu kuomie eri mpate mnughi umweri. Ela iji mwampata, mwam'bonya kukaia mundu oghenda jehanamu mando awi kuchumba inyo mmbeni.
16“Ni bugha konyu inyo vilongozi vifue meso! Angu mwadaghamba, ‘Mundu ukaghema kwa Hekalu si ilagho jingi, ela wei ukaghema kwa dhahabu ya Hekalunyi uchawadwa ni ijo ighemi.’ 17Vitungure vikelie inyo! Kibaa ni chiao? Ija dhahabu angu Hekalu iyo ibonyagha dhahabu kukaia ielie? 18Sena mwadaghamba, ‘Mundu ukaghema kwa madhabahu, uchawadwa ni ijo ighemi.’ 19Wandu mfue meso inyo! Kibaa ni chiao? Ni jija ifunyo angu madhabahu agho ghibonyagha ijo ifunyo kukaia jielie? 20Kwa huwu, uo ughemagha kwa madhabahu wadaghema kwa iyo, na kwa icho chose chawikwa aighu yake. 21Na uo ughemagha kwa Hekalu wadaghema kwa iyo, na uo ose ukaiagha andenyi yaro. 22Uo ughemagha kwa mlungunyi wadaghema kwa kifumbi cha nguma cha Mlungu, na kwa uo uchiseriagha wori.#Isa. 66.1; Mat. 5.34
23“Ni bugha konyu inyo walimu wa Sharia na Mafarisayo, waji-kuwi! Angu mwafunya ifungu ja ikumi hata kwa mbogha ra malemba ghinukie nicha, na bizari, ela mwasigha agho malagho ghiko gha suti gha Sharia na hachi, na wughoma, na irumirio. Kumangu agha mwaghibonyere, chiaimweri na ghaja mazima wori.#Wal. 27.30 24Vilongozi mfue meso inyo! Muinjagha rwai na kumila ngamila!
25“Ni bugha konyu walimu wa Sharia na Mafarisayo, waji-kuwi! Angu mwadaoghosha vikombe na sahani cha shighadi, ela nandenyi vachua ivo vindo muvipatire kwa kusoka na kukenga. 26Mfarisayo kitungure oho! Imbiri oghosha kikombe nandenyi, niko chichaaela cha shighadinyi wori.
27“Ni bugha inyo walimu wa Sharia na Mafarisayo, waji-kuwi! Angu mwafwanana na makaburi ghikabilo chokaa, nagho ghawoneka ghighokie cha shighadi, ela kondenyi ghachua maindi gha wafu na kula wuchafu.#Mab. 23.3 28Ni huwo koni na inyo, cha shighadi mwawoneka kwa wandu kukaia wecha, ela kondenyi, mo waji-kuwi na kuchulwa ni mawiwi.”
Jesu kuwilodera gha ikabo jawo
(Lk. 11.47-51)
29“Ni bugha konyu inyo walimu wa Sharia na Mafarisayo, waji-kuwi! Angu mwaghiagha makaburi gha walodi na kughipamba makaburi gha wandu wa hachi; 30mkighamba, ‘Ngera isi dedeeka ngelo ra weke wawa wedu, kumangu ndederewadanagha nawo kuwibwagha walodi anduangi!’ 31Huwo mwakushuhudia inyo mmbeni kukaia wana wa awo wandu wiwibwaghie walodi! 32Idana imerienyi iyo kazi isighilo ni weke wawayo! 33Inyo choka, kivalwa cha choka ra wusungu! Mchakimbia wada msepato ni uko kutanywa kwa jehanamu?#Mat. 3.7; 12.34; Lk. 3.7 34Kwa huwu nichamdumia walodi na wandu wa hikima na walimu, ela wamu wawo mchawibwagha na kuwisulubisha, na wazima mchawikaba na viboko andenyi ya masunagogi ghenyu na kuwitirira muzi kwa muzi. 35Mpate kuchelwa ni ikabo kwa wundu ghwa bagha ya wandu wa hachi wose erediriloghe ndoenyi. Kufuma bagha ya Abeli mhachi, hata bagha ya Zakaria mwana wa Barakia, uo morembwaghieghe andenyi ya Hekalu madhabahunyi gha wueli.#Kuz. 4.8; 2 Mal. 24.20-21 36Namghoria loli, kivalwa ichi chichakabwa kwa wundu ghwa maza iro rose.
Lukundo lwa Jesu kwa Jerusalemu
(Lk. 13.34-35)
37“Ee Jerusalemu, Jerusalemu, kubwaghagha walodi na kuwilasa na magho awo widumwagha kwako. Ni kalinga neretimieghe kuwikwanya wana wako, seji nguku ivikwanyagha vana vake aisi ya mawawa ghake, ela kukalegha. 38Zighana idana kwasighilwa nyumba yako duu.#Jer. 22.5 39Nani nakuzera, ndekuchaaniwona sena hata ituku jija kuchaaghora, ‘Warasimilwa uo uchagha kwa irina ja Bwana.’”#Zab. 118.26
ទើបបានជ្រើសរើសហើយ៖
MATHAYO 23: TAITA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 1997
All rights reserved.
